भांगरभूंय | प्रतिनिधी
मडगांव: दिकरपाले एका मनशाचेर वारांवान हल्लो केल्ल्या प्रकरणांत दुबावीत शाहरुख शाली अहमद खलीप (32) हाका दक्षीण गोंय जिल्लो सत्र न्यायालयान सशर्त अटकपूर्व जामीन मंजूर केला. ह्या प्रकरणांत सॅमसन वाझ (25) हाका गंभीर दुखापत जाल्ली. ही घडणूक 30 ऑगस्टाक घडिल्ली.
खलिपाच्या ‘रेंट कार’चेर ड्रायव्हर म्हणून काम करपी अली खानाचो पगार जावंक नाशिल्लो. ते विशीं विचारपाक अली आनी ताचो इश्ट सॅमसन वाझ दिकरपालच्या बस स्टॉपा लागसार दुबावीत खलिपा कडेन गेल्ले. तेन्ना जाल्ल्या वादांतल्यान खलिपान वारांवान सॅमसनाचे तकलेर हल्लो करून ताका गंभीर जखमी केलो.
सॅमसनचो बापूय रेजिनो वाझ हांणी मायणा-कुडटरी पुलिशेंत कागाळ नोंद केल्ली. ते प्रमाण पुलिसांनी दुबावीत खलिपा आड गुन्यांव दाखल केला. अटकेची शक्यताय लक्षांत घेवन खलिपान न्यायालयांत अटकपूर्व जामिना खातीर अर्ज केल्लो. न्यायालयान अर्ज स्वीकारीत ताका 50 हजार रुपयांचो वैयक्तीक बॉंड आनी तितलेच रकमेच्या हमीदारा सयत जामीन मंजूर केला.
न्यायालयान जामीन दितना खलिपाक कांय अटी घाल्यात. हातूंत परवानगे बगर गोंयां भायर वचप ना, साक्षीदारांचेर चेंपण हाडप ना आनी पुलीस तपासांत पुराय सहकार्य करप हाचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
