भांगरभूंय | प्रतिनिधी
वाळपय: वाळपय भौशीक गणेशोत्सव मंडळाच्या देणगी कुपनांचो शुभारंभ भलायकी मंत्री विश्वजीत राणे हांचे हस्तुकीं जालो. ह्या वेळार मंडळाचे अध्यक्ष समीर मणेरकार आनी मंडळाचे हेर वांगडी हाजीर आशिल्ले.
पणजेंत आयोजीत केल्ले कार्यावळींत उलयतना विश्वजीत राणे हांणी वाळपय मंडळाच्या वट्ट कार्याचो भोवमान केलो. समाजाचे उदरगती खातीर खूबशा प्रकारचे उपक्रम राबयत आसतात. लोकमान्य टिळकांनी भौशीक गणेशोत्सव मंडळाची संकल्पना म्हुर्तरुपांत हाडली. उपरांत आयज देशांत खूबशा सुवातांनी भौशीक गणेशोत्सव मंडळ वेगळ्यावेगळ्या उपक्रमांच्या माध्यमांतल्यान गणेशोत्शव मनयतात अशें तांणी म्हणलें.
वाळपय भौशीक गणेशोत्सव मंडळान आतां मेरेन खूबशो समाजा खातीर कार्यावळी राबयल्यो. तांकां बरो प्रतिसाद मेळ्ळो. दर वर्सा ते शांलांत परिक्षेंत गुणेस्त विद्यार्थ्यांचो भोवमान करीत आसतात. तेच प्रमाण वेगळ्यावेगळ्या मळार वावुरिल्ल्या मानेस्तांचो भोवमान करतात. ह्या मंडळा फाटल्यान आपूण खंबीरपणान उबो रावतलों. सत्तरी म्हालांत समाज विकासाक चालना मेळपाचे नदरेंतल्यान मंडळान आपलें कार्य सुरूच दवरचें अशी विनंती ह्या वेळार राणे हांणी केली.
ह्या वेळार वाळपय नगरपालिकेच्यो नगराध्यक्षा सेहझीन शेख हाजीर आशिल्ल्यो. तांणी ह्या वेळार आपली प्रतिक्रिया उक्तायतना मंडळान आतां मेरेन बरें कार्य केलां. वाळपय नगरपालिकेक तांकां बरे तरेचें सहकार्य मेळत आसता. सर्व धर्म समभाव सांबाळपाचे नदरेंतल्यान मंडळाचें कार्य आदर्श घेवपा सारकें आसून हेर मंडळांनी ह्या मंडळाचो आदर्श घेवचो अशें तांणी म्हणलें.
ह्या वेळार मंडळाचे पदाधिकारी विशांत कुडतरकार, कृष्णा नार्वेंकार, रुद्रेश मणेरकार, धर्मेंद्र साळुंखे, संजय हळदणकार, रुपेश दातये, ओंकार परब बी मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
