भांगरभूंय | प्रतिनिधी
केरळांतले वायनाडांतल्या दुर्घटनेन देशांतल्या संवेदनशील लोकांच्या दोळ्यांतल्यान दुकां काडलीं. अख्खो दोंगरूच कोसळून येवन जाल्ले हे दुर्घटनेन 416 जाणांचे जीव घेतल्यात. सुमार देडशें लोक आजूनय मेळूंक नात. हातूंत वेल्लरमाला सरकारी विद्यालयांतल्या 27 विद्यार्थ्यांचोय आसपाव आसा. हे आदींय केरळांत अश्यो तरेच्यो दुर्घटना घडल्यात आनी ताचीं कारणां सोदपाचो अभ्यासूय जाला. मात फाव तीं पावलां उबारूंक नाशिल्ल्यान लोकांक आपलो जीव वगडावचो पडलो. पश्चिमी घांटां विशींचो अभ्यास जावन लेगीत आनी अशा दुर्घटनांचो अदमास उक्तावन लेगीत सरकार तें आडावंक शकलें ना.
प्रधानमंत्री नरेंद्र मोदी हांणी काल ह्या वांठाराची भेट घेवन, सगळी म्हायती घेतली. तांणी हॉस्पिटलांत वचून थंय उपचार घेवपी पिडेस्तांची वासपूस केली, तशेंच ज्या लोकांक सुरक्षीत सुवातांचेर व्हरून दवरल्यात तांकांय दिलासो दिलो. वायनाडचो हो पुराय वांठार परत जाग्यार घालपाक केरळ सरकारा मुखार एक आव्हान आसा. ते खातीर केरळ सरकारान केंद्रा कडेन 2 हजार कोटी रुपयांची मदत मागल्या. हे पयशे मेळटकच थंयची परिस्थिती जाग्यार पडतूय, पूण जांकां मरण आयलां ते परत येवचे नात. जीं भुरगीं आवय- बापूय नासतना उरल्यांत तांकां आपल्या पालकांची उब आनी माया परत मेळची ना. असो हो संवेदनशील खीण आसुनूय आमचे राजकी फुडारी अशाय गजालींचेर राजकारण करपाचें सोडनात.
काँग्रेसचे फुडारी राहुल गांधी हांणी ही आपत्ती ‘राष्ट्रीय आपत्ती’ म्हूण घोशीत करपाची मागणी लावन धरिल्ल्यान, भाजपाच्या फुडाऱ्यांनी कायद्याचो सांगात घेवन तांचेर ताशेरे ओडल्यात. सैमीक आपत्ती, राष्ट्रीय आपत्ती म्हूण घोशीत करपाची कायद्यांत तरतुद ना अशें स्पश्ट केलां. ह्या मुद्द्याचेर सध्या राजकी फुडारी राजकारण करतना दिसतात. जें करप समा न्हय, कित्याक तर अशा वेळार सगळ्यांनी एकठांय येवन हो वाठार परत जाग्यार घालपाक आनी लोकांचें दुखणें इल्लें कमी करपाक वावुरपाक जाय. देशांतलीं राज्यां ते खातीर फाटीं रावूंक नात. कोणें ना कोणें, मदत करपाची घोशणा केल्या. हाचेरूच सगळ्यांनी भर दिवंक जाय.
हाचोच एक भाग म्हणून, राहुल गांधी आनी तांची भयण प्रियांका गांधी हांणी 1 ऑगस्टाक वायनाडाक वचून लोकांची वासपूस केल्ली.
