भांगरभूंय | प्रतिनिधी
सरपंच गौरी जोसलकारः हें फुडें नव्या बार्रांक परवाने नात
भांगरभूंय । प्रतिनिधी
पेडणें: वारखंड पंचायत वाठारांतलीं आदलीं बार्रा बंद करचीं आनी नव्या बार्रांक परवाने दिवचे न्हय, असो थाराव वारखंड नागझर पंचायत मंडळाचे बसकेंत मांडून तो मंजूर केलो.
हे विशीं वारखंडची सरपंच गौरी जोसलकार हांणी थळाव्या पत्रकारां कडेन उलयतना सांगलें, गांवचें अस्तित्व राखचे खातीर आनी वारखंड गांव आदर्श गाव करचे खातीर पंचायत वाठारांतलीं बार्रां बंद करतले, तशेंच नव्या बार्रांक परवाने दिवचे नात. कायदेशीर अभ्यास करून पंचायत वाठारांतली आदलीं बार्रां कशी बंद करपाक मेळटलीं तें पळयतात. ह्या बार्रांक लागून पंचायतीक दर वर्सां 20 हजार रुपया महसूल मेळटा.
गांवच्या इतिहासांत पयलेच खेपे वारखंड पंचायतीचे ग्रामसभेंत अशे तरेचो थाराव सगळ्यांच्या मतान घेतला. वारखंड गांवाचो विचार केल्यार ह्या गांवांत एकूय बार्र ना, पूण नागझर आनी हेर वाठारांनी बार्रां आसात. फुडारांत गांवांत एकूय बार्र आसचें न्हय, असो थाराव मांडिल्लो. आतां ताची कार्यवाही करचे खातीर लोकांनी तेंको दिवचो, असो उलो गौरी जोसलकार हांणी मारला. पंचायतीचो महसूल वाडोवचे खातीर योग्य तीं पावलां उखल्ल्यांत. मोपा विमानतळाचेर जो वेवसाय चलता, ताचो महसूल पंचायतीक येवपाचो उरला. तो महसूल एकठांय करपा खातीर कायदेशीर निवेदन जीएमआर कंपनीक दिलां, अशी म्हायती सरपंच जोसलकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
