भांगरभूंय | प्रतिनिधी
भांगरभूंय । प्रतिनिधी
सांगेंः भाटी पंचायत वाठारांतल्या वालकिणी हांगच्या उपसा जलसंधारण येवजणेचो दर्जो वाडोवपाच्या कामाचो आनी नव्या पायपलायन कामाचें उक्तावण थळावो आमदार आनी समाज कल्याण मंत्री सुभाष फळदेसाय हांणी केलें. ह्या कामाक सुमार 36 लाख रुपया खर्च येतलो. 25 एचपी ताकांचे सेन्ट्रीफुगल पंप आनी 200 एमएमाची 740 मीटर लांब पायपलायन आसतली.
उक्तावण कार्यावळीक उदका स्रोत खात्याचो सहाय्यक अभियंतो मोहन रायकार, ज्युनियर अभियंतो शांताराम गांवकार, सरपंच चंद्रकांत गांवकार,पंच वांगडी विजेंद्र गांवकार, उमेश नायक, सुनयना कर्पे, सुहास देयकार आनी कंत्राटदार हाजीर आशिल्लो. हे उदका येवजेक लागून सुमार बारा हेक्टर जमीन शिंपणावळी खाला येतली. उदकाचो सारको उपेग करून नाल्ल आनी आंतर पिकां घेवपाचें आवाहन फळदेसाय हाणे केलें. सगल्यांक सरकारी नोकऱ्यो मेळप शक्य नाशिल्ल्यान तरणाट्यांनी कृशी, दूद उत्पादन आनी हेर वेवसाय सुरू करपाक फुडें येवपाक जाय. सरकारान कृशी वाडी खातीर जायत्यो येवजण्यो चालीक लायल्यात अशी म्हायती ताणे दिली. आयतार आनी हे सुटयेच्या दिसांनी शेतकाराक उदका पुरवण करपाची सूचोवणी फळदेसाय हाणी पंप ऑपरेटरांक केली.
वालकिणी उदका येवजणेचें उक्तावण करचे पयलीं फळदेसाय हाणे भाटी हागां व्हाळाच्या देगेर पायप घालपाच्या आनी राखणे वणत बांदपाच्या कामाचो बुन्यादी फातोर बसयलो. सुभाष फळदेसाय हांणी फुडाकार घेतिल्ल्यान उदरगतीचीं जायतीं कामां जाल्यांत अशें चंद्रकांत गांवकार हाणे सांगलें. मोहन रायकारान येवकार दिलो आनी उमेश नायक हाणे निमणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
