भांगरभूंय | प्रतिनिधी
पालीच्यान रस्तो येरादारी खातीर उक्तो; अवजड वाहनांक मात मनाय
भांगरभूंय । प्रतिनिधी
वाळपयः वाळपयकारांक बेळगांवां वचपा खातीर आतां फक्त 70 किलोमिटर अंतर हुंपचें पडटलें. ठाणे पंचायतींतल्या पाली मार्गान रस्तो पुराय जाला. ताका लागून लोकांची बरी वेवस्था जाल्या.
हो रस्तो येरादारी खातीर उक्तो केलो, मात ह्या मार्गा वयल्यान अवजड वाहनांक पुराय बंदी घातल्या. अशी तरेची येरादारी केल्यार तांचेर कारवाय करतले, अशें म्हादय अभयारण्याच्या अधिकाऱ्यांनी स्पश्ट केलां.
पाली मार्गान रस्त्याची सुविधा दिल्ल्यान ठाणे पंचायतींतल्या सुर्ला गांवांत आतां सहजतायेन वचपाक मेळटलें. सुर्ला गांव ठाणे पंचायतींत घातला. मात पंचायतीच्या कार्यालयांत वचपा खातीर गांवच्या लोकांक केरी मार्गान वचपाचें पडटालें. ताका लागून तांकां सुमार 35 किलोमिटर अंतर हुपचें पडटालें. ह्या रस्त्याक लागून हें अंतर सामकेंच उणें जालां.
वाळपय शारांतल्यान सुर्ला वा बेळगांवां वचपा खातीर हो रस्तो खुबूच फायद्याचो थारपी आशिल्ल्यान तो पुराय बेगिनात बेगीन पुराय करचो, अशी मागणी थळाव्या लोकांनी केल्ली. हे खातीरचो प्रस्तावूय तयार केल्लो. दोन पांवड्यांनी ह्या प्रस्तावाक मंजुरी मेळिल्ली. पयल्या पांवड्यार अर्द्या रस्त्याचें डांबरीकरण केल्लें. दुसऱ्या पांवड्यार पेव्हर्स घालून उरिल्लो रस्तो पुराय केला. पाली जंक्शन ते जांबळी मेरेनच्या ह्या 4 किलोमिटरांच्या रस्त्याचेर 4 कोटी रुपया खर्च केल्यात.
ह्या रस्त्याक लागून वाळपयच्या लोकांक कोपाड्डें, पाली, जांबळीचें तेंब ते उपरांत चोर्ला, कणकुंबी, जांबोटी आनी बेळगांव ह्या वाठारांनी वचपाक मेळटलें. हो रस्तो जावचे आदीं वाळपयच्यान बेळगांवां वच्चे खातीर होंडा, मोर्ले, केरी, जांबळीचें तेंब, चोर्ला, कणकुंबी, जांबोटीच्यान बेळगांवां वच्चें पडटालें. ह्या नव्या रस्त्याक लागून सुमार 25 किलोमिटर अंतर उणें जालां.
हो रस्तो म्हादय अभयारण्याच्या वाठारांत येता. ह्या रस्त्याचेर व्हड चडाव आनी घातक देंवती आशिल्ल्यान अवजड वाहनांक पुराय बंदी घातल्या. सुमार दोन किलोमिटर रस्त्याचेर पेव्हर्स घातल्यात. अवजड वाहनांची येरादारी जाली जाल्यार हो रस्तो पेड्डेर जावपाची शक्यताय आसा. ह्या रस्त्या वयल्यान फक्त प्रवासी येरादारी करपाक मेळटली, अशें रान अधिकाऱ्यांचें म्हणणें आसा.
सुमार तीन म्हयन्यां आदीं ह्या रस्त्याच्या कामाक थळावी आमदार डॉ. देविया राणे हांचे हस्तुकीं सुरवात जाल्ली. ते उपरांत कंत्राटदारान झुजां पावड्यार काम करून हो रस्तो पुराय केलो.
नव्या रस्त्याक लागून उदरगतीक चालनाः डॉ. राणे
नव्या रस्त्याक लागून ह्या वाठारांतले भौशीक उदरगतीक चालना मेळटली. चड करून सुर्ला गांव हो ठाणे पंचायत वाठारांत येता. थंयच्या लोकांक पंचायत कार्यालयांत येवचे खातीर तशेंच वाळपय वाठारांत येवचे खातीर ह्या रस्त्याचो बरो उपेग जातलो. पावसाळ्यांत चोर्ला घांट वाठारांत दोळ्यांत भरपा सारकी सोबीतकाय आसता. ह्या रस्त्याक लागून सैम पर्यटनाचो आनंद घेवपाची संद वाळपय आनी हेर वाठारांतल्या लोकांक मेळटली. तशेंच सुर्ला वाठारांत व्हड प्रमाणांत घसघशे कोसळटात. सुर्लाचो घसघसो जाल्यार सामकोच दोळ्यांत भरता, अशें डॉ. देविया राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
