भांगरभूंय | प्रतिनिधी
कर्मचाऱ्यां आड वाळपय पुलीस स्टेशनार गुन्यांव नोंद
वाळपय: मेडी प्रायम ह्या फार्मासीच्या वेव्हारांतल्यान 12 लाख रुपयांचो गैरवेव्हार केल्ल्या प्रकरणांत पुलिसांनी कर्मचारी हिना खान (नाणूस सत्तरी) हिचे आड गुन्यांव दाखल केला. 12 लाख रुपयांच्या गैरवेव्हारांत तिचो थेट संबंद आशिल्ल्याचें मेडी प्रायम ह्या आस्थापनाच्या धनयान केला. हे विशींची कागाळ वाळपय पुलीस स्टेशनार दाखल केले उपरांत तिचे आड गुन्यांव दाखल केला.
वाळपय मेडी प्रायम नांवाची फार्मासी फाटल्या कांय वर्सां सावन कार्यरत आसा. हे फार्मासीचो वेव्हार सांबाळपी हिना खान हाणें दर दिसा येता ती रोख रक्कम फार्मासीच्या बँक खात्यांत जमा करपा बदला आपल्या स्वताच्या बँक खात्यांत जमा केली.
हे विशीं तपासणी केले उपरांत फार्मासीच्या बँक खात्यार अपेक्षे परस उणें पयशे आयिल्ल्याचें दिसून आयलें. उपरांत चवकशी केले उपरांत फार्मासींतल्यान येवपी रोख रक्कम खात्यार जमा जायनासतना दुसऱ्याच खात्यार जमा जायत आशिल्ल्याचें स्पश्ट जालें. खोलायेन चवकशी केले उपरांत हे विशींची कागाळ वाळपय पुलीस स्टेशना कडेन दाखल केल्या.
ह्या फार्मासीचो वेव्हार पळोवपी हिना खान हाचे कडल्यान हो गैरवेव्हार जाल्ल्याचें आस्थापन धनयाचें म्हणणें आसा. हाका लागून हे विशींचो गुन्यांव वाळपय पुलीस स्टेशनार दाखल केला.
वाळपय पुलीस स्टेशनाचे निरिक्षक विद्देश शिरोडकार हांच्या मार्गदर्शना खाला उपनिरिक्षक खुशाली नायक फुडलो तपास करतात.
आस्थापनाच्या धनयान दिल्ले म्हायती प्रमाण हे विशीं सदर कर्मचाऱ्याच्या बँक खात्याची तपासणी केली तेन्ना मजगतच्या कार्यकाळांत सदर खात्यार दर दिसा रोख रक्कम जमा जाल्ल्याची म्हायती उपलब्ध जाल्या. हाका लागून ह्या फार्मासीची रोख कंपनीच्या खात्यार जमा करपा बदला आपल्याच खात्यार जमा केल्ल्याचें स्पश्ट जालां अशें ह्या वेळार आस्थापनाच्या धनयान हे विशींची अदीक म्हायती दितना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
