भांगरभूंय | प्रतिनिधी
बरेच कडेन सिवरेज आनी उदका पुरवणेचीं पायपां लागीं लागीं आसतात. कांय कडेन नागरिकांनी हें काम बंद पसून उडयलां.
तुमच्या कुटुंबाची म्हयन्याची येणावळ एक कोटी वयर आसा, पूण घरच्यांची भलायकी सारकी ना, जाल्यार इतलो पयसो, गिरेस्तकाय कित्याक उपकारता? भलायकी हीच खरी संपत्त, हेर सगल्यो गजाली दुय्यम. कांय दुयेंसांनी शुद्ध उदक आनी नितळसाण ही निरोगी जिविताची गुरुकिल्ली आसता. हालींच दाबोळेचे एके इमारतींत पिवपाच्या शुद्ध उदकांत घाणयारें उदक मिस्तुराद जाल्ल्यान हागवण (डायेरिया, अतिसार) आनी ओंकारेचें दुयेंस पातळ्ळें. 12 मार्चाक पयलो दुयेंती सांपडलो. पयल्या सप्तकांत 55 आनी आतां तांचो आंकडो 156 चेर गेला. सध्या परिस्थिती नियंत्रणा खाला आसा. कोणाच्या तरी निश्काळजीपणाक लागून हें घडलां. घडये जबाबदार व्यक्तींक ख्यास्त जायत वा प्रकरण पोल जावन उडून वचपाकूय शकता! ह्या इमारत वाठारांत पांच ब्लाॅक आसात. तातूंत 328 फ्लॅट. ब्लाॅक ए सोडल्यार हेर कडेन हें दुयेंती मेळ्ळ्यात. तातूंत कोण गंभीर नात, ही बरी गजाल. मध्य प्रदेशांत जानेवारींत घडलें, तशें कितें जाल्लें जाल्यार व्हडलो बोवाळ जावपाचो. थंय हागवण, मोडशी जावन 400 लोक दुयेंत पडिल्ले. भितरल्या 15 जाणांक मरण आयिल्लें. सध्या वास्को कोळसो परमळटा. ताचे परिणाम घडये फुडाराक जावंक शकतात, पूण सध्या हागवणेच्या दुयेंसान वास्कोकारांक धपको दिलो.
ही घडणूक घडटकच भलायकी खातें, प्रदुशण मंडळ सक्रीय जालें आनी तांणी घरांनी वचून तपासणी केली. इमारतींक उदका पुरवण करपी उदक शुद्धीकरण प्रकल्प सारको नाशिल्ल्याचें तांकां दिसून आयलें. बांदकाम विभागाची टांकी तपासली. बोअरवेल आनी बागेंतल्या उदका पुरवणेंत दुशीत उदक मेळ्ळें. सध्या ही पुरवण बंद केल्या आनी हेर माध्यमांतल्यान ती जाता. खंयूय उदकाची पायपलायन घालतना वा घराक, हाॅटेलाक कनेक्शन दितना थंय घाणयाऱ्या उदकाची, सिवरेजीची पायप लायन ना मूं, हाची तपासणी करपाक जाय. बरेच कडेन सिवरेज आनी उदका पुरवणेचीं पायपां लागीं लागीं आसतात. कांय कडेन नागरिकांनी हें काम बंद पसून उडयलां, पूण उदका पुरवण आनी हेर विभागांच्या अधिकाऱ्यांच्या हें लक्षांत कशें येना? काय ते आडनदर करतात? भलायके कडेन खेळप्यांक जल्माची बुद्द शिकोवपाक जाय. मागीर तो कामगार आसूं ना जाल्यार वरिश्ठ अधिकारी!
डायेरिया, डिसेंट्री असल्या दुयेंसांनी आंगांतले उदक उणें जाता. ओंकारी, जोर, घुंवळ येता. वेळारूच उपचार जायनात जाल्यार तीं जिवघेणींय थारूं शकतात. इमारतींनी फ्लॅट विकत घेतना वा स्वताचें घर बांदतना उदका पायपलायन, सिवरेज पायपां पयस- पयस आसात, हाची खात्री करून घेवपाक जाय. सरकारी उदक शुद्ध जावन येता, तरीय दरेकल्यान तें परत बोमाडे येयसर तापोवपाक जाय. भायलें खावपाचें प्रमाण हिस्पा भायर वाडलां. थोडे तर दोनूय वेळ भायरूच जेवतात. रस्त्या कुशीच्या गाड्यां वयलें खातात. दनपरां साडेतीनांक, रातचे देडाक जेवतात, खातात. तेंय बी तेलकट, मसाल्याचें. तें आयज ना फाल्यां भलायकेक मारक थारूं येता. जेवतकच, खेळून येतकच, संडासा उपरांत हात नितळ धुंवपाक जाय. भलायकी खात्यान आतां कितें करचें तो सल्लो दिला. इमारतींच्या टांकयांची, पायप लायनींची, सिवरेज वेवस्थेची नेमान तपासणी जाय. पंचायत, पालिके वरवीं हें काम करूं येता. पायपलायनी पोरण्यो आसल्यार त्यो बदलूंक जाय. उदक शुद्धीकरण प्रकल्पांची तांक वाडोवंक जाय. नागरिकांनीय सादूर रावंचें. सगलें कितें सरकारूच करतलें, ह्या भरवंशाचेर रावप चुकीचें. भोवतेक इमारतींनी, काॅलनींनी, सोसायटींनी समित्यो आसतात. धर्मीक, संस्कृतीक कार्यावळी, उत्सव करपा वांगडाच तांणी भलायके कडेन संंबंदीत प्रस्नां कडेनूय लक्ष दिवप गरजेचें. दुयेंस जावचें न्हय, म्हूण पयलींच सादूर रावप बरें. खरें न्हय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
