भांगरभूंय | प्रतिनिधी
वास्को: वास्को भाजपा मंडळाचे आदले अध्यक्ष आनी नगरसेवक दीपक नायक हांचें संपर्क कार्यालय फोडून सुमार २५ हजार रुपया चोरिल्ल्या प्रकरणांत वास्को पुलिसांनी उडपी कर्नाटकच्या सुरेश पुजारी (५२) हाका अटक केली. ह्या प्रकरणांत वास्को पुलीस उपनिरीक्षक कॅरी फर्नांडीस तपास करतात.
पाट्रॉंग बायणाच्या फातिमा मंझिलच्या तळ माळयेर दीपक नायक हांचें संपर्क कार्यालय आसा. ह्या कार्यालयाच्या शटराक लायिल्लें कुलूप तोडून चोरांनी पंचवीस हजार रुपया चोरिल्ल्याची कागाळ दीपक नायक हांचे भाव सम्राट नायक हांणी केल्ली. ही चोरी १८ जानेवारीक सांजेवेळार स ते १९ जानेवारीक दनपरां चार वरां मजगतीं जाल्ल्याची कागाळींत म्हणिल्लें. दीपक नायक हे तिरुपतीक आशिल्ले. ते वास्को आयले उपरांत मंगळारा २१ तारखेक हे चोरयेची कागाळ केल्ली. हे कागाळीची दखल घेतना वास्को पुलिसांनी तपास सुरु केलो. तपासा उपरांत बुधवारा सुरेश पुजारी हो पुलिसांचे तावडेंत सांपडलो. ह्या चोराक वास्को शारांतल्या म्युनिसिपल उद्यानांत ताब्यांत घेतलो. ताचे कडेन चवकशी केले उपरांत तांणी चोरयेची कबुली दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
