भांगरभूंय | प्रतिनिधी
भांगरभूंय । प्रतिनिधी
मुरगांवः वास्को- खारीवाडो हांका सान भुरग्यांक उबारून व्हरता ह्या दुबावांतल्यान एका मानसीक दुयेंतीक मारपेट केल्ले खातीर वास्को पुलिसांनी तिगांक अटक केल्या. त्या दुयेंतीचेर शिरदोनच्या मानसीक दुयेंस हॉस्पिटलांत उपचार सुरू आसात.
खारीवाडो टीबी कुन्हा चौकांत एका सान भुरग्याक उबारून व्हरता ह्या दुबावान डीन जोन्स हाकां सौदागर जेन, बसवराज राठोड आनी अन्वर कालिगर हांणी यथेस्ट मारपेट केल्ली. ही मारपेट करतातो व्हिडिओ सोशल मीडियाचेर व्हायरल जाल्लो. पुलिसांनी जोन्स हाची दोतोरां वरवीं तपासणी केल्या उपरांत तो मानसीक दुयेंती आशिल्ल्याचें स्पश्ट जालें. उपनिरीक्षक रोहन नागेशकारान मारपेट केल्ल्यांक अटक केली. लोकांनी दुबावा वयल्यान कोणाकूय मारपेट करचे पयली पुलिसां कडेन संपर्क सादचो, अशें निरीक्षक कपील नायक हांणी आवाहन केलां.
————————————
लॅपटॉप चोरल्ल्याक अटक
म्हापशेंः फाटल्या 29 ऑगस्टाक कामरखाजन म्हापशें हांगा वर्कशॉपांत दवरिल्ले गाडयेंतलो नोकिया पुअरबूक हो लॅपटॉप चोरिल्ल्या गुन्यांवा खाला म्हापशें पुलिसांनी निरंजन पाटील (करासवाडो) ह्या दुबाविताक अटक करून चोरिल्लो लॅपटॉप जप्त केलो.रूदोल्फ डिसोझा हो आपली गाडी सारकी करपाक घेवन आयिल्लो. निरंजन हो लेगीत आपली गाडी सारकी करपाक घेवन आयिल्लो.एक म्हयन्या उपरांत बुधवारा 28 सप्टेंबराक डिसोझा आपली गाडी व्हरपाक आयलो तेन्ना ताका गाडयेंतल्यान लॅपटॉन ना जालां हें दिसलें. सीसीटीव्ही फुटेज तपासून पळयगीर निरंजन हो लॅपटॉप काडून व्हरतना दिसलो. डिसोझान म्हापशें पुलीस स्टेशनांत कागाळ करतगीर पुलिसांनी ताका अटक केली. उपरांत 20 हजारांच्या बॉण्डाचेर ताका जामिनाचेर सोडलो.
———————————————-
हणजुण्यात दुचाकी चोराक अटक
म्हापशेंः वागातोर हांगा मँगो ट्री हांगा पार्क केल्ली जीए 03 डब्ल्यू 1624 ही रेंट य बायक दुचाकी चोरिल्ले खातीर हणजूण पुलिसांनी डॅनियल दास आवेरो (केरळ) हांका अटक केली. ही चोरी 25 सप्टेंबराक जाल्ली. आपली दुचाकी चोरल्या अशी कागाळ परशुराम पाटील (म्हापशें) हांणी केल्ली. हवालदार डी एच गवंडी, कॉस्टेबल महेंद्र मांद्रेकार आनी रुपेश आजगांवकार हांणी बिरेस्तार दुचाकीचो सोद घेतलो आनी दुबाविताक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
