भांगरभूंय | प्रतिनिधी
मातयेच्या भरावाक गेल्यात वेंरो
भांगरभूंय । प्रतिनिधी
पेडणें: राष्ट्रीय म्हामार्ग 66 वारखंड जंक्शन ते रेल्वे पुला मेरेन रस्त्याचे कुशीक व्हड प्रमाणांत तेरेखोल न्हंयेच्या पात्रांत मातयेचो भराव घातला. हो रस्तो करतना राखणे वणत बांदचे बदला थंय मातयेचो भराव घातिल्ल्यान रस्तो नेमला. जंय माती घातल्या थंय रस्त्याक वेंर गेल्ल्याचें स्पश्ट दिसता. राष्ट्रीय म्हामार्ग प्राधिकरणच्या अधिकाऱ्यांनी तशेंच सरकारान ताकतिकेन लक्ष दिवचें, ना जाल्यार व्हड दुर्घटणा घडपाक शकता, अशें थळाव्या लोकांचें म्हणणें आसा.
राष्ट्रीय म्हामार्गाचें काम करतना 14 जुलय 2020 ह्या दिसा अशीच एक घडणूक घडिल्ली. रेल्वे पुला वटेन 200 मिटर लांबायेचो रस्तो राखणे वणटी सयत तेरेखोल न्हंयेच्या पात्रांत गेल्लो. ते उपरांत आनीक 300 मिटर लांबायेचो रस्तो उदकांत वचपाची शक्यताय आशिल्ली. त्या वेळार मंत्री, अधिकाऱ्यांनी त्या वाठाराक भेट दिवन तो रस्तो दुसरे वटेन वळयिल्लो. तो रस्तो तसोच दवरून फुडें रेल्वे पुला पोंदां रस्तो रुंदीकरणाचें काम सुरू केलां. ह्या रस्त्याचीय गत आदले वरीच जावपाची भिरांक वाहन चालक उक्तायतात.
रेल्वे पुला पोंदां व्हड प्रमाणांत तेरेखोल न्हंयेच्या पात्रांत मातयेचो भराव घालपाचें काम चल्लां. त्या रस्त्याकूय पावला पावलार वेंर गेल्या. माती ल्हवू ल्हवू तेरेखोल न्हंयेंत वचपाक लागल्या. तेरेखोल न्हंयेच्या पात्रांत कुशीक राखणे वणत बांदपाचें काम सथ्या हातांत घेतलां. फुडारांतल्या धोक्याची शिटकावणी ही आसूं येता. सरकारान हाचेर ताकतिकेन लक्ष दिवचें आनी उपाय येवजण करची, अशी मागणी लोकांनी केल्या. मजगतीं, पोरस्कडे वाठारांत जी शेती बागायती आसात, त्या बागायतींनीय रस्त्याचें रुंदीकरण करतना कसलेच तरेची राखणे वणत बांदिनासतना मातयेचो भराव घातला. हाचो परिणाम म्हणल्यार ती माती लोकांच्या शेतांनी, बागायतींनी वचून लोकांचें लाखांनी रुपयांचें लुकसाण जालां.
नाका थंय पूल, जाय थंय मात ना
राष्ट्रीय म्हामार्गाचे पत्रादेली ते करासवाडो मेरेनच्या पयल्या टप्प्यांतल्या कामाचेर 480 कोटी रुपया खर्च करतात. ह्या रस्त्याचें कंत्राट एमव्हीआर कंपनीक दिला. कंत्राटदारान पयलीं सावनूच मनमानी पद्दतीन रस्त्याचें काम केलां. रस्त्याच्या रुंदीकरणा खातीर लागपी अतिरिक्त जमीन संपादीत करिनासतनाच हुकूमशाय पद्दतीन सरकारी जमनीचेर अतिक्रमण करून रस्तो रुंद केला. थळाव्यांक विस्वासांत घे नासतना ताणें काम केलां. रस्त्या खातीर लोबरां आनी मातये खातीर आपल्याक जाय तो दोंगर कापला. अंडरपास दवरिनासतना मनाक दिसता थंय पूल बांदल्यात. वारखंड जंक्शनाचेर पुलाची गरज आशिल्ली थंय तो बांदूंक ना. जंक्शनाचेर पुलाची गरज आशिल्ली, थंयूय तो बांदूंक ना. उगवें वाठारांत रस्तो हुंपतना शेतकारांक आनी लोकांक फुडारांत खूब त्रास जावपाचो आसा. पूण ताचेरूय कसलीच उपाय येवजण करूंक ना, अशें लोकांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
