भांगरभूंय | प्रतिनिधी
वास्कोकारांची मागणी; एफ एल गोम्स मार्ग जातलो अशीर
भांगरभूंय । प्रतिनिधी
मुरगांवः गोंय सरकार आनी एमपीएक वास्कोच्या एल एफ गोम्स मार्गार अपरॅम्प उबारपाचो आसा जाल्यार तांणी सगळ्यांत पयलीं वास्को आनी मुरगांवच्या लोकां खातीर जनसुनावणी घेवची, उपरांतूच ह्या अपरॅम्पा संबंदांत संबंदीत विभागान विचार करचो, अशी मागणी वास्कोकारांनी केल्या.
वेर्णा ते मुरगांव बंदर मेरेनच्या राष्ट्रीय म्हामार्गा वयलो वास्को शारांतलो ‘अपरॅम्प’ (देंवती) शारा खातीर घातक थारतलो. तो अपरॅम्प कोणाच्या फायद्या खातीर उबारतात, हाचें स्पश्टीकरण एमपीए, गॅमन इंडिया, राष्ट्रीय म्हामार्ग प्राधिकरण, भौशीक बांदकाम म्हामार्ग विभागान वास्को मुरगांवच्या लोकांक दिवप गरजेचें आसा. एफ एल गोम्स मार्गाची सध्याची रुंदी 17 मिटरां परस चड आसा. जर ह्या रस्त्याचेर अपरॅम्प उबारलो जाल्यार मार्गाची रुंदी फक्त 9 मिटरूच बाकी उरतली. ताका लागून फुडारांत वास्कोंत व्हड प्रमाणांत येरादारेची कोंयडी जातली. हाचो विचार करून केंद्र आनी राज्य सरकारान अपरॅम्प उबारपा विशीं गंभीरतायेन विचार करप गरजेचें आसा, अशें वास्कोकारांचें म्हणणें आसा.
एमपीए वतीन उबारिल्ल्या वेर्णें ते मुरगांव बंदरा मरेनच्या म्हामार्गाक लागून वास्को शारांतली अवजड वाहनांची येरादारी मुरगांव बंदर सडा मार्गान वता. त्या म्हामार्गाचो उड्डाण पूल मुरगांव बंगर (धको नं. 9) मेरेन पुराय जाले उपरांत फुडारांत हार्बर- सडा मार्गान उण्या प्रमाणांत अवजड वाहनांची येरादारी जातली. त्या राष्ट्रीय म्हामार्गाच्या उड्डाण पुलाचे एके देंवतेर अपरॅम्प वास्को शारांतल्यान वचपा खातीर उबारपाच्यो हालचाली सुरू जाल्यात. हो अपरॅम्प वास्को शारांतल्या एफ एल गोम्स मार्गाच्या मदेगात उबारतले. ताका लागून एफ एल गोम्स मार्गाची सध्याची रुंदी 17 मिटरा वयल्यान 9 मिटरा परस उणी जातली. हया अपरॅम्पाचो फायदो कोणाक जातलो हाची म्हायती अजून मेरेन वास्को, मुरगांव, बायणाच्या लोकांक मेळूंक ना. एमपीएक अपरॅम्प वास्को शारांत कित्याक जाय, हें अजून अकाय संबंदीत विभागान स्पश्टपणान जाहीर करूंक ना. सप्तकाच्या काळांत स्वतंत्रपथ मार्गार भरपी लांकडी फेरयेक ह्या अपरॅम्पाक लागून व्हड आडखळ जातली. हाचो विचार करून एमपीए आनी राज्य सरकारान ह्या अपरॅम्पाचो विचार सोडून दिवचो. कारण एफ एल गोम्स मार्ग हो मुरगांव, सडा, रुमडावाडो, जेटी, बायणा वाठाराक जोडपी म्हत्वाचो मार्ग आसा. गोंय सरकार राज्यांतले रस्ते रुंद करपा खातीर फुडाकार घेता जाल्यार वास्कोचो एफ एल गोम्स रस्तो अशीर करपाचें कित्याक चिंतता, असो प्रस्न वास्कोकारांनी उपस्थीत केला. पोरूं, अपरॅम्प उबारपा खातीर संबंदीत वास्कोच्या एफ एल गोम्स मार्गाची वरिश्ठ अधिकाऱ्यांनी पळोवणी केल्ली. त्या वेळार दक्षीण गोंय येरादारी पुलीस उपअधिक्षकान ह्या अपरॅम्पाक हरकत घेतिल्ली. ह्या अपरॅम्पाक लागून रस्त्याची रुंदी 17 मिटरा वयल्यान 9 मिटरा परस उणी जातली. उपरांत रस्तो अशीर कित्याक जालो हाचें स्पश्टीकरण चड करून येरादारी विभागाक दिवचें पडटलें. हे खातीर त्या येरादारी पुलीस उपअधिक्षकान अपरॅम्पाक विरोध केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
