भांगरभूंय | प्रतिनिधी
मडगांव : पत्रकार मुखार आयले उपरांत दुसर्या दिसा पयल्या पानाचेर आपली बातमी येतली अश्या हेतान भौशीक वक्तव्यां करप योग्य न्हय. हें वागप भाजपाचे शिस्ती आड आसा. कांय वाद आसल्यार ते पक्षा कडेन येवन सोडोवचे. असो सल्लो भाजप प्रदेशाध्यक्ष दामू नायक हांणी दिलो. दुसर्या पक्षांतल्यान आयल्ल्यांनीय भाजपाचे शिस्तींत रावन काम करचें, अशेंय तांणी मुखार म्हणलें.
राज्यांतल्या कांय फुडार्यांनी हालींच एकमेकांचेर केल्ल्या टिप्पणी विशीं विचारले उपरांत भाजप प्रदेशाध्यक्ष दामू नायक हांणी म्हणलें, ‘लोकशायेंत सगल्यांक आपलें मत मांडपाचो अधिकार जरी दिला तरी कोणाकूच कायदो हातांत घेवपाची परवानगी दिवंक ना. भारतीय जनता पक्षांत आमदारां मदीं वा फुडार्यां मदीं भितरले भितर कांय वाद आसल्यार तांणी आपलें म्हणणें योग्य माचयेर मांडप गरजेचें. कोणेंय वादग्रस्त विधान केल्यार तांकां आपोवन, तांचे कडेन चर्चा करून समजायतले. पक्ष दरेकल्याचें म्हणणें आयकता आनी तांकां वाद सोंपोवपाक सांगता. भौशीक सुवातांचेर एकामेकांचेर टिप्पणी करप योग्य न्हय. कांय वेळा प्रसिद्धी खातीर कांय विधानां करतात. अशा सगल्यांक योग्य माचयेर येवन तांचें म्हणणें मांडून वाद मिटोवपाच्यो सुचवण्यो केल्यात.
दुसर्या पक्षांतल्यान भाजपांत जायत्या फुडार्यांनी आनी कार्यकर्त्यांनी प्रवेश केला. त्या सगल्यांक सेगीत सुचवण्यो केल्यात. दुसर्या पक्षांतल्यान आयिल्ल्यांक आदली विचारधारा सोडून आतां भारतीय जनता पक्षाची विचारधारा स्वीकारची. पक्षाचे शिस्तींत रावन काम करचें. भाजप हो परिवार आशिल्ल्यान दरेकल्यान हांगा वांगडी जावन रावचें, असो सल्लो नायक हांणी दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