आमच्या गोंयांत, सभापती रमेश तवडकार हांणी आपल्या ‘श्रमधाम’ संकल्पनेंतल्यान वायनाडांत लोकांक घरां बांदून दिवपाचो हावेस उक्तायला. सुमार 200 कार्यकर्त्यांक घेवन थंय वतले आनी लोकांक मदत करतले अशें तांणी पावसाळी अधिवेशनांत सांगलें. रमेशबाब तवडकार हांच्या ह्या पावलाची तोखणाय करता तितली थोडी. बरें, हे खातीर आमचें सरकारूय फांटी रावूंक ना. मुखेलमंत्री प्रमोद सावंत हांच्या प्रशासनान केरळ सरकारा कडेन संवाद सादून जी मदत जाय ती सांगची अशें तांकां कळीत केलां.
हे दुर्घटनेन आमच्या गोंय सरकाराचेय दोळे उक्ते केल्यात. हें खुद्द मुख्यमंत्री प्रमोद सावंत हांणीच म्हणलां. पूण अशें म्हणून ओग्गी रावप उपकारचें ना. दोळे कायम उक्ते दवरचे पडटले, नाजाल्यार गोंयांतय वायनाडा सारकी परिस्थिती जंय दोंगर पोखरिल्यात थंय उप्रासूं शकता. पालसणां कोसळचीं न्हय म्हूण सरकार खंय आनीकय पावलां मारतलें. हे खातीर ‘आपत्कालीन वेवस्थापन प्राधिकरण’ स्थापपाचोय निर्णय सरकारान घेतला. जे अधिकारी ह्या प्राधिकरणांत काम करतले, तांकां आनीक कसलींच अतिरिक्त कामां दिवचे नात अशेंय सरकारान म्हणलां. तशेंच कोणूय दोंगर कांपतना दिसलो जाल्यार ताचेर त्याच खिणाक कारवाय जातली अशें सरकारान उतर दिलां. आपली चूक मान्य करपाक धाडस जाय पडटा. पूण हें धाडस आमच्या सरकारान दाखयलां आनी ‘पालसाणा विशीं’ मंद गतीन चलपी काम नेटान मुखार व्हरतले अशें उतरूय दिलां.
दोन वर्सां आदीं सत्तरीच्या रानांत अशे तरेन पालसाण कोसळून जाल्ल्या लुकसाणेचीय म्हायती सरकाराक आसा. ही दुर्घटना चड पडिल्ल्या पावसाक लागून आनी झाडां मारून उडयिल्ल्यान जाल्ल्याचो अहवाल संबंदीत समिती दिला. हे खातीर दोंगरा वयलीं झाडां मारपाचे प्रकार बंद करपाक सरकाराक पावलां मारचीं पडटलीं. खंयचोय राजकारणी दोंगर कांपून बंगलो वा प्रकल्प उबारता जाल्यार ताचेरय कारवाय करची पडटली. सामान्य मनशाक वेगळो न्याय आनी लोकप्रतिनिधींक वेगळो अशें चलचेंना.
तलाठ्यांनी अशा प्रकारांचेर नदर दवरून रोखडीच कारवाय करपाक जाय, नाजाल्यार तांकां जबाबदार धरतले अशें मुखेलमंत्र्यान म्हणलां. राजकारण्यांक लागीं आशिल्ल्या दलालांनी गोंयचे दोंगर विकून खाल्यात. ताचेरय मुखेलमंत्र्यान अहवाल तयार करून घेवन ह्या दलालांक जबाबदार धरूंक जाय. अशा दलालांचेर कारवाय करपाचें धाडस आमचे तलाठी दाखयत?
दुसरें म्हणल्यार, कांय वर्सां आदीं खांडेपार- फोंड्यां रस्त्याच्या कुशीक आशिल्ली दोंगुर्ली कोसळून रस्त्यार आयिल्ली. ती कोणाच्या चुकीक लागून, हाचेरय अभ्यास जावप गरजेचो. रस्तो करपाक दोंगुल्ली कातरतना ताका कितलो ‘स्लोप’दवरप हें खबर नाशिल्ल्या अभियंत्यांचेर कारवाय जायत? काय ते राजकारण्यांचो फावोर घेवन कामाक लागिल्ले म्हूण तांकां सोडून दितले?
समीर नायक
मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
