भांगरभूंय | प्रतिनिधी
हय आमी तशे अजिबूच. कोणेय कितेंय म्हणूं पूण आमच्यांत जें कितें आसा तें हेर कडेन मेळचें ना. हय, आमचे कडेन एक वेगळेंपण आसा. आमच्या रगतांतूच आसा तें. आनी तें म्हणल्यार वाद. आमकां वाद घालूंक खूब आवडटात. कसल्याय गजालीचेर वाद करूंक आमी तयार. वाद घालूंक आमचो हात कोणूच धरूंक शकना. तशे वाद तयार करपीय लोक आसात आं आमचे कडेन. ते बेठोच अऽस्सो फातर उडयतात आनी आमी वाद घालीत बसतात. विशय खंयचोय आनी कसलोय आसूं आमी वाद घालूंक सामके तयार. गोंय स्वतंत्र जाले उपरांत गोंयचें कितें करचें हाचेर भरपूर वाद जालो. गोंयची भास मराठी आनी कोंकणी तिची बोली, देखून गोंय महाराष्ट्रांत घालचें अशें भोवसंख्य लोकांचें मत आसलें. आतां गोंय महाराष्ट्रांत वचचें काय वेगळें उरचें, कोंकणी भास काय बोली हाचेर उणो वाद जालो ना. आनी हाकाच लागून तर ओपिनियन पोल जालो. गोंयकारांनी गोंयचें भवितव्य थारायलें तेन्नाच सगले वाद सोंपूंक जाय आशिल्ले. पूण ना. ‘नडीचें काडूं येता पूण बडीचें कशें काडटले’ अशी एक म्हण आसा. म्हणटकूच बडिंतूच आशिल्ले वाद कशे सोंपतले?
ओपिनियन पोल जालो, लोकांनी गोंयचो फुडार थारायलो. गोंयकारपण जिखलें. गोंय वेगळें उरलें. गोंयचें घटकराज जालें. गोंयची वेगळी भास थारली. हांगाय राजभास खंयची हाचेरूय वाद आसलोच तरी थारली निमाणें राजभास. घटकराज जाय जाल्यार पयलीं राजभास थारायात म्हणपाचो वयल्यान आदेश आयलो. भाशावार प्रांतरचने प्रमाण गोंयचें कोंकणी भाशीक राज्य जालें. म्हणटकूच आतां सगलें जाग्यार पडलें अशें दिसता म्हणल्यार आतां परतून एकदां राजभाशेचो वाद सुरू जाल्लो पळोवंक मेळटा. कोणाक तरी सरकाराक त्रास करून आपणालें सादोवन घेवपाचें आसा म्हणून तर हो वाद सुरू केला. नासल्यार जांकां इतलो तेंप राजभाशेचें पडुकूंच नासलें इतलेंच न्हय तर आपणांक सभेमाजार मराठी उलोवंक जमना म्हूण सांगपाचीं प्रामाणीकपणां जांचे कडेन आसा तेच राजभास मराठीय करुया म्हणटात हाचे वयल्यान पळयात. गोंयचें सरकार बरे तरेन वाटचाल करता तें पळोवंक नजो जाल्ले कांय जाण सरकाराक नकलामी करूंक मुखार सरल्यात.
गोंयांत मराठीचेर अन्याय जाता म्हणपाचेंय ह्या दिसांनी आयकूंक येता. एकेवटेन ही गजाल खरी. पूण कोण करता मराठीचेर अन्याय? सरकार? कसो? सरकारी नोकरी मेळोवंक राजभाशेची सक्ती केली जाल्यार मराठीचेर कसो अन्याय जावं येता काय? सरकारान तर गोंयच्या तरणाट्यांचें हीत पळेलां. गोंयांत पंच्याण्णव टक्के लोक कोंकणी उलयतात. हातूंत सगल्या जाती धर्माचे लोक आयले. म्हणटकूच पंच्याण्णव टक्के लोकांची भास कळटा ताकाच नोकरी मेळप योग्य थारतलें न्हय? सरकारान घेतिल्ल्या ह्या निर्णयाचें स्वागत करचें सोडून ताका विरोध करप म्हणजे आमच्याच फुडले पिळगे कडेन प्रतारणा केल्ले भाशेन जालें ना? आमच्या सरकारान आमच्या भुरग्यांचें हीत पळोवप ना जाल्यार कोणाचें हीत पळोवप तर? सरकाराक विरोध करूंक जांणी कोणे हो वाद सुरू केला तांकां पळेतकूच साठींत बुद्धी नाठी म्हणपाचो प्रत्यय येता.
