वालोर तुका मंगळूरकारा !

भांगरभूंय | प्रतिनिधी

गोंयकारांक संमेलनांत घडये कांय त्रास जाल्ले आसपाक शकतात पूण माटवांत भोंवपी मंगळूरच्या आयोजकांचीं हांसतीं तोंडां पळोवन आनी मंगळूरकार सचिवान आपल्या म्होंवाळ आनी मोवाळ उतरांनी केल्लें उपकाराचें उलोवप आयकून ते त्रास खंयचे खंय नाच्च जाले हें नक्की.\

गेल्ल्या वर्सा अखील भारतीय कोंकणी परिशदेचें 32 वें अधिवेशन मालवण जाले उपरांत ‘शिगमो सोंपलो तरी
पद उरलें’ ह्या माथाळ्या खाला हांवें एक लेख भांगरभूंयेंत बरयिल्लो. तेन्ना म्हाका खबर नाशिल्लें, अखील भारतीय कोंकणी परिशदेच्या जाळवणदारांतलो भाग जावन हांवूय 25 व्या संमेलनाच्या आयोजनांत वांटेकार जातलों.
अखील भारतीय कोंकणी परिशदचें 25 वें साहित्य संमेलन मंगळूरांत 4 आनी 5 नोव्हेंबराक घडून आयलें. अखील भारतीय कोंकणी परिशदचें अधिवेशन वो साहित्य संमेलन घडोवन हाडप हें एक आव्हान. गोंयांत कोंकणी खातीर वावुरपाक मनीसबळ आसून लेगीत तें गोंयांत घडोवन हाडटना आयोजकांक खूब कश्ट घेवचे पडटात. तें जर दुसऱ्या राज्यांनी घेवपाचें जालें जाल्यार हे कश्ट दोबरादीन वाडटात. संमेलन केरळ जावपाचें, पूण परिशदेची अर्थीक परिस्थिती आनी केरळचें उणें मनीसबळ ह्या दोन कारणांक लागून ह्या वर्सा 25 वें संमेलन मंगळूरांत करून फुडल्या वर्सा केरळ करचें असो विचार
मुखार आयलो.
जमता जाल्यार मंगळूरच्या विश्व कोंकणी केंद्राच्या जोड पालवान हें करचें अशें थारलें. तांचे कडेन उलोवन जातकच ह्या वर्सा विश्व कोंकणी केंद्राक विश्व कोंकणी संमेलन गोंयांत घडोवन हाडपाची जापसालदारकी गोंय सरकारान दिल्ल्यान हें संमेलन ताचोच एक भाग म्हणून ताचें आयोजन करचें अशें थारलें. पूण विश्व कोंकणी संमेलनाची तारीख मुखार गेल्ल्यान निमाणें संमेलन मंगळूरांतच करचें अशें थारलें. मंगळूरांतल्या सगल्या संस्थांक परिशदेच्या एका बावट्या खाला हाडून आपलें नांव मुखार काडिनासतना सगल्यां वांगडा रावन विश्व कोंकणी केद्रान देख घालून दिली. हें सगलें घडटा म्हणल्यार ऑगस्ट उलगलो. जें संमेलन जालें ताचो आटाप फकत 40 दिसांत मंगळूरकारांनी घडोवन हाडलो देखून मंगळूरकारांक परबीं फावतात. तेंय बी थळाव्या कांय संस्थां मदलें, मनशां मदलें राजकारण कुशीक काडून 25 व्या संमेलनाक फावो तशें आयोजन मंगळूरकारांनी घडोवन हाडलें म्हण चड परबीं फावतात.
ह्या संमेलनांत कांय निर्णय आयोजकांनी जाणीवपुर्वक घेतले. एक म्हणल्यार प्रत्येक संमेलनांत / अधिवेशनांत कवी संमेलन आयोजीत जातालें ताचे बदला साहित्याच्या हेर प्रकारांचेंय सादरीकरण करपाचेर निर्णय जालो. ह्या सत्रांत कविते वांगडाच विनोदी, ललीत, मोटव्यो कथा ह्या साहित्य प्रकारांचेंय सादरीकरण जालें जाची खूब जाणांनी तोखणाय केली.
दुसरो निर्णय म्हणल्यार साहित्य सादरीकरणाच्या सत्रांत साहित्यिकारांक आपयतना फाटल्या संमेलनांत / अधिवेशनांत वांटेकार जाल्ल्यांचीं नांवां कडेक दवरून साहित्यकारांची निवड केली. देखून कितलेशेच जाण पयले फावटी संमेलनाच्या माचयेर चडले. नवीं तोंडां लोकांनी पळयलीं, तरणाटे कशे तरेन बरयतात ताचीय सुलूस खूब जाणांक लागली.
