भांगरभूंय | प्रतिनिधी
पेडणें: वारखंड सरपंच पदार गौरी जोसलकार हांची विरोधाविणें निवड जाली. वारखंड सरपंच कविता कांबळी हांणी अलिखीत करारा प्रमाण आपल्या पदाचो राजिनामो दिल्लो. हाका लागून सरपंच पद रितें आशिल्लें. शुक्रारा पंचायत मंडळाची खास बसका आयोजीत करून सरपंच पदा खातीर वेंचणूक घेतली. ह्या वेळार गौरी जोसलकार हांचो एकूच अर्ज सरपंच पदा खातीर आयिल्ल्यान तांची विरोधाविणें निवड जाली.
ह्या वेळार उपसरपंच देविदास चारी, पंच मयुरी तुळसकार, पंच रुपेश मावळणकार आनी पंच वसंत नायक, पंच साबाजी परब हाजीर आशिल्ले. आमदार प्रवीण आर्लेकार हांणी नवी सरपंच गौरी जोसलकार हांका मेळून तांकां परबीं भेटयलीं.
आमदार आर्लेकार हांणी पंचायत मंडळांनी एकठांय रावन पंचायत वाठाराचे उदरगतीक प्रधान्य दिवचें असो उलो तांणी मारलो. वारखंड पंचायत वाठारांत जर आनीक उदरगतीचीं कामां जावपाचीं उरल्यां जाल्यार तीं उरिल्ल्या काळांत करतले.लोकांचे मागणे प्रमाण तांकाञ जाय तशी उदरगत करपाक भाजप सरकार समर्थ आशिल्ल्याचें तांणी म्हणलें.
सरपंच जोसलकार हांणी मनोगत उक्तायतना, सगल्या पंचायत वांगड्यांनी आपल्याचेर जो विस्वास दाखोवन आपल्याक दुसरे फावटीं सरपंच पद दिलें ते खातीर आपूण सगल्यांचे उपकारी आसा. आमदार आनी सरकाराच्या सहकार्यान पंचायत वाठाराची उदरगत करतली, अशें तिणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
