भांगरभूंय | प्रतिनिधी
वास्को : वास्को शारांतल्या विवीध वाठारांतल्यान तीन दुचाकी चोरिल्ल्या प्रकरणांत वास्को पुलिसांनी दोगां तरणाट्यांक अटक केल्या. वैभव रणदिवे (19) आनी अझरन इक्बाल शेख (18) अशीं अटक केल्ल्या दुबाविताचीं नांवां आसात. ते दोगूय मुळचे कर्नाटकाचे आशिल्ल्यान सध्या सांकवाळे रावतात. तांकां न्यायालयान चार दिसांची पुलीस बंदखण आयकयल्या.
पुलिसांनी दिल्ले म्हायती प्रमाण, 5 ऑक्टोबरा पयलीं ह्या दोगांनी वास्कोच्या वेगवेगळ्या भौशीक पार्किंगांतल्यान तीन दुचाकी चोरिल्ल्यो. हातूंत एक टीव्हीएस एनटॉर्क (GA-06-Y-7790), एक राखाडी गोबर्या रंगाची एक्टिव्हा स्कुटर (GA-08-W-7706) आनी नोंदणी नंबर नाशिल्ली एक धव्या रंगाची ऍक्टिव्हा हांचो आसपाव आसा. ह्या प्रकरणांत वास्को पुलीस स्टेशनाचे हेड कॉन्स्टेबल हेमंतकुमार गोसावी हांणी कागाळ दाखल केल्ली.
हे कागाळीवेल्यान, भारतीय न्याय संहिता (बीएनएस), 2023 च्या कलम 303 (2) आनी 3 (5) खाला गुन्यांव नोंद करून पुलिसांनी सोमारा दोगांय आरोपींक अटक केली. तांकां वास्कोच्या न्यायालयांत हाजीर केले तेन्ना, न्यायालयान चार दिसांची पुलीस बंदखण दिली. वास्कोचे पुलीस निरीक्षक वैभव नायक हांच्या मार्गदर्शना खाला हेड कॉन्स्टेबल हेमंतकुमार गोसावी फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
