भांगरभूंय | प्रतिनिधी
पणजीः चित्रकला शिबिरां मजगतीं चित्रकारां मदीं वैचारीक मंथन आनी आदान-प्रदान जाता अशें मत नामनेचे रंगकर्मी आनी नाट्यकर्मी श्रीधर कामत बांबोळकार हांणी उक्तायलें. ते काल फोंड्यां बांबोळकार कला दालनात पांच दिसांच्या चित्रकला शिबिराच्या समारोप सुवाळ्यांत उलयताले. सरकारी तशेंच हेर पांवड्यार चित्रकलेक आनी रंगकलेक अदीक उर्बा मेळूंक जाय अशें तांणी सांगलें. हे वरवीं समाजीक भलायकी घटमूट उरूंक पावतली अशी आस्त तांणी उक्तायली. अमूर्त चित्रकलेचे म्हान चित्रकार आनी गोंयचे पूत वासुदेव गायतोंडे हांच्या जल्मशती वर्सा निमतान सरकारान तांचे कले विशीं जागृताय घडोवन हाडपाक अदीक कार्यावळी घडोवन हाडपाची गरज तांणी उक्तायली.
कले विशींची जागृती वाडपाक जाय अशें गोवा विद्यापिठाचे प्रा. युगांक नायक हांणी मुखेल सोयरे ह्या नात्यान उलयतना सांगलें. आमच्या देशांत कलेची जागृती इतली वाडची की सरकारान केंद्रीय प्रशासकीय सेवे सारकी केंद्रीय संस्कृती सेवा सुरू करची जाची आज गरज आसा अशें मत तांणी मांडलें. जंय कला फुलत आसा तो समाज वयर वचत रावता अशें सांगतना तांणी हेर कांय प्रगत देशांच्यो देखी दिल्यो.
शब्द, रंग आणि स्वर हांची आंतर जोडणी आनी नातें आसता आनी लेखकांनीय चित्रकलेचो रूच घेत आपल्यो कला जाणिवो समृध्द आनी धारदार करपाक जाय अशें नामनेचे साहित्यीक आनी कोशकार मुकेश थळी हांणी मानाचे सोयरे ह्या नात्यान उलयतना सांगलें. कलेच्या अभिव्यक्तींत सातत्य जाय आनी अशें सातत्य आनी योगदान रंगकर्मी ह्या नात्याने श्रीधर कामत बांबोळकार हांणी रंगमंच व रंगाकृती हांकां दिलां अशें थळी हांणी सांगलें. आपणाक चित्रकारां कडल्यान कले विशींची नवीच माहिती मेळ्ळी आनी चित्रां रंगयतना तांकां पळोवपाचो अणभव सोबीत आशिल्लो अशें ताणी सांगलें.
श्रीनिवास शास्त्री (कर्नाटक) व शरद तरडे (पुणे) ह्या चित्रकारांनी आपले शिबिरांतले अणभव सांगलें. नागेश सरदेसाय हाणी सुत्रनिवेदन केलें.
सगळ्या चित्रकारांक मानेस्तांचे हस्तुकीं प्रमाणपत्रां आनी यादचिन्नां भेटयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
