भांगरभूंय | प्रतिनिधी
वाळपय: जायते फावट रस्त्याचेर अपघात घडटात. हाका लागून गोरवां जखमी जायत आसतात. अपघातांक लागून आतां मेरेन जायत्या गोरवांक मरण आयलां. तांचेर रोखडोच उपचार केल्यार तांचो जीव वाटावपाक शकता. हेच फाटभूंयेर वाळपय गोशाळा संवर्धन केंद्रान गोरवांच्या उपचारा खातीर खास उपचार मोबायल वाहन वेवस्था सुरू केल्या. ह्या वाहनांतल्यान जखमी जाल्ल्या गोरवांक गोशाळेंत व्हरतात आनी थंय तांचेर उपचार करतात. हे विशीं केंद्रान खास नंबर जारी केला. जखमी गोरवां दिल्यार ८३०८५ ०४७ ५५ ह्या नंबराचेर संपर्क करपाचो उलो केंद्राचे मुखेली हनुमंत परब हांणी मारला.
आतां मेरेन हे उपचार पद्धतीक लागून जायत्या गोरवांचो जीव वाटावप शक्य जालां. जायते फावटीं वाहन चालकांक ताचो फटको बसत आसता. रस्त्यावेल्या अपघातांक लागून आतां मेरेन जायत्यो दुचाकी आनी चार चाकी वाहन चालकांक मरणूय आयलां. हाका लागून वाळपय गोसेवन केंद्रान मोबायल उपचार वाहनाची वेवस्था केल्या. सरकारा वरवीं हें वाहन केंद्रांत दाखल जालां. ताची सेवा जारी केल्या. फाटल्या आठ दिसांनी आठ जखमी गोरवांचेर उपचार केल्यात. हाका लागून नागरिकांनी अपघात जाल्लीं वा जखमी गोरवां दिसल्यार वयर दिल्ल्या नंबराचेर संपर्क करचो अशी मागणी केंद्रान केल्या.
गोसंवर्धन केंद्र, पशुवैजकी अधिकारी तांचेर उपचार करतात. आतां मेरेन जायतीं जखमी गोरवां ह्या केंद्रांत उपचार घेत आसतात. जायते जाण सेवेप्रती गट संवर्धन केद्राक अर्थीक मजत करतात. हाका लागून जायत्या गोरवांचो जीव वाटवता. हाका लागून नागरिकाञनी सहकार्य करपाची मागणीय केंद्रान केल्या.
मजगतीं, वयल्या फोन नंबराचेर संपर्क केल्यार बेगोबेग तें वाहन घडणुके सुवातेर दाखल जातलें आनी जखमी गोरवांचेर थंयच उपचार करतले. ना जाल्यार जखमी गोरवांक केंद्रांत हाडून ताचेर उपचार करतले अशें परब हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
