भांगरभूंय | प्रतिनिधी
थळावो आंबो बाजारांतल्यान गायब; गोंया भायल्या आंब्यांचो मार्केटाचेर शेक
भांगरभूंय । प्रतिनिधी
वाळपयः पावस तेंकला. ताका लागून मंगळारा वाळपयच्या सप्तकी बाजारांत लोकांनी पुरुमेंता खातीर व्हड प्रमाणांत गर्दी केल्ली.
पावसाळ्या खातीर लोकांनी खारीं, सुकी मिरसांग, मसाले व्ड प्रमाणांत खरेदी केले. अजापाची गजाल म्हणल्यार सत्तरी म्हालांत व्हड प्रमाणांत आंबो पिकता, तरी लेगीत सत्तरीचो आंबो बाजारांतल्यान गायब आशिल्लो. ताचे सुवातेर कर्नाटक, आंध्र प्रदेश, तामीळनाडू, केरळ ह्या राज्यांतल्यो आंबो व्हड प्रमाणांत दिसतालो.
सप्तकी बाजारांत सुकी मिरसांग 300 ते 500 रुपया किलो मेळटाली. मात ती गांवठी मिरसांग न्हय जाल्यार कर्नाटकांतली मिरसांग विकपाक आयिल्ली. पावला पावलार मिरसांगाच्यो राशी दिसताल्यो. हे संबंदांत मिरसांग विकपी अब्दुल्ला सराफ हांणी सांगलें, ही कर्नाटकांतली मिरसांग. हे मिरसांगेक गोंयांत व्हड मागणी आसता. ह्या मिरसांगेच्या माध्यमांतल्यान गोंयांत लाखांनी रुपयांची उलाढाल जाता. अंदूं मिरसांगेचो दर इल्लो वाडला, पूण म्हारगायेचे तुळेंत तो समाधानकारक आसा.
पावसाळ्यांत ताजें नुस्तें मेळप भोवकठीण. हे खातीर चडशे गोंयकार पावसाळ्या खातीर खारी घेवन दवरतात. वाळपय बाजारांत खारीं व्हड प्रमाणांत आयिल्लीं. बांगडो, धोडयारो, खापी, गालमो, सुकी सुंगटां हाची खरेदी करपाक गिरायकांनी पसंती दिल्ली. गोंयांत सध्या आंब्यांचो मोसम चालू आसा. अंदूं जे तरेन आंबे चवरिल्ले ते पळयत जाल्यार अंदूं आंबो सर्वसामान्यांक परडटलो अशेंच दिसतालें. पूण हो अदमास सामकोच चुकलो. कारण मंगळारा भरिल्ल्या सप्तकी बाजारांत थळाव्या आंब्यांचे सुवातेर दुसऱ्या राज्यांतल्या आंब्यांनी शेक मेळयिल्लो दिसलो. थळावो मानकुराद, केशर, रत्ना, आम्रपाली, मालदेश, हापूस हो आंबो बाजारांतल्यान गायब आशिल्लो. ताची सुवात कर्नाटक, आंध्र प्रदेश, तामीळनाडू, केरळ ह्या राज्यांतल्या आंब्यांनी घेतिल्ली. हे आंबे 150 ते 200 रुपया किलो ह्या दरान मेळटाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
