भांगरभूंय | प्रतिनिधी
वादान खंय बुद्द वाडटा अशें म्हणटात. पूण सद्याक जे वाद चलतात ते पळेल्यार सगलो कंठशोश काय दिसता. साद्या साद्या गजालींचेर वाद. इतलो तेंप देव आसा काय ना हाचेर वाद चलिल्लो आयकूंक येतालो. पूण आतां तर देव मानता आनी देव मानिना हाचेर वाद जाल्लो दिसता. म्हणजेच देव आसा हें सगळेच मान्य करतात अशेंच जालें. आतां देव मानप वा मानप ना हो दर एकल्योचो प्रस्न. मागीर ताचेर वाद कित्याक करूंक जाय तेंच कळना. आपूण देव मानिना हें परत परत गांवभर सांगत कित्याक भोवूंक जाय तेंच पयलीं कळना. कित्याक सांगूंक जाय तें गांवभर लोकांक? देव मानिना नाका मानूंक. देव मानिना देव मानिना म्हणून देवाचो जप कित्याक करूंक जाय? राम म्हणूंक जायना म्हणून ‘मारामारामारामारा’ म्हणपा सारकें जालें ना हें? हांव देव मानिना, देवाक भियेना ‘देवाक देवाक देवाक’ देवाचोच जप जालो ना हो?
तशें पळोवंक गेल्यार आस्तिकां परस नास्तिकूच देवाचें चड नांव घेतना दिसतात. देव ना वा देवाक मानिना म्हणपाचें सांगतना तांच्या तोंडांतल्यान नकळटना देवाचो जप जाता आनी ते पुण्य जोडून वतात. आनी आस्तीक कितें करतात तर देवाचेर श्रद्धा आसा हे भावनेन रावतात आनी देवाक विसरतात. देवा मुखार उबे रावतात तेन्ना तर आपणाचें बरें कर, सगळें सूख आपणांक दी, हें दी आनी तें दी म्हूण सांगपाकूच उरतात. आनी हें सगळें मागतना तांचे दोळ्यां मुखार सुखान भोंवपी लोक आसतात, देव नासता. आपणांक अमकें दी म्हणटना, ताका सगळें मेळ्ळां म्हाका मेळूंक ना हो भाव आसता. मागीर हांकां देव कसो पावतलो? खरो देव नास्तिकाक कळिल्लो आसता म्हणून तर तो देवाचेर कितेंय उलोवंक शकता.
हालिंसारा आमचे लोक खूब भावीक जाल्यात काय दिसतात. तांकां देव, धर्म, म्हापुरूस हांच्या नांवार कोणेच किदें उलयिल्लें वा बरयिल्लें चलना. जसो कितें ह्या सगल्यांचो मक्तो हाणींच घेतला. आतां भावना म्हणजे कितें आनी ती खिणाखिणाक दुखावता कशी हाचेर कोणेतरी सोद घेवंक जाय. आतां भावना दुखावंक व्हडलें कांयच लागना. मात्शें खंयूय फट् जाल्यार पुरो, दुखावली भावना. फाटीं एकल्यान सां. फ्रांसीस शावियेराक कितें म्हणलें आनी भावना दुखाविल्ले लोक रस्त्यार आयले. रस्तो बंद जाल्ल्यान कितल्या लोकांक त्रास जाले तें आमी पळेलें. भावना दुखाविल्ल्यांंची एकूच मागणी आसली जाणें सांताचो अपमान केला ताका बेगीन बंदखणींत उडयात. मुखार कितें जालें तें आमी पळेलां. कोणाक बंदखण जाली ना. दुखाविल्ल्या भावनांचें मुखार कितें जालें खबर ना पूण कारणां बगर लोकांक त्रास जालो. तुमची सां. फ्रांसिसाचेर श्रद्धा आसा मूं? ताच्या चमत्कारांचेर विस्वास आसा मूं? मागीर ताचे आड उलयतल्याचो बंदोबस्त तो करतलो हाचेर विस्वास दवरात न्ही. पूण पुलीस कागाळी, रस्ते आडावप हें पळेल्यार तुमचोच ताचेर विस्वास ना अशें दिसना?
