भांगरभूंय | प्रतिनिधी
मडगांव : कोलवा पुलिसांनी प्रजासत्ताक दिसा सकाळीं वार्का एका फ्लॅटार धाड घालून दोन लाख रुपयांचीं घुंवळे वखदां जप्त केल्यांत. हे कारवायेंत पुलिसांनी दोन दुबावितांक अटक केल्या. तांचे कडल्यान एमडीएमए, गांजो आनी चरस जप्त केले.
पुलिसांक मेळिल्ले गुपीत म्हायतीच्या आदारार कोलवा पुलिसांनी २६ जानेवारीक सकाळीं सुमार ५.५० ते सकाळीं ९.३० वरां मजगतीं वार्काच्या आसंव वेर्डेच्या इमारतींतल्या फ्लॅटांत छापो घालो. हे कारवायेंत दोन वेगवेगळ्या मनशां कडल्यान व्हडा प्रमाणांत ड्रग्ज जप्त केले. दुबावीत आकाश सजीथ (३६, रा. वार्का) हाचे कडेन १,३५,८०० रुपयांचे ६.७९ ग्रॅम एमडीएमए आनी २४,३०० रुपयांचे २.४३ ग्रॅम चरस सापडलें. जाल्यार दुबावीत प्रतीक बर्मन (४१, रा. वार्का) हाचे कडल्यान ४०,४०० रुपयांचो २.०२ ग्रॅम एमडीएमए जप्त केलें. ह्या छाप्यांत पुलिसांनी वट्ट २,००,५०० रुपयांचो मुद्देमाल जप्त केलो.
अधीक्षक टीकम सिंग वर्मा, अधीक्षक सिद्धांत शिरोडकार हांच्या मार्गदर्शना खाला कोलवा पुलीस निरीक्षक विक्रम नायक हांचे सयत उपनिरीक्षक प्रथमेश महाले, उपनिरीक्षक निखील खाजणेकार हांणी ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
