भांगरभूंय | प्रतिनिधी
एके वटेन देशांतल्या वायु प्रदुशणाक लागून नागरिकांची भलायकी धोक्यांत आशिल्ल्यान सर्वोच्च न्यायालयान अंदूंचे दिवाळेंत मर्यादीत पद्दतीन फोग मारपाक परवानगी दिली. पूण, सर्वोच्च न्यायालयाच्या आदेशा कडेन आडनदर करून देशभरांत सगल्यांनी भरपूर फोग मारलो. देखून, देशांतल्या तीन शारांक संवसारांतल्या सगळ्यांत चड प्रदुशीत शारां मदीं आयल्यांत. हातूंत देशाची राजधानी दिल्ली पयल्या क्रमांकाचेर आसा. स्वित्झर्लंडाच्या आयक्यूएअर ह्या गटान हो अहवाल दिला. अर्थांत सगलेंच हवा प्रदुशण फक्त फोगाक लागून जावंक ना, हेंय तितलेंच खरें.
सोमारा सकाळीं 11.52 मेरेन दिल्लीचे हवेचो दर्जो निर्देशांक 412 आशिल्लो. उपरांत लाहोर (पाकिस्तान), बगदाद (इराक), कराची (पाकिस्तान), कुवेत शार (कुवेत), कोलकाता (भारत), ढाका (बांगलादेश), मुंबय (भारत), साराजेवो (बोस्निया), दोहा (कतार) हीं धा शारां.आंकडो असो आसा
खंय कितले एआयक्यू?
दिल्ली – 412, लाहोर- 262
बगदाद – 206, कराची – 197
कुवेत – 168, कोलकाता – 167
ढाका – 155, मुंबय – 154
साराजेवो – 153, दोहा- 149, जकार्ता –126,
काठमांडू – 115, शेनयांग (चीन)- 113,
रियाद (सावदी अरेबिया) – 107, कांपाला (युगांडा) – 99
फाटल्या कांय दिसां सावन दिल्लीची हवा इबाडत आसा. ते उपरांत मुंबयंतूय वायु प्रदुशण चडांत चड जालां. प्रदुशणाचेर नियंत्रण दवरपा खातीर सरकारी पांवड्यार यत्न सुरू आसात. दिल्लींत कृत्रीम पावसाचीय येवजण आशिल्ली. दिवाळे पयलीं प्रदुशण उणें जाल्ल्याची म्हायती मेळ्ळी. पूण, शेनवार आनी आयतारा फोगाक लागून परतून एक फावट हवा प्रदुशण वाडलां. मुंबय वांगडाच दिल्लींत हवेच्या दर्ज्याच्या निर्देशांकांत वाड जाली.
हवेचो दर्जो निर्देशांक हो एक संख्यात्मक माप आसून ताचो उपेग पर्यावरण आनी मनशाचे भलायकेचे नदरेन दिसपट्टो हवेचो दर्जो नोंद करपाक करतात. 0 ते 50 एआयक्यू आशिल्ल्या शारांत वायु प्रदुशण ना. 51 ते 100 हें मध्यम धोक्याचें जाल्यार 101 वयर आशिल्ले सगळे एआयक्यू धोक्याचे मानतात. तुमच्या शारांतली हवेची भलायकी मनशाचे भलायकेक धोक्याची आसल्यार हवेचो दर्जो निर्देशांक 101 आसतलो. हाका लागून ह्या शारांतल्या लोकांक फुफ्फुस आनी स्वास घेवपाचे दुयेंस जावपाची भिरांत आसता. संवसारीक भलायकी संघटनेन एआयक्यू थारायला. लायव्ह रँकिंगाच्या म्हणण्या प्रमाण मेक्सिको सिटी संवसारांतलें शंबरावें निवळ शार म्हणून जाहीर जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