सां. फ्रांसिसाचें प्रकरण न्हिवता म्हणल्यार आतां एकल्यान देवळां. मठ हांचेर टिका केली. आतां ताचे मुलाखतींत देव, देवळां कित्याक आयलीं तें कळना. थोड्यांक नस्ते वाद निर्माण करून प्रकाशझोतांत रावंक आवडटा आसूंक जाय. देखून ते मदीं मदीं नाका जाल्लीं फोण्णां फोडटात आनी वाद निर्माण करतात. आपूण असलें कितेंय उलयतकूच वाद निर्माण जातलो हें जाणा जावनूय तें उलोवप आनी वाद जातकूच सहज तोंडांतल्यान आयलें तें, जाय तर आपूण माफी मागतां म्हणप. हाका शाणपण म्हणप काय कितें? बरें कोणेय कितेंय म्हणलें आनी कोणूय कितेंय उलयलो तर ती मानसीक विकृती समजून वोगी रावचे सोडून लोकूय ताका म्हत्व दिवन ताच्या उलोवपाचेर वाद निर्माण करतात.
जे कोण देवाक मानतात तांकां हांव विचारीन, कितले मानतात तुमी देवाक? हें चराचर देवान निर्मिलां हें मान्य आसा न्ही तुमकां? तुमकां आमकां मनीस म्हूण जल्माक घालपी देवूच हें मानतात मूं तुमी? आमकां सगळ्यांक बुद्द दिवपी तो देवूच म्हणपाचें मान्य आसा मूं तुमकां? म्हणटकूच हे आस्तीक, नास्तीक देवानूच निर्मिल्यात अशें जालें ना? देवूच मूं ही सगळी बुद्द दिवपी? तुमकां जशी आपणाक भजपाची आनी आपल्यो आरती गावपाची ताणें बुद्द दिल्या तशीच आपणाचेर टिका करपाची बुद्द तांकां दिल्या हेंय मानून घेवचेंच पडटलें. मागीर तांकां दोश कसो दिवपाचो तर? सगळें जर देवानूच केलां जाल्यार तेय देवाचेंच काम करतात म्हणचें पडटलें. कारण ताच्या आदेशा बगर एक पानूय हालूंक शकना हें जर आमी मानतात जाल्यार ते कितें उलयतात, वागतात तें देवाच्याच मर्जेप्रमाण म्हणचें पडलें ना. मागीर भावना कित्याक दुखावंक जाय?
आमचे संत आस्तीक आसले काय नास्तीक खबर ना. पूण तांणीय देवाचीं फकांडां मारल्यांत आनी आयज आमी त्यो आरती म्हणून देवा मुखार गायतात. म्हाका एके गजालीची मजा दिसता, जेन्ना खरेपणीं आमची भावना दुखूंक जाय तेन्ना ती दुखावना. जेन्ना कोणूय जितेजागते देवीचेर अत्याचार करता तेन्ना खंय वता काय आमची भाविकता. आपणांक जल्म दिवपी देवीक जेन्ना वृद्धाश्रमांत घालतात तेन्ना भावना खंय मरतात? मातृ देवो भव, पितृ देवो भव फक्त म्हणपाचें प्रत्यक्षांत मात कितें चलता तें आमी पळेतात. पूण भुरगीं आपणा कडेन कशींय वागलीं म्हणून आवय-बापायक ताचो खेद आसना. तीं तांचें बरेंच जावं म्हूण आशिर्वाद दितात. देव तरी वेगळो कसो आसतलो? तुमी नास्तीक जायात वा आस्तीक तो तुमचें बरेंच जावं म्हणटलो.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
