भांगरभूंय | प्रतिनिधी
एकलो गंभीर जाल्यार मोटारचालक किरकोळ जखमी
भांगरभूंय । प्रतिनिधी
मुरगांवः वास्को मांगोरहील राष्ट्रीय मार्गा वयल्यान दाबोळी विमानतळ रस्त्यान वतना शांतिनगर वाठारांत मोटार चालकाचो ताबो गेल्ल्यान शेनवारा 3 ऑगस्टाक अपघात जालो. ह्या अपघातांत संजोग संजय बोरकार (19) हाका मरण आयलें. जाल्यार वाहनचालक डॅव्हीड क्रूज हाचेर हॉस्पिटलांत उपचार केले उपरांत घरा धाडलो. मोटारींत बशिल्लो सहर्ष भोसले हाका अपघातांत गंभीर दुखापत जाल्ल्यान ताका गोंय वैजकी म्हाविद्यालयाच्या हॉस्पिटलांत (गोमॅकॉ) दाखल केला.
शेनवारा 3 ऑगस्टाक रातच्या 11.40 वरांच्या सुमाराक वास्को मांगोरहीलच्या राष्ट्रीय म्हामार्गा वयल्यान दाबोळी विमानतळ रस्त्या वयल्यान वचपी स्विफ्ट मोटार (जीए 01 ई 6398) धोफरायत वताली तेन्ना शांतिनगर वास्को मोटार चालकाचो ताबो गेलो आनी अपघात जालो. ताबो गेल्ल्यान मोटार एका घराचेर वचून आदळ्ळी. अपघात जाल्ल्याचें दिसताच आशिकुशीच्या लोकांनी गाडयेंतल्या तिगांक मुळाव्या उपचारा खातीर दाबोळी चिखलीच्या उपजिल्हो हॉस्पिटलांत दाखल केले. अपघातांतल्या दोगांची भलायकी गंभीर आशिल्ल्यान तांकां अदीक उपचारा खातीर गोमॅकाँत धाडले.
गोमॅकाँत उपचार चालू आसतना गंभीर जखमी जाल्लो संजोग बोरकार हाका मरण आयलें जाल्यार अपघातांत गंभीर जखमी जाल्लो सहर्ष भोसले (24) हाक अतिदक्षता विभागांत उपचारा खातीर दाखल केलो. मोटारचालक डॅव्हीड क्रूज हाचेर उपचार करून घरा धाडलो.
अपघातांत मरण आयिल्लो वास्को नॉन मूनचो संजोग बोरकार हाचे कुडीचेर सकाळीं पोस्टमॉर्टम केले उपरांत ती ताच्या घरच्यांचे सुवादीन दिली. दनपारां वास्को खारीवाडो हिंदू मसुंडेंत कुडीचेर निमाणे संस्कार केले.
अपघाताची म्हायती मेळटाच पुलिसांनी शेनवारा राती अपघाताचे सुवातेर वचून पंचनामो केलो. अपघाताची फुडली चवकशी वास्को पुलीस स्टेशनाचे हवालदार अनंत पवार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
