भांगरभूंय | प्रतिनिधी
फोंडें मारपेट प्रकरणांत गुन्यांव नोंद
मडगाव : कुर्टी फोंडेंच्या अंत्रुजनगरांतल्या श्रेयस हर्डीकार (२७) हाचे लेखी कागाळे प्रमाण दुबावीत विनोद हाचे आड गुन्यांव नोंद केलो. पुलीस कर्मचार्यां वतीन बेकायदेशीर काम, वायट वागणूक सोंसचे ना. कायद्या प्रमाण कारवाय जातली, अशें दक्षीण गोंय पुलीस अधीक्षक टिकमसिंग वर्मा हांणी सांगलें.
श्रेयस हाका मारपेट केल्ल्या प्रकरणांत गुन्यांव दाखल जावंक नाशिल्लो, अशें कागाळदारान सांगिल्लें. हाचेर आतां लेखी कागाळ मेळ्ळे उपरांत फोंडें पुलिसांनी कागाळींतलो मजकूर आनी मुळावे चवकशेच्या आदारार दुबावीत विनोद (रा. अंत्रुजनगर, फोंडें) हांचेर गुन्यांव नोंद केल्ल्याचें सांगलें. ही मारपेटीची घडणूक १० सप्टेंबराक १२.४० वरांचेर घडिल्ली. दुबावीत विनोद हांणी लाकडी दांड्यान कागाळदाराचे मानेर हल्लो केलो. ताच्या मोबायलाचेंय लुकसाण केलें आनी वायट शब्दूय वापरले. हातूंत कागाळदाराक मात्शी दुखापत जाली.
पुलीस अधीक्षक टिकमसिंग वर्मा हांणी, खंयचेय परिस्थितींत पुलीस कर्मचार्यां कडल्यान जावपी कसलींय बेकायदेशीर कृत्यां, वायट वागणूक वा कर्तव्यांत हलगर्जीपणां सोसचे ना. अशे तरेच्या गुन्यांवान आसपाव आशिल्ल्याचें समजल्यार पुलीस दाळांतल्या खंयच्याय कर्मचार्याचेर शिस्तभंगाची तशेंच कायदेशीर कारवाय करतले.
पुलिसांनी शांतिकाय भंग करपाच्या उद्देशान मुद्दाम केल्लो अपमान, धोक्याच्या साधनांनी दुखापत करप, गुन्यांवकारी बळाचो वापर करप, अशा कलमां खाला गुन्यांव नोंद केला आनी फुडलो तपास सुरू आसा.
गोंय पुलिसां वतीन कायदो, सुवेवस्था राखतनाच पारदर्शकताय आनी जापसालदारके वरवीं लोकांचो विस्वास कायम राखतले, अशेंय पुलीस अधीक्षकांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
