भांगरभूंय | प्रतिनिधी
सत्तरी जागृती युवा मंचान घेतली नगराध्यक्षाची भेट
वाळपय: उदकाचीं पायपां घालपा खातीर वाळपय शारांत जाग्याजाग्यांनी पडिल्लीं फोंडकुलां सद्यातरी सर्वसामान्य लोकांच्या जिवाक घात निर्माण करपीच आसात. हे विशीं सर्वसामान्य नागरिकांनी खर तिडक उक्तायल्या. जाग्याजाग्यांनी फोंडकुलां खणल्यांत. तीं पुरोवपा खातीर खूब उशीर करतात. हाका लागून अपघात वाडल्यात. हे खातीर सत्तरी जागृती युवा मंच संस्थेन निरशेणी उक्तायल्या. हे विशीं संस्थेचे अध्यक्ष विश्वेश प्रभू आनी वांगडी विशांत कांसार हांणी नगराध्यक्षाची भेट घेवन विस्तारान चर्चा केली.
म्हायती प्रमाण भुंयगत वीज वाहिन्यांचे केबल घालप आनी उदकाचीं पायपां घालपा खातीर खूबशे कडेन भौशीक रस्त्यांचेर फोंडकुलां खणपाचें काम केलां. हे खातीर रस्ते घातक जाल्यात. रस्त्याचे कुशीक खणिल्लीं फोंडकुलां पुरोवपा खातीर कळाव करतात. थंय सुचोवणेचो फलक लेगीत लायनात. हाका लागून नागरिकांच्या जिवाक घात निर्माण जाला.
मजगतीं, वाळपय शारांत सेगीत निर्माण जावपी येरादारीचे कोंयडे खातीर सत्तरी जागृती युवा मंचान हाची रोखडीच दखल घेवन ऑगस्ट म्हयन्यांत दिवचल येरादारी खात्याच्या अधिकाऱ्यां कडेन संपर्क सादून ह्या प्रकरणांत लक्ष दिवपाची मागणी केली अशी म्हायती विश्वेश प्रभू आनी विश्रांत कांसार हांणी दिली.
रस्त्याचे खूबशे कडेन खणिल्लीं फोंडकुलां दुचाकी चालकांक घाताचीं थारल्यांत. पयर मंगळारा सांजवेळा एक दुचाकी चालक ह्या फोंडकुलांत पडून अपघात जालो. अशे तरेचे अपघात फाटल्या कांय दिसांनी जायत आसात अशें विश्वेश प्रभू हांणी सांगलें.
मजगतीं सत्तरी जागृत मंचान वाळपयच्यो नगराध्यक्षा प्रसन्न गांवस हांची भेट घेवन ह्या प्रकरणांत लक्ष घालचें अशी विनंती केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
