भांगरभूंय | प्रतिनिधी
फा. मोउजीञु द आतायदः राजभास कायद्याक हात लावचो न्हय
भांगरभूंय । प्रतिनिधी
मडगांवः कोंकणी आमची भास. कोंकणीच आमची संस्कृताय, अस्मिताय आसा. आमच्या विचारांत अंतर आसपाक शकता, पूण विरोध ना. ते खातीर चळवळ करची न्हय. शांतिकाय, एकवट तिगोवन दवरचे खातीर मतांच्या भेदभावाचेर एकठांय बसून चर्चा करून उपाय काडपाची गरज आसा. कोंकणी मोगींनी एकवटीत रावून कोंकणी भाशेची उदरगत करुंया, अशें मत अखील भारतीय कोंकणी परिशदेचे अध्यक्ष फा. मोउजीञु द आतायद हांणी उक्तायलें. मडगांवां अखील भारतीय कोंकणी परिशदेच्या 33 व्या अधिवेशनांत ते उलयताले. रोमीवादाक लागून भाशेचे उदरगतींत आडखळ येतली. राजभास कायद्याक हात लावचो न्हय, अशेंय तांणी सांगलें.
शिकागोंतल्या सर्वधर्म परिशदेच्या अधिवेशानांत स्वामी विवेकानंद हांणी म्हज्या भावांनो आनी भयणींनो अशी भाशणाची सुरवात करून संवसार जिखिल्लो. मनीसपण होच धर्म आशिल्ल्याची शिकवण आदर्शवत आसा. आपूण लेखक न्हय, एक कोंकणी कार्यकर्तो. कोंकणी चळवळींत लेगीत आपलो वांटो आशिल्लो. देवनागरी कोंकणी अधिकृत लिपी करपाच्या प्रस्नांत कांय लोक विरोध करपाक लागताच आपूण मुखार सरलों. रोमीवाद्यां कडल्यान आपल्या अध्यक्षपदाचेर लेगीत प्रस्नचिन्न जावपाक लागलां, हें सांगचें पडटा. कोंकणी भाशिकां मदलो वाद आमकां आनी भाशेक फुडें वचपाक दिवचो ना. कोंकणी अस्मिताय सांबाळपाची गरज आसा. इंग्लीश बरी जावची हे खातीर घरांत लेगीत कोंकणी उलोवपाक दिनात, अशेंय पळयलां. कोंकणी भाशिकांनी एकामेका कडेन कोंकणींत उलोवचें, अशें फा. आतायद हांणी सांगलें.
सध्या राजभास कायद्यांत बदल शक्य ना
कांय जाण कोंकणीचो वाद काडटात. कोंकणी वेव्हारीक वापरांत हाडपाची गरज आसा. कोंकणी पांच लिपयांनी बरयतात. जाल्यार साहित्य देवनागरी, कन्नड आनी रोमी ह्या लिपयांतूच निर्माण जाता. राजभास कायद्यांत बदल करप आतांचे परिस्थितींत शक्य ना. भारतीय साहित्य अकादेमीन लेगीत कोंकणीक स्वतंत्र भास मानतना देवनागरी कोंकणी प्रमाण मानल्या. देवनागरी कोंकणींतल्या लेखकांक साहित्य अक्देमी, ज्ञानपीठ पुरस्कार मेळ्ळ्यात. कोंकणीची थीर आशिल्ली स्थिती अस्थीर करची न्हय. वादान कोणाचोच फायदो जावचो ना, अशें फा. आतायद हांणी सांगलें.
रोमी, कन्नड कोंकणींतल्या साहित्याचो अणकार करात
राजभास कायद्याक, साहित्य अकादेमींतल्या आनी संविधानान दिल्ल्या अधिकाराक तशेंच शिक्षणीक मळा वयल्या कोंकणीचो आस्पाव बदलपाचो यत्न करचो न्हय. कोंकणींतली जी लिपी आवडटा तातूंत साहित्य निर्मिती करची. एकामेकाक उर्बा दिवन कोंकणी भास वाडोवपाची गरज आसा. रोमी, कन्नड लिपयेंतलें साहित्य देवनागरींत अणकारीत करचें. अणकारा खातीर एक केंद्र स्थापन करचें, अशी सुचोवणी लेगीत फा. आदाईद हांणी केली.
मराठी राजभास करपाची मागणी चुकीची
मराठी ही कोंकणीची भयण आनी गोंयांतली साहित्यीक भास. मराठीक अभिजात भाशेचो दर्जो मेळ्ळा ही बरी गजाल, पूण मराठीक गोंयची राजभास करपाची मागणी योग्य ना. लोकांची भास ती राजभास आसता. मराठी गोंयची लोकभास न्हय. कोंकणीन मराठी कडेन दुस्मानकाय करूंक ना, पूण मराठीन तें केलां. सरकारा कडल्यान कोंकणी खातीर सुविधा दिली जाल्यार मराठी भाशीक रोखडेच बोवाळ मारतात. आतां कांय कोंकणींतले सांगाती रोमीवादी कोंकणीचे दुस्मान जाल्यात, अशें फा. आतायद हांणी म्हणलें.
रोमीवाद हो आतांचो
भारतीय साहित्य अकादमीन कोंकणीक मान्यताय दिली. राजभास कायद्यांत कोंकणीचो आस्पाव जालो, त्या वेळार रोमीवादी पेटिल्ले जाल्यार कोंकणी भाशेक कांयच मेळचें नाशिल्लें. त्या वेळार रोमीवाद नाशिल्लो, तो आतां सुरू जाला. गोंयांत खूबश्या कोंकणी भाशेच्यो शाळा इंग्लीश जाल्यात आनी कोंकणी दुय्यम भास जाल्या. आतां उरिल्ली कोंकणी पुर्तुगेज करपा खातीर वावुरतात. शिक्षणांतली लेगीत कोंकणी बंद करपाक सोदतात. तांकां गोंयांतल्या कोंकणी मोगींनी बळी पडचे न्हय, असो उलो फा. आतायद हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
