भांगरभूंय | प्रतिनिधी
समाजीक कार्यकर्त्यांनी काडलो मशाल मोर्चा; पुलिसांक निवेदन सादर
दिवचल: कोळशेकातर कारापूर हांगासरली वासंती सालेलकार हांकां विजेचो शॉक लागून आयिल्ल्या मरण प्रकरणांत घातपात आशिल्ल्याचो दुबाव उक्तावन वासंती हांकां न्याय मेळचो हे मागणे खातीर व्हड संख्येन लोकांनी कारापूर सावन दिवचल पुलीस स्टेशना मेरेन मशाल मिरवणूक काडून शक्तीप्रदर्शन केलें.
वासंती सालेलकार हांच्या जिवाक त्यो रावत आशिल्ल्या मालमत्तेच्या प्रकरणाक लागून पयली सावनूच घात आशिल्लो. हे विशीं तांणी वेळावेळार पुलीस स्टेशनार कागाळी लेगीत नोंद केल्ल्यो. ताची चवकशी आनी तपास करून तांकां जिवे मारपाचो यत्न करपी आनी धमकावपी दुबावीत लोकांचो बंदोबस्त करपाक दिवचल पुलीस उणें पडिल्ल्याचो ठपको ह्या वेळार हाजीर आशिल्ल्या लोकांनी दवरलो.
ह्या प्रकरणांत दिवचल पुलिसांनी कोणाच्याच चेपणा खाला येनासतना खोलायेन चवकशी करपाची आनी सत्य मुखार हाडचें. वासंती हांकां लागिल्लो विजेचो शॉक हो कसलेच तरेचो अपघात नासून हो पूर्वनियोजीत कट आसा असोय दावो ह्या वेळार हाजीर आशिल्ल्या लोकांनी केलो.
कोळशेकातर कारापूर हांगा एका मालमत्तेंत आपल्या ल्हानशा घरांत रावपी वासंती सालेलकार हांचो ह्या मालमत्तेच्या भाटकारा कडेन संघर्श सुरू आशिल्लो. ह्या मालमत्तेचें प्रकरण न्यायप्रविश्ठ आशिल्लें. न्यायालयांत खटलो सुरू आसतनाच वासंती हांकां लायटीचो शॉक लागून अचकीत मरण येवप ही गजाल समर्थनीय वा अस्विकारार्ह आसा. तांचो घातपातच जाल्ल्याचो दावो विवीध समाजीक कार्यकर्ते आनी तांच्या घरच्यांनी केल्लो. वासंती हांचेर हाचे पयलीं लेगीत त्याच मालमत्तेंत खूबशे फावटी जिवघेणे हल्लेय जाल्यात. त्यो उदक वापरीत आशिल्ल्या बांयंत विखाचोय प्रयोग केल्लो. तेच बराबर तांच्या घरा कडल्या वाठारांत सुवातेच्या धनया कडल्यान बावन्सर धाडून तांकां धमकायताले.
ह्या प्रकरणाच्यो सगल्यो कागाळी दिवचल पुलीस स्टेशनार वासंती सालेलकार हांणी दिल्ल्यो. पूण ताचेर कसलीच कारवाय कित्याक जाली ना? असो प्रस्न ह्या वेळार हाजीर आशिल्ल्या लोकांनी केलो. कागाळीत नमूद केल्ल्या व्यक्तींचीं नांवां लक्षांत घेवन त्या वक्तींक एकदां तरी दिवचल पुलिसांनी पुलीस स्टेशनार चवकशे खातीर आपयिल्ले? तांची केन्ना चवकशी केल्ली? अशेय प्रस्न ह्या वेळार पुलिसांक हाजीर आशिल्ल्या लोकांनी विचारलो.
ह्या वेळार काँग्रेस महिला प्रदेश अध्यक्ष प्रतिक्षा खलप, युवा फुडारी अँड. अजय प्रभुगांवकार, मारियानो फिदाल्ग, रामकृष्ण जल्मी, अश्विन चोडणकार, बाबाजी गांवकार, स्वप्नेश शेर्लेकार, विनोद धुरी, आकाश सातर्डेकार, ओमप्रकाश कवळेंकार, जयंत कवळेंकार आनी हेरांची हाजेरी आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
