भांगरभूंय | प्रतिनिधी
धा वर्सां आदली घडणूक परत घडली: पुण्याय अशेंच जाल्लें
वायनाड, खबरां संस्था: धा वर्सां आदली घडणूक. ३० जुलय २०१४, आतां ३० जुलय २०२४. जुलय म्हयन्याचो पाव आनी पुराय गांवूच दोंगरा पोंदा गेले. धा वर्सां आदली घडणूक पुणेच्या आंबेगांव म्हालांतल्या माळीण हांगा घडिल्ली. तेन्ना १७५ लोकसंख्येच्या गांवांतल्या १५१ जाणांक न्हिदेंतूच आसतना मरण आयिल्लें. आतां केरळांतल्या वायनाड गांवांत पावसाक लागून पालसणां कोसळ्ळीं. हे घडणुकेंत सुस्त न्हिदेंतूच आसतना सुमार २७६ जाणांक मरण आयलें. जाल्यार २०० परस चड लोक आजूनय बेपत्ता आसात.
चार गांवांक फटको
पालसां कोसळप आनी हुंवाराचो सगळ्यांत चड फटको मुंडक्काई, चूरलमाला, अट्टमाला आनी नूलपुझा ह्या चार गांवांक बसला. मजत कार्यांत लष्कर, नौदळ, एनडीआरएफ, राज्याच्या आपत्ती निवारण दळान वांटो घेतला. वायनाड पालसणां कोसळून मरण आयिल्ल्यांचो आंकडो वाडला. आतां मेरेन सुमार २७६ जाणांक मरण आयलां. १२८ जाण बेपत्ता आसात. तशेंच शेकड्यांनी लोक जखमी जाल्यात. हांगा आजूनय पावसाचो नेट कायम आसा. ताका लागून केरळांतल्या ११ जिल्ह्यांतलो शाळा बंद केल्यात.
पुणे जिल्ह्यांत घडिल्ली घडणूक
पुणे जिल्ह्यांत घडिल्ली घडणूक परत केरळांत घडली. माळीण हांगची घडणूक सकाळ मेरेन कोणाकूच खबर नाशिल्ली. त्या गांवांत मोबायलाचें इंटरनेट नाशिल्लें. मात एका एसटी चालकाक ते घडणुकेची म्हायती मेळ्ळी. उपरांत प्रशासनान धांवपळ सुरू केली. ते सुवातेर स दीस मजत कार्य सुरू आशिल्लें. आतां केरळांतूय सुस्त न्हिदेंत आशिल्ल्या २५० परस चड जाणांक मरण आयलें. मरण आयिल्ल्यांचो आंकडो वाडपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
