भांगरभूंय | प्रतिनिधी
सलाम फौजी
भारतीय वायुसेनेच्या जायत्या उंचेल्या पांवड्यावेल्या गोंयांतल्या अधिकाऱ्यांचो गोंयकारांक अभिमान आसा. तातूंतलो सगळ्यांत म्हत्वाचो म्हणल्यार एअर मार्शल संदेश प्रभाकर वागळे, परम विशिष्ठ सेवा पदक (पीव्हीएसएम), वायुसेना पदक (व्हीएम), जो 1984 वर्सा भारतीय वायुसेनेच्या हेलिकॉप्टर प्रवाहांत कमिशन जाल्लो. मूळ मडगांवचे, हे एकमेव गोंयचे अधिकारी जे ह्या दळांत सगळ्यांत उंचेलें पद सांबाळटाले.
एअर मार्शल वागळे हांकां 1984 वर्सा भारतीय वायुसेनेच्या हेलिकॉप्टर प्रवाहांत नेमले, 65 व्या एनडीए कोर्सांत (इको स्क्वाड्रन). तांणी आयएएफांत उड्डाण केल्ल्या सगळ्या हेलिकॉप्टरांचें उड्डाण 6000 वरां वयर जाता. सियाचेन हिमखंडांतल्या ऑपरेशन मेघदूत आनी श्रीलंकेंतल्या ऑपरेशन पवनांत तांणी व्हड प्रमाणांत उड्डाण केलां.
एअर मार्शल वागळे हांणी अस्तंत प्रदेशांत आनी काँगोच्या लोकशाय प्रजासत्ताकांतल्या संयुक्त राष्ट्रांच्या मिशनांत आक्रमक हेलिकॉप्टर स्क्वाड्रनाची कमान सांबाळ्ळ्या आनी थंय तांकां पाकिस्तानी पदाधिकारी ब्रिगेडा वांगडा काम करपाची खाशेली संद मेळ्ळी. ताच्या स्क्वाड्रनाक आयएएफच्या सगळ्यांत बऱ्या ऑपरेशनल हेलिकॉप्टर स्क्वाड्रनाची पदवी मेळ्ळी.
हवाई अधिकारी म्हूण तांणी वायुसेना स्टेशन लेहाचेर काम केलां. हें एकमेव वायुसेनेचें केंद्र आसून तें भारतीय हवाई क्षेत्राची दोनूय दुस्मा कडल्यान राखण करताले. तांणी हवाई मुख्यालयांत दोन पदां घेतल्यांत; एक आयएएफच्या सगळ्या झुजारी युनिटांची कार्यक्षमताय तपासपी महानिरीक्षक शाखेंत आनी दुसरें ऑपरेशन्स शाखेंत, जंय तांणी हेलिकॉप्टरां खातीर मुखेल कार्यावळी संचालक म्हणून आयएएफच्या हेलिकॉप्टर कार्यावळींचेर देखरेख दवरल्या.
संरक्षण गुप्तचर एजन्सींत ते एकत्रीत संरक्षण सहाय्यक मुखेल आशिल्ले आनी शेजराच्या सगळ्या देशांचें (अफगाणिस्तान, पाकिस्तान आनी बांगलादेश सोडून) संरक्षण गुप्तचर विश्लेशण करपाची जापसालदारकी तांचेर आशिल्ली.
आदल्या पोस्टिंगांत एअर मार्शल शीमा सुरक्षा दळांत आयजी बीएसएफ म्हणून प्रतिनिधीत्वाचेर काम केलां आनी थंय ते गृह मंत्रालयाच्या एअर विंगाचे प्रभारी आशिल्ले, तातूंत वेगवेगळी विमानां आनी हेलिकॉप्टरां आशिल्लीं. निवृत्त जावचे पयलीं तांची मुख्यालय डेप्युटी चीफ ऑफ इंटिग्रेटेड डिफेन्स स्टाफ म्हणून नेमणूक केल्ली.
तांणी बीएससी आनी एमएससी पदवी आनी मद्रास विद्यापीठ आनी उस्मानिया विद्यापिठांतल्यान संरक्षण आनी रणनिती अभ्यासांत दोन एमफिल मेळयल्यात.
ग्रूप कॅप्टन जीवेक्ष वागळे ही तांची घरकान्न. तांकां एक धूव (दोळ्यांची दोतोर) आनी एक पूत (अभियंतो) आसा.
– जॉन आगियार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
