भांगरभूंय | प्रतिनिधी
वाळपय: अवर लेडी ऑफ लुर्डस् हायस्कूल वाळपय हांगा महात्मा गांधी आनी लालबहादूर शास्त्री हांची जयंती मनयली. ह्या जयंतीच्या निमतान शाळेचे ज्येश्ठ शिक्षक हरीश कामत हांचें ‘चित्रमय गांधी- विचार आणि घटना’ ह्या विशयाचेर आदारीत प्रदर्शन मांडिल्लें.
ह्या वेळार हाजीर आशिल्ल्या विद्यार्थ्यांक मार्गदर्शन करतना शाळेच्याे सहमुख्याध्यापिका ब्रेंडा हेरिडिया हांणी सगल्यांनी स्वावलंबी जावचें, जेणे करून आमचो समाज, आमचें राज्य आनी आमचो देश स्वालंबी जातलो आनी उदरगत सादतलो अशें सांगलें.
दरेक भारतीयान आपलो स्वातंत्र्य पूर्व कालखंडाचो इतिहास समजून घेवप गरजेचें आसा. आतांचे तरणाटे पिळगेक जर हो इतिहास समजना जाल्यार फुडारांत फुडले पिळगेक हो इतिहास समजुचो ना. हातूंतल्यान स्वातंत्र्या खातीर म्हत्वाचें योगदान दिवपी स्वातंत्र्य सैनिकां खातीर हो अपमान थारतलो. ते खातीर दरेकान स्वातंत्र्या खातीर लढो दिल्ल्या व्हड व्यक्तीमत्वाची म्हायती समजून घेवप काळाची गरज आशिल्ल्याचें ब्रेंडा हांणी मुखार उलयतना म्हणलें.
शिक्षक हरीश कामत हांणी महात्मा गांधी आनी लालबहादूर शास्त्री हांच्यो कांय कथा सांगल्यो. शाळेंतले विद्यार्थी अरीझ शेख आनी सायना सावंत हांणी गांधीजी आनी लालबहादूर शास्त्री हांची म्हायती विद्यार्थ्यांक सांगली. प्रदर्शनांत गांधीजीचे वेगळेवेगळे 96 फोटे तशेंच गांधीजींचे विचार आनी तांचे जिणेंतल्यो मुखेल घडणुको हांची सविस्तर म्हायती मांडिल्ली. शाळेंतल्या विथ्यार्थ्यांनी आनी शिक्षकांनी ह्या प्रदर्शनाचो लाव घेतलो.
शिक्षिका हालीमा शेख हांणी उपकार मानले. ही कार्यावळ येसस्वी करपा खातीर शाळेंतले शिक्षक महेश नायक हांणी हातभार लायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
