भांगरभूंय | प्रतिनिधी
भांगरभूंय । प्रतिनिधी
वास्कोः हांगच्या स्वातंत्र्य पथार रस्तो डिव्हायडरा मदीं आशिल्ले पोरणे आनी कळमेल्ले लायटी खांबे, तांचेर हुमकळपी नेट केबल्स काडिल्ल्यान ताका आतां एक नवें रुप मेळ्ळां. ह्या रस्त्याक पयलीचें वैभव मेळोवन दिवपाचो आपलो यत्न आसा अशें वास्कोचो आमदार कृष्णा (दाजी) साळकार हाणे सांगलें.
ह्या रस्त्याच्या डिव्हायडरां मदी आशिल्ल्या लायटीच्या खांब्या वयल्यान नेट केबल ऑपरेटर्सांनी आपल्यो केबल्स व्हेल्यो. ताका लागून रस्त्याचे सोबितीकरणाक आडमेळे येताले. कांय केबली तुटून रस्त्यार पडिल्ल्यान दुचाकी चालकांक तांचो त्रास जातालो. ह्या हुमकळपी केबलां संबंदी सामाजीक वावुरप्यांनी आवाज उठयल्लो. लायटीच्या खांब्या पयल्यान आशी कुशीच्या आस्थापनांक वीज पुरवण करपा खातीर कश्या कश्यो लायटीच्या सरयो व्हेल्लो. ताका लागून स्वातंत्र्य पथाक बुरशें स्वरुप मेळिल्लें. आमदार साळकाराच्या यत्नांक लागून आतां रस्तो चकाचक जाला.
स्वातंत्र्य पथाच्या दोनूय वटेन आशिल्ल्या लायटीच्या खांब्यांचेर दिवे लायल्यात. डिव्हायडरां मदले खांबे काडल्यात. नेट केबल्स लेगीत काडून व्हेल्यात. वाहन चालकांक ते खातीर थाकाय मेळ्ळ्या. डिव्हायडरां मदले खांबे काडिल्ल्यान दिवाळेच्या वेळार नरकासुर सर्तीच्या वेळार चड उंच आशिल्ले नरकासुर संबंदीत पंगडांक हाडपाक आता मेळटले. शिगमो मिरवणुके वेळार चित्ररथांक आतां आडमेळे येवचे नात. आमदार साळकार हाणे पोरणे सरकारी शाळेचो जिर्णोद्धार केला. वास्को रेल्वे स्टेशनाचें नूतनीकरण, स्वातंत्र्य पथाचें सोबितीकरण, आनी लँडस्केपींग करपाचें काम रोखडेच सुरू करतले अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
