भांगरभूंय | प्रतिनिधी
वाराणसी, खबरां संस्था ः ‘तू मेरी नहीं तो किसी की नहीं’ हो सिनेमांतलो हिंदी संवाद तुमी आयकला आसतलो. हाचे वयल्यान एकतर्फी मोगांतल्यान मोगीन कितें तरी गुन्यांव केलां हें स्पश्ट जाता. असोच एक प्रकार प्रत्यक्षात घडला. एका मोगीन हो डायलॉग मारून मोगीचें घर उध्वस्त केलें. आपलो मोग आशिल्लो त्या इश्टान दुसरे चलये कडेन लग्न केले उपरांत तिडकिल्ल्या त्या मोगी इश्टीणीन मोगीच्या घरांत घुसून नव्यान लग्न जाल्ले व्हंकलेचो गळो चिरलो. आनी ती थंयच ‘जो म्हजो न्हय, तो कोणाचोच न्हय’ अशें व्हडा व्हडान आड्डूंक लागली.
उत्तर प्रदेशांतल्या वाराणासीच्या छोलापूर गांवांत ही धक्को दिवपी घडणूक घडल्या. इश्टीणीन आपल्या मोगीच्या लग्न जावन घरांत आयिल्ल्या व्हंकलेचो गळो चिरले उपरांत कुटुंबान तिका रोखडीच हॉस्पिटलांत व्हेली. हें घडणुकीत ती गंभीर जखमी जाल्ली. सध्या तिचेर उपचार सुरू आसात. इश्टिणींन केल्ल्या ह्या हल्ल्याक लागून इश्टाच्या कुटुंबांत भिरांत निर्माण जाल्या.
पुलिसांनी आरोपी इश्टिणीक अटक केल्या. अटक केल्ल्या इश्टिणीचें नांव प्रिया जाल्यार तिच्या इश्टाचें नांव बबलू अंसारी अशें आसा.
धर्माक लागून लग्न जावंक शकलें ना…
ह्या प्रकरणांत प्रियाचे आवयनय बबलू आड कागाळ केल्या. प्रियाचेर खून करपाचो यत्न केल्ल्याचो गुन्यांव नोंद करून तिका पुलीस कोठडेंत दवरल्या. पुलिसांनी प्रियाची चवकशी केले उपरांत तिणें ह्या कृत्या फाटलें कारण सांगलें. प्रिया आनी बबलू तीन वर्सां मोगांत आशिल्ले. बबलून म्हाका लग्नाचें उतर दिवन जायते फावट म्हजे वांगडा शारिरीक संबंद दवरलो असो आरोप प्रियान केला. देखून प्रियाचे आवयन बबलू आड बलात्काराची कागाळ दाखल केल्या.
बबलू कडेन म्हाका लग्न जावपाचें आशिल्लें. पूण धर्म वेगवेगळे आशिल्ल्यान लग्नांत समस्या निर्माण जाल्यो, अशेंय प्रियान कबूल केलें. बबलू दुसरे चलयेकडेन लग्न जाले उपरांत तिडकिन प्रियान बबलूचे बायलेक जिवेशीं मारपाचो यत्न केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
