भांगरभूंय | प्रतिनिधी
मंत्री विश्वजीत राणे हस्तुकीं भौशीक गणेशोत्सव मंडळाच्या कुपनांचो शुभारंभ
वाळपय: वाळपय भौशीक गणेशोत्सव मंडळाचें काम समाजा खातीर उर्बा दिवपी आशिल्ल्यान मंडळाच्या कार्याचो आदर्श हेर मंडळांनी घेवचो अशें आवाहन भलायकी मंत्री तशेंच वाळपय मतदारसंघाचे आमदार विश्वजीत राणे हांणी केलें. भौशीक गणेशोत्सव मंडळाच्या अंदूंच्या कुपनांचो शुभारंभ तांचे हस्तुकीं जालो.
वाळपयच्या तांच्या कार्यालयांत आयोजीत केल्ले एके कार्यावळींत उलयतना मंत्री विश्वजीत राणे हांणी मंडळाच्या कार्याची तोखणाय करून परबीं भटयलीं.
महोत्सव मनोवपा बरोबरच शिक्षणीक पांवड्यार भुरग्यांक वेगवेगळ्या कार्यावळींतल्यान प्रोत्साहन दिवपाचें काम हें मंडळ करता. तेच प्रमाण अर्थीक नदरेन गरजूंक मजतीचो हात दिवन तांकां मजत करता. हें काम खर्यांनीच समाजा खातीर फायद्याचें आसा. आयज सत्तरी म्हालाचे एकंदर उदरगतींत जायत्या घटकांचो सकारात्मक वांटो आसा. हातूंत भौशीक गणेशोत्सव मंडळाचें योगदान विसरूंक फावना, अशें मंत्री राणे हांणी म्हणलें.
आतां मेरेन ह्या गणेशोत्सव मंडळांक आपणें सहकार्य केलां. येवपी काळांतूय ह्या गणेशोत्सव मंडळा फाटल्यान खंबीरपणे उबें रावपाचें आस्वासन राणे हांणी दिलें.
ह्या वेळार गोंयचे आदले उपसभापती तांच्या स्थायी समितीचे अध्यक्ष नरहरी हळदणकार, अंदूंच्या गणेशोत्सव मंडळाचे अध्यक्ष राजेश रायकार, मंडळाचे विवीध पदाधिकारी हाजीर अशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
