भांगरभूंय | प्रतिनिधी
भांगरभूंय । प्रतिनिधी
काणकोणः पैंगीण पंचायत वाठारांतल्या वापें- सादोळशें हांगा सुमार तीन झाडां मारून रस्तो तयार करपी स्वामी ऊर्फ राज शशिभूषण पांण्डे हाचे आड रानां खात्यान निमाणे गुन्यांव नोंद केलो.
वापें दोंगुल्लेर बेकायदो बांदकाम तशेंच झाडां मारून बेकायदेशीरपणान रस्तो तयार केल्ले खातीर स्वामी आड गुन्यांव नोंद केला अशें काणकोणचो आरएफओ आनंद मेस्त्रीन सांगलें. शशिभूषण स्वामीन वापें हांगा आश्रम उबारला. झाडां मारल्ले खातीर ताका दंड घालतले अशी खबर आसा.
दोंगुल्ली कापप आनी झाडां मारप हे विशीं थळावी पंच वांगडी शिल्पा प्रभुगांवकार हिणे पैंगीण पंचायत मंडळाक म्हायती दिल्ली. कथीत बेकायदेशीर आश्रम मोडून उडोवपाचें मंडळान थारायल्लें. महसूल अधिकाऱ्यां कडेन कागाळ केल्या उपरांत तांणी आश्रमाची तपासणी केल्ली. काणकोणचो उपजिल्होधिकारी रमेश गांवकारान अहवाल आपल्याक दिवपाक सांगल्लें.
वीज खातें आनी बांदकाम खात्याच्या उदका पुरवण कार्यालयान संबंदीत आश्रमाक वीज आनी उदका कनेक्सन दिलां. ती काडपा खातीर पैगीण पंचायत मंडळान ताकां नोटिशी धाडल्यात. पैंगीण पंचायतीचे हालींच जाल्ले ग्रामसभेंत ह्या आश्रमा विशीं व्हडलो बोवाळ जाल्लो. राज शशिभूषण पांण्डे पेडणेचो रहिवाशी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