हातूंत अशेय कांय लोक आसात ते मात्शे गोंदळिल्ले वरी दिसतात. तांका हेंय खरें आनी तेंय खरें दिसता. जांकां स्वताचें मत ना तेच अशे वागूंक शकतात काय दिसता. नासल्यार दोनूय वांगडाच खरें कशें जावं येता? एकदीस ते म्हणटात कोंकणी ही आदिवासींची. रोखडेच ते म्हणटात मराठी आमची मातृभाशा. जर कोंकणी आदिवासींची तर आदिवासींची मातृभाशा मराठी कशी जावं येता? आमचे म्हालगडे शणै गोंयबाबानूय तर हेंच सांगलां. कोंकणी आदिवासींची भास, ती वयर काडून सगले समान जावया म्हणपाचों तांचो हावेस आसलो. तांचीं उतरां मात्शीं वेगळीं आसलीं.
म्हाका एके गजालीचें मात हांसूक आयले बगर रावना. ते म्हणटात, मराठी शिकल्यारूच मनशाचेर खंय संस्कार जातात. म्हणजे देशांत हेर कडेन आशिल्ल्या लोकांचेर संस्कार जायनात तर? कानडी, गुजराथी, बंगाली, तमीळ हे लोक असंस्कारी म्हणचें आसा काय हांकां? आनी संस्कार म्हणल्यार कितें? सद्याक वोट्सेपार जे भाशेन पोस्ट येतात ते संस्कारांतल्यान आयल्यात मूं? मराठी संस्कारांत कापाकापीची भाशा येता व्हय? दुसऱ्याक बुरश्या उतरांनी उलोवप हे संस्कार व्हय? कांय लोकांचे संस्कार तर कोपांत बुडिल्ले हांवें पळेल्यात. देवळांत वतना लेगीत तांकां कोप लागता. ते बगर तांचें पावल मुखार वचना. आनी हेच लोक संस्काराच्यो खबरी उलयतात. सद्याक आमी हे सगले संस्कार बासणांत बांदून दवरुया आनी आमच्या भुरग्यांचो फुडार पळोवया. भुरग्यांचो फुडार सांबाळटले जाल्यार सरकारान जें धोरण थारायलां ताका संपूर्ण तेंको दिवचो पडटलो. सरकारीच न्हय तर खाजगी नोकऱ्यांकूय कोंकणीची सक्ती करची पडटली. सद्याक खंयच्याय खाजगी आस्थापनांनी वचून पळेयात. ऐशीं टक्के गोंयां भायले लोक मेळटले. आनी कोंकणी सक्तीची केली ना जाल्यार थंय शंबर टक्केय भायले येवं येता. देखून वाद घालतल्यांक वाद घालीत रावुंदी. कोंकणीक खेपत रावुंदी. आमी तांचे कडेन दुर्लक्ष करुया आनी सरकाराक पुराय तेंको दिवया. राजभास कायद्याक कोणूच हात लावचो ना हाचे कडेन मात लक्ष दवरचेंच पडटलें.
कांय जाण व्होट बँकेच्या नांवान सरकारचेर दबाव हाडूंक पळेतात. मराठीच्या नांवान मगोन राजकारण केलें. आयज कितें दशा आसा? 80 टक्के जर मराठी मतां आसलीं तर मगो केन्ना पडपाचो? गोंयांचे कितले लोक मराठीक मानतात तें सगले जाणात. तुमी कोंकणीक विरोध करून गोंयांत उरल्या ते मराठीक त्रासांत घालतले काय दिसता. मराठीचेर अन्याय कोण करता तें वेगळें सांगचेली गरज आसा?
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
