भांगरभूंय | प्रतिनिधी
मडगांव : वार्काचे इगर्जे फाटल्यान रावपी विनंती कोलकर हांच्या घरा भायर दवरिल्ल्यो दोन दुचाकी उज्यांत लासून गोबोर जाल्यो. उज्याचें कारण आजूनय मुखार येवंक ना. उजो पालोवपी दळ पावचे पयलींच थळाव्यांनी उज्याचेर नियंत्रण हाडिल्लें. हातूंत लाखांनी रुपयांचें लुकसाण जालां.
वार्काचे इगर्जेचे फाटले वटेन विनंती दामोदर कोलकार हांचें घर आसा. आयतारा सकाळीं सुमार पावणे चार वरांचेर घरा भायर पार्क केल्ल्या ऍक्टीव्हा दुचाकीक उजो लागिल्ल्याचें दिसून आयलें. उपरांत ताचे कुशीक आशिल्ली टीव्हीएस एनटॉर्क हे दुचाकीकूय उजो लागलो. दुचाकींक उजो लागिल्ल्याचें समजतांच घरच्या मनशां सयत आशिकुशीकचे शेजारीय घडणुके सुवातेर पावले. उज्याचेर उदक मारून नियंत्रण हाडलें. मडगांव उजो पालोवपी दळाक आपयल्लें. मात उजो पालोवपी दळाची गाडी पावचे पयलींच थळाव्यांनी उज्याचेर नियंत्रण हाडिल्लें.
उजो पालोवपी दळ घडणुके सुवातेर पावलें. तांकां उज्याचेर नियंत्रण हाडिल्ल्याचें समजतांच ते परतले. दोनूय गाडयो लाशिल्ल्यान सुमार देड ते दोन लाखांचें लुकसाण जाल्ल्याचो अदमास आसा. हो उजो नेमको कसो लागलो हें आजून समजूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
