भांगरभूंय | प्रतिनिधी
प्राचार्याक मेळपाक वेवस्थापनाची पालकांक मनाय; पालकांची गंभीर परिणामांची शिटकावणी
भांगरभूंय । प्रतिनिधी
वाळपयः वाळपय नवोदयाच्या विद्यालयांत प्रवेश परिक्षे संबंदांत निर्माण जाल्लो घुस्पागोंदळा विशीं जाब विचारपा खातीर आनी पुराय म्हायती घेवचे खातीर गेल्ल्या पालकांक विद्यालयाच्या वेवस्थापनान प्राचार्यान मेळपाक मनाय केली. पालकांक गेटीचेर आडायले. ताका लागून हो वाद परतून पेटपाची शक्यताय निर्माण जाल्या. विद्यालयाच्या वेवस्थापना कडल्यान अशे तरेची कृती करप म्हणल्यार केल्ली चूक धांपून दवरपाचो यत्न करप, असो आरोप पालकांनी केला. त्या 25 भुरग्यांक प्रवेश दिलो जाल्यार ताचे गंभीर परिणाम भोगचे पडटले, अशी शिटकावणी पालकांनी दिल्या.
जवाहर नवोदय विद्यालयांत यत्ता सवेच्या वर्गा खातीर प्रवेश चांचणी परिक्षेंत महाराष्ट्रांतल्या वट्ट 25 भुरग्यांक प्रवेश दिला. बनावट कागदपत्रां तयार करून तांकां प्रवेश दिला, असो पालकांचो आरोप आसा. हे विशींची म्हायती मेळटाच पालकांनी आक्रमक भुमिका घेतली आनी त्या 25 भुरग्यांक प्रवेश दिलो जाल्यार ताचे गंभीर परिणाम भोगचे पडटले, अशी शिटकावणी दिली.
हे संबंदांतलें निवेदन सत्तरी म्हालाच्या मामलेदाराक दिलां. तांणी हे संबंदांत विशेश लक्ष घालपाचें आस्वासन दिल्लें. ते खातीर थारावीक मुजत लेगीत दिल्ली. ती मुजत सोंपले उपरांत आनी प्रवेश चांचणी परिक्षेंत ज्या भुरग्यांची निवड जाल्या, तांकां रितसर प्रवेश दिवपाची प्रक्रिया 18 एप्रीलाच्यान सुरवात जाल्या. ताका लागून सादर केल्ल्या निवेदना विशीं सविस्तर म्हायती समजून घेवचे खातीर पालकांनी प्राचार्यांची भेट घेवपाचो शेनवारा यत्न केलो. मात पालकांक गेटीचेर आडायले.
विद्यालयाच्या बऱ्या खातिरूच पालकांनी ही आक्रमक भुमिका घेतल्या. राबितो दाखलो, जल्म प्रमाणपत्र, शाळेचें प्रमाणपत्र अश्या बनावट कागदपत्रां वरवीं महाराष्ट्रांतल्या वट्ट 25 भुरग्यांक प्रवेश दिला. ताका लागून उत्तर गोंयांतल्या भुरग्यांचेर अन्याय जाला. ही शाला पुराय निवासी स्वरुपाची आसा. ताका लागून गरजेचे नेम पाळून भुरग्यांक प्रवेश दिवप गरजेचें आसा. थळाव्या भुरग्यांचेर अन्याय करून दुसऱ्या राज्यांतल्या भुरग्यांक बेकायदेशीर तरेन प्रवेश दिवपाचो केल्लो यत्न खऱ्यांनीच दुर्दैवी आसा. ह्या प्रकरणांत व्हड प्रमाणांत अर्थीक वेव्हार जाल्ल्याचो आरोप पालक सागर सावंत हांणी केलो.
परवानगे बगर प्राचार्याक मेळपाक मेळना
शाळेच्या वेवस्थापना कडेन हे संबंदांत संपर्क केलो. त्या वेळार तांणी सांगलें, प्राचार्याक मेळपा खातीर पालकांक उपजिल्होधिकाऱ्याची परवानगी घेवप सामकी गरजेची आसा. परवानगे बगर शाळेच्या आवारांत प्रवेश करचो न्हय, ह्या उपजिल्होधिकाऱ्याच्या आदेशाची अंमलवजावणी केल्या. पालकांक मनाय करूंक ना. उपजिल्होधिकाऱ्यान परवानगी दिली जाल्यार ते निश्चीत प्राचार्याक मेळपाक शकतात, अशें वेवस्थापनान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
