भांगरभूंय | प्रतिनिधी
मुरगांवः बुधवारा मुरगांव म्हालांतल्या सगळ्याच वाठारांनी व्हड प्रमाणांत पडिल्ल्या पावसान लोकजीण विस्कळीत जाली. खूब कडेन झाडां पडलीं, रस्त्याचेर उदक सांचिल्ल्यान हुंवारा भशेन स्थिती निर्माण जाली. तेचवरी हॉटेल अनंताश्रमा मुखा वयलो रस्तो नेमलो.
बुधवारा पडिल्ल्या पावसाचो मुरगांव म्हालांतल्या वास्को शाराक खूब मार बसलो. ओरुले, बेलाबाय वाठारांतल्या रस्त्यांचेर उदक सांचिल्ल्यान वाहनचालकांचे हाल जाले. विद्यार्थ्यांक उदकांतल्यान वाट काडीत शाळेंत वच्चें पडलें. खूबशा वाठारांनी पावसाच्या उदका वांगडा प्लास्टीक, कोयर येवन लोकांच्या आंगणांत, घरांत, रस्त्यांचेर सांचलो. मंगळारा रातच्यान पडपी पावसान बुधवारा सकाळ मोरोम विसव घेवंक नाशिल्ल्यान लोकजीण विस्कळीत जाली.
मेर्सेस वाडे वाठारांत आंब्याचें व्हड झाड हुमटून रस्त्याचेर पडलें. हें झाड लायटीच्या खांब्याचेर पडिल्ल्यान सरयो तुटल्यो आनी वीज पुरवण खंडीत जाली. घडणुकेची म्हायती मेळटाच उजो पालोवपी दळाच्या जवानांनी सुमार 4 वरांचे मेहनतीन झाड कापून कुशीक काडलें. झाड पडिल्ल्यान ह्या मार्गा वयली येरादारी बंद जाली. विद्यार्थ्यांचे, कामाक वचपी लोकांचें हाका लागून हाल जाले. वीज खात्याच्या कर्मचाऱ्यांनी नवो लायटीचो खांबो घालून ताचेर सरयो ओडून सांजेच्या 4 वरांच्या सुमाराक वीज पुरवण सुरळीत केली.
मजगतीं, वाडे तळ्या लागसार, हार्बर, हॉलांत झाडां पडपाच्यो घडणुको घडल्यो. रुमडावाडो, अप्पर जेटी वाठारांत दोंगराचीं पालसणां कोसळ्ळीं. मायमोळे वाठारांतल्या कब्रस्थाना लागसार रेल्वे दोट्टीकरणाच्या चलिल्ल्या कामाक लागून थंयच्या मुख्य व्हाळाची उदक वचपाची वाट बंद जाल्ल्यान मायमोळें वाठारांत उदक भरून वयर आयलें. तेचवरी व्हाळा कुशीची माती कोसळिल्ल्यान रेल्वे अधिकाऱ्यांची धांवपळ जाली. तांणी जेसीबी मशिनान माती काडपाक सुरवात केल्या. माती आनीक कोसळची न्हय हे खातीर रेंवेच्या पोतयांची राखणे वणत उबारल्या. वास्कोचे आमदार कृष्णा साळकार हांणी घडणुकेचे सुवातेर वचून रेल्वेच्या अधिकाऱ्यांक सुचोवण्यो केल्यो. मजगतीं, कुठ्ठाळे नव्या उड्डाण पुलाचेर उदक सांचून राविल्ल्यान वाहन चालकाक तातूंतल्यान वाट काडटना कसरत करची पडली. दुचाकी वयल्यान वचपी लोक जाल्यार दुसऱ्या वाहनांक लागून उसळिल्ल्या उदकाक लागून चिप्प भिजले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
