भांगरभूंय | प्रतिनिधी
वास्को : वास्को शाराच्या मदींच आशिल्ले पोरणे हॅप्पी अपार्टमेंट्स इमारतीच्यो दोन बाल्कनी आयज दनपरां कोसळ्ळ्यो. हाका लागून ह्या वाठारांत भंयाचें वातावरण निर्माण जालां. हे घडणुकेंत कोणाक कांय जावंक ना. मात इमारती पोंदाक आशिल्ले एके दुचाकीचें लुकसाण जालें.
हे घडणुके उपरांत उजो पालोवपी दळाक आपयले. तशेंच पालिकेच्या ट्रकांतल्यान माती काडपाचें काम सुरू केलेंे. थळावे आमदार कृष्णा (दाजी) साळकार आनी नगरसेवक शमी साळकार हांणी रोखडेंच घडणुके सुवातेर येवन पळोवणी केली.
हे घडणुके खातीर वास्को आनी आशिकुशीकच्या वाठारांतल्या पोरण्या आनी धोको निर्माण करपी इमारतींच्या धनयांक जापसालदार धरपाक जाय, अशें आमदार साळकर हांणी सांगलें.
मुख्यमंत्र्यांनी हे विशीं बेगोबेग पावलां उपारून असल्या इमारतीं खातीर खर धोरण लागू करचें, अशी मागणी तांणी केली. ह्या अपघाताक लागून परत वास्को शारांतल्यो पोरण्यो आनी मोडूंक पाविल्ले इमारतींचे सुरक्षीततायेचो प्रस्न मुखार आयला
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
