भांगरभूंय | प्रतिनिधी
उपाय काडपाक पालिका मंडळ अपेशी; येरादारी पुलिशे सयत सरकारी यंत्रणा अपेशी जाल्ल्याचें स्पश्ट
भांगरभूंय । प्रतिनिधी
वाळपयः वाळपय शारांतले येरादारी कोंयडीचो विशय दिसान दीस गंभीर जावपाक लागलाफाटल्या कांय वर्सां सावन हे कोंयडीक लागून अपघाताचें सत्र वाडपाक लागलां. 15 एप्रीलाक सकाळीं वाळपय शारांत जाल्ल्या ट्रक आनी दुचाकी हांचे मदल्या अपघातांत एकलो जखमी जालो. हे कोंयडी संबंदांत पालिका वा सरकारची संबंदीत यंत्रणा उपाय येवजण करपाक अपेशी थारिल्ल्याचें स्पश्ट जालां. हे खातीर थळाव्या लोकांनी खर तिडक उक्तायल्या. जे मेरेन येरादारी नियोजन आराखड्याची अंमलबजावणी जायना ते मेरेन शारांतल्या नागरिकां मुखार अशो साबार समस्या फुडारांत निर्माण जावपाची शक्यताय आसा. म्हत्वाचें म्हणल्यार येरादारीचे कोंयडीक लागून वाळपय शारांतल्या बाजाराचेर वायट परिणाम जाला. कोंयडीचेर उपाय काडलो ना जाल्यार वाळपयचो बाजार काबार जावन शारा भायल्या बाजाराक गती येतली, अशी प्रतिक्रिया वेपाऱ्यांनी उक्तायल्या.
पालिका मंडळ सुस्त
सुमार दोन वर्सां आदीं वाळपय पालिकेची वेंचणूक जावन नवें पालिका मंडळ सत्तेर आयलें. कोंयडी संबंदांत तें उपाय काडटले, अशी लोकांची अपेक्षा आशिल्ली, पूण ती पुराय चुकीची थारली.
येरादारी कोंयडीचेर विशेश लक्ष दितले, अशें नव्या पालिका मंडळान सुत्रां हातांत घेतले उपरांत सांगिल्लें. ह्या प्रस्नाचेर साबार बसका जाल्यो, पूण निर्णय मात घेवंक ना. पालिका सभाघरांत घेतिल्ल्या बसकांक येरादारी पुलीस खातें, भौशीक बांदकाम खात्याच्या अधिकाऱ्यांनी हाजेरी लायिल्ली. तांणी हे संबंदांत वेगवेगळ्यो सुचोवण्यो केल्ल्यो, पूण त्यो सुचोवण्यो अजून मेरेन कागदाचेरूच आसात. ह्या सुचोवण्यांची अंमलबजावणी करचे आदीं येरादारी आराखड्याची अंमलबजावणी करप गरजेची आसा, पूण ताचेर लेगीत आडनदर केल्या.
जापसालदारकी कोणाची?
वाळपय शारांत दिसान दीस गंभीर जायत चलिल्ली येरादारी कोंयडीची समस्या सुटावी करपाची जापसालदारकी कोणाची, असो प्रस्न नागरिकांनी उपस्थीत केला. वाळपयचो बाजार हो सत्तरी म्हालांतलो म्हत्वाचो बाजार. ह्या बाजारांत खूब गर्दी जाता. सरकारी कामां खातीर लेगीत गांवगिऱ्या वाठारांतल्यान व्हड प्रमाणांत लोक वाळपय येतात. मात वाळपय येताच येरादारीचे समस्येक फुडो करचो पडटा. सकाळच्या आनी सांजेच्या आदेसाक व्हड प्रमाणांत कोंयडी जावप हें आतां सदांचेंच जालां, अशें लोक उलयतात.
अपघात चालूच
वाळपयचे येरादारी कोंयडीचेर उपाय येवजण करूंक नाशिल्ल्यान नेमान ल्हान- व्हड अपघात जातात. म्हत्वाचें म्हणल्यार वाळपय शारांत गाडयो बेशिस्त तरेन दवरतात. ह्या पार्किंगाचेर नियंत्रण दवरपाक अजून मेरेन पुलीस यंत्रणेक शक्य जावंक ना. हे खातीर अपघातांनी वाड जायत चल्ल्या, असो आरोप थळाव्या लोकांनी केला.
बाजाराचेर परिणाम
ह्या वाठाराचे आमदार तशेंच भलायकी मंत्री विश्वजीत राणे हांणी वाळपय पालिकेचे पोरणें इमारतींत मार्केट कॉम्प्लेक्स सुरू केल्लें. थंयच्या आदल्या दुकानकारांक नवे सुवातें दुकानां वितरीत केलीं. तशेंच खूबश्या नव्या दुकानकारांनी आपलो वेवसाय ह्या बाजारांत सुरू केलो. तेचवरी खूबशीं परंपरीक दुकानां थंय वर्सां सावन चलतात. येरादारी कोंयडीचो वायट परिणाम ल्हवू ल्हवू ह्या बाजाराचेर जावपाक लागला. गाडयो दवरपाक मेळना हे खातीर गिरायकांनी ह्या बाजारा कडेन फाट करपाक सुरवात केल्या. दुसरे वटेन ठाणे रस्तो आनी होंडा वटेंतल्या रस्त्याचेर बाजार ल्हवू ल्हवू फुलपाक लागला. कारण थंय गाडयो दवरपाक खूब सुवात आसा. ताचोय परिणाम वाळपय बाजाराचेर जावपाक लागला. जे मेरेन येरादारी कोंयडीचेर उपाय येवजण करिनात ते मेरेन वाळपय शारांतल्या बाजाराचेर वायट परिणाम चालूच उरतले. फुडारांत ल्हवू ल्हवू हो बाजार बंद पडटलो. तशें जालें जाल्यार फाटल्या साबार वर्सां सावन वाळपय शाराच्या बाजारांत वेवसाय करप्यां मुखार उपासमारीची समस्या उप्रासू येता, अशें कांय दुकानकारांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
