भांगरभूंय | प्रतिनिधी
नवी दिल्ली, खबरां संस्था ः वेगवेगळ्या प्रस्नांचेर आदारिल्ले जायते अहवाल आतां मेरेन लँसेटनान उजवाडायल्यात आनी ह्या अहवालाचेर आदारून वेळोवेळ खूब म्हत्वाचे संदर्भ भायर सरल्यात. मजगतीं, निरिक्षण अहवाल सादर केला, तातूंत वायु प्रदुशण आनी ब्रेन स्ट्रोक विशीं भिरांकूळ म्हायती मेळ्ळ्या. ह्या निरिक्षणांतल्यान मेळिल्ले म्हायती प्रमाण वायु प्रदुशणाचो परिणाम धूम्रपान सारकोच आसता आनी ब्रेन स्ट्रोकाचे तें मुखेल कारण.
भारत, अमेरिका, न्यूझीलंड, ब्राझील आनी युएई ह्या देशांतल्या शास्त्रज्ञांनी वांटो घेतला आनी ह्या आकडेवारी प्रमाण हवेंतले ल्हान पूण स्थिर आनी हलके कण हवेंत प्रदुशण करतात. इतलेंच न्हय तर ताका लागून स्ट्रोक जावपाचोय धोको वाडटा. अहवालाच्या निरिक्षणा प्रमाण फाटल्या तीन दशकांत स्ट्रोक जावपाची शक्यताय आनी ताका लागून मरण आयिल्ल्या लोकांचो आंकडो व्हड प्रमाणांत वाडला.
2021 वर्सा स्ट्रोक जाल्ल्या लोकांचो आंकडो 1 कोटी परस चड आशिल्लो. 1990 सावन हो आंकडो सुमार 70 टक्क्यांनी वाडला. जाल्यार स्ट्रोक जावन मरण येवपी लोकांचो आंकडो 70 लाखां मेरेन पावला, तातूंत 44 टक्के वाड नोंद जाल्या.
ब्रेन स्ट्रोक जावपाक कारणीभूत आशिल्ले घटक खंयचे?
अभ्यासांतल्यान मेळिल्ले म्हायती प्रमाण स्ट्रोक जावपाक जायते घटक कारणीभूत थारलें. उच्च रगतदाब, धूम्रपान, उच्च कोलेस्टेरॉल, घरगुती वायु प्रदुशण आनी पर्तिक्युलेट मॅटर वायु प्रदुशण हाका लागून स्ट्रोक जावपाचो धोको चड वाडटा अशें स्पश्ट केलें.
भौशीक पांवड्यार हवेच्या प्रदुशणाक आळाबंदा हाडपा खातीर निवळ हवेचो वाठार आनी धूम्रपान विरोधी उपाय येवजण्यो चालीक लायतना स्थूलताय आनी मेटाबॉलिक डिसऑर्डर हाचेर लक्ष केंद्रीत करपाची गरज वॉशिंग्टन विश्वविद्यालयातले डॉ. कॅथरीन ओ. जॉनसन हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
