भांगरभूंय | प्रतिनिधी
आयतारा काडटले मशाल मिरवणूक
दिवचलः कारापूरच्या वासंती सालेलकार हिका शाॅक लागून अपघाती मरण आयलां, अशें दिसलें तरी तिचो खून जाल्ल्याची भिरांत थळावे गांवकार आनी काय समाज वावुरप्यांनी उक्तायला. जमनी कडेन संबंदीत प्रकरणाक लागून हो घातपात जाला, असो दुबाव व्यक्त जाता.
वासंतीचेर हाचे पयलीं जायते फावट हल्लो जाला. तिच्या कुटुंबाक न्याय मेळचो हे खातीर मुळा सावन सगल्या प्रकरणांची पुराय चवकशी करप गरजेचें. तिच्या कुटुंबाक न्याय मेळचो हे मागणे खातीर ह्या आयतारा 7 तारखेक सगळ्या पक्षांतले वावुरपी, थळावे लोक आनी समाज वावुरप्यांचे हाजिरेंत वासंतीच्या घरा सावन दिवचल पुलीस स्टेशना मेरेन भव्य मशाल मिरवणूक काडटले. ही म्हायती समाजीक वावुरपी अॅड. अजय प्रभुगांवकार, स्वप्नेश शेर्लेकार, दिलीप गांवस, रामकृष्ण जल्मी, विनोद धुरी, हर्षा वाडकार, गौरेश घाडी, सिद्धार्थ बांदोडकार, हरि गावडे, किशोर दिवकार, अश्विन चोडणकार हांणी दिवचले घेतिल्ले पत्रकार परिशदेंत दिली.
वासंतीक शॉक लागलो अशें म्हण्टात तरी उपरांत घडिल्ल्या घडणुकांचो क्रम पळयल्यार तिका घातपात जावन मरण आयिल्ल्याचो दुबाव आसा. देखून सरकारान मुळा सावन ह्या प्रकरणाची चवकशी करपाची गरज आसा अशें अजय प्रभु गांवकार, स्वप्नेश शेर्लेकार हांणी स्पश्ट केलें.
हे बायलेक खरोच शॉक लागलो कांय तिका शॉक दिलो हें विशीं चवकशी जावंक जाय. आयतारा 7 डिसेंबराक कारापूर, सांखळे, दिवचल आनी गोंयांतल्या हेर नागरिकांनी सांजवेळा 6 वरांचेर सालेलकार हांच्या घरा जमून मशाल मिरवणुकेंत वांटो घेवचो असो उलो मारला. दोतोरांच्या पंगडान बेगोबेग पोस्टमॉर्टम करून अहवाल जाहीर करचो अशी मागणीय ह्या समाजीक वावुरप्यांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