तिसरो निर्णय म्हणल्यार प्रतिनिधी जावपाक चार तरांचे पर्याय दिले. विद्यार्थ्या खातीर 100 रुपया, जे रातचे रावचे नात त्या थळाव्या लोकां खातीर 500 रुपया, रावपाची सामान्य सोय जाय आशिल्ल्यांक 1000 रुपया आनी रावपाक वातानुकुलीत बरी कूड जाय आशिल्ल्यांक 2500 रुपया. देखून रावपाचे सोयी खातीर परिशदेचेर ‘तुमी तुमच्याच मनशांक रावपाक बऱ्यो कुडी दितात’ हो आरोप ह्या वर्सा जालो ना. दुसरी गजाल म्हणल्यार ह्या निर्णयाक लागून विद्यार्थ्यांची प्रतिनिधी नोंदणी चड जाली.
चवथो निर्णय प्रतिनिधी नोंदणी ऑनलायन करपाचो. ह्या निर्णयाक लागून जांचे मेरेन पावती पुस्तकां पावनाशिल्ल्यान चडशी नोंदणी सकाळीं माटवांत जाताली, ताका लागून प्रतिनिधी नोंदणी कितली जातली हाचो अदमास आयोजकांक येनाशिल्लो. जाका लागून ऐन वेळार आयोजकांचेर रावपाचे बाबतींत, जेवणाचे बाबतींत बरोच ताण येतालो. ह्या वर्सा प्रतिनिधी नोंदणी ऑनलायन आनी पावती काडून जाल्ल्यान माटवांत येवन जाल्ली नोंदणी हाता बोटांर मेजपाची इतलीच आशिल्ली. लागीं लागीं 550 लोकांनी प्रतिनिधी नोंदणी केली जी एक विक्रमी नोंदणी अशें म्हणपाक जाता. इतली नोंदणी जावनूय राबित्यांचे, जेवणाचे बाबतींत आयिल्ल्या लोकांची चड धांदळ जालिना.
पांचवो निर्णय, चडांत चड तरणाट्यांचो आस्पाव माटवांत तशेंच माचयेर आसचो. हाका लागून माटवांत आनी माटवा भायर तरणाटे उमेदीन वावुरतना दिसले. तेच परी परिसंवांदांत, सुत्रनिवेदनांत आनी साहित्य सादरीकरणांत चडशे तरणाटे माचयेर येवन गेले.
सवो निर्णय, परिशदेचे कार्यकारिणीचे सभासद हे First among Equals अशें मानून सगल्यांनी प्रतिनिधी नोंदणी करपाचो. हाका लागून हेरांक सभासद जा म्हण सांगपाचो नितीक अधिकार कार्यकारिणीच्या सभासदांक आयलो. पयलींच्या संमेलनांत / अधिवेशनांत सभासद प्रतिनिधी नोंदणी करनाशिल्ले अशें न्ही, तें इत्सीक आसतालें. पूण ह्या वर्सा सगल्यांनीच नोंदणी केली. देखून परिशदेचेर जो आरोप जातालो, ‘तुमी आयोजक बरे बरे वातानुकुलीत कुडींनी रावतात आनी आमकां सादारणशे कुडींत दवरतात’, तो ह्या वर्सा जालो ना. जण एकल्यान आपल्याक परवडटा / फावो तशी नोंदणी केली.
सातवो निर्णय, जांकां जांकां मानधन, बिलां खातीर पयशे फारीक करपाचे आसात तांकां तेन्नाचे तेन्ना चेक दिवन ते फारीक करपाचे. हाका लागून संमेलन जाले उपरांत कांय दिसां भितर सगली फारकणी जाली. ‘सय घेवन इसीएस करून पयशे फारीक करतां म्हणिल्लें पूण ते जाले नात’ हो आरोप हे फावटी परिशदेचेर जालो ना.
आठवो निर्णय, परिशदेचे जाळवणदार आनी आयोजन समितींतले वांगडी जेन्ना गरज आसता तेन्नाच माचयेर वतले. ताका लागून खुट्याचे माकड कशे बसूनरावपाची पाळी आयोजकांचेर आनी तींच तींच तोंडां पळोवपाची पाळी प्रेक्षकांचेरआयलिना.
जांणी जांणी संमेलनांत वांटो घेतलो. तातूंतल्या चडश्या जाणांनी आयोजकांची तोखणाय केली. भूस बरो दीस बरो म्हणुनूय घडये संमेलन बरें जालें आसत. गोंयकारांक संमेलनांत घडये कांय त्रास जाल्ले आसपाक शकतात पूण माटवांत भोंवपी मंगळूरच्या आयोजकांचीं हांसतीं तोंडां पळोवन आनी मंगळूरकार सचिवान आपल्या म्होंवाळ आनी मोवाळ उतरांनी केल्लें उपकाराचें उलोवप आयकून ते त्रास खंयचे खंय नाच्च जाले हें नक्की. म्हुणून म्हणन दिसता ‘वालोर तुका मंगळूरकारा!’

चेतन आचार्य
9422389290