भांगरभूंय | प्रतिनिधी
वायनाड, खबरां संस्था: वायनाडांतल्या जायत्या गांवांनी पालसणां कोसळून पांच-स दीस जाले तरी अजूनय २०० परस चड लोक बेपत्ता आसात. ह्या संकश्टांत मरण आयिल्ल्यांचो आंकडो ३५७ परस चड जाला आनी अजूनय लोकांचो सोद घेतात. हे भिरांकूळ दुर्घटनेंतल्यान जिवे उरिल्ल्या लोकांचे धक्को दिवपी अणभव आनी घडणुको मुखार येवपाक लागल्यात. अपघातांतल्यान जिवें उरिल्ल्या एका कुटुंबान हतयांच्या कळपान तांकां वाटायल्ल्याचो दावो केला.
हतयांचो कळप दोंगरार मेळ्ळो
वायनाडांतल्या जिवे उरिल्ल्या कांय लोकां मदीं सुजाता अन्निनाचिरा हिचोय आसपाव आसा. चुरालमालांत जाल्ले घडणुकेक लागून आमचें घर मातयेंत पुरलां. पालसणां कोसळटना सगले गांवां लागसारच्या दोंगरार धांवून गेलें. थंय तांकां रानटी हत्तींचो कळप मेळ्ळो अशें तांणी सांगलें.
हतयांनी वाटयलो जीव
रानवटी वाठारांतले हती खूब आक्रमक आसतात. मनीस पळोवन ते एक तर पळून वतात वा सरळ हल्लो करतात. पूण सैमीक संकश्ट आयलें तेन्ना ह्या रानटी हतयांनी सुजाताच्या कुटुंबाचो जीव वाटायलो अशें तिणें सांगलें. हतयांचो कळप पळोवन आमी हात जोडून तांचो कडेन आमची राखण करपा खातीर प्रार्थना केली. अजापाची गजाल म्हळ्यार हाचे उपरांत त्या हतयांनी आपल्या कुटुंबांतल्या कोणाकूच त्रास दिवंक ना. हतयाचो कळप आमचे भोंवतणी सुरक्षारक्षकां वरीं उबो आशिल्लो. सुजाता हो दैवी चमत्कार असो दावो करता.
चार वरां हतयांनी राखलें
अपघाता दुसर्या दिसा ४ वरां उपरांत सुजाता आनी तिच्या कुटुंबा मेरेन मजत पंगड पावलो. हत्ती आमचे पासून फकत अर्द मिटर पयस आशिल्ले. हती लेगीत भियेल्ले दिसताले. हात जोडून तांकां विनवणी केली, ‘आमी आतांच सैमीक संकश्टा पसून वाटवल्यांत. म्हाका आनी म्हज्या कुटुंबाक सोडात. फकत आयचे राती खातीर आमकां हांगा रानांत कोण तरी सोडोवपाक येय म्हणसर आलाशिरो दियात.’’
आमी त्या हतयांच्या पांयां पसून सामक्या उण्या अंतराचेर आशिल्लीं. मात तांकां आमचें मागणें समजलां आसतलें. ते सामके शांत आशिल्ले. आमी थंय सकाळीं स वरां मेरेन आशिल्लीं. सकाळीं रेस्न्यू टीम येतासर ते हती आमची राखण करताले. तांच्या दोळ्यांत म्हाका आत्मियता जाणवली, अशें सुजाता हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
