वादाच्या उज्यांत एनसीईआरटी पाठ्यपुस्तकां…

भांगरभूंय | प्रतिनिधी

राश्ट्रीय शिक्षण धोरणा संदर्भांत 2025 वर्सा नवीन इतिहासांच्या पाठ्य पुस्तकांनी व्हड बदल केल्यात, खास करून यत्ता 7, 8 आनी 12 वेच्या वर्गांतल्या इतिहास पाठ्य पुस्तकांत. हे करतना, ‘इतिहासीक कृत्यांक आनी अत्याचारांक आधुनीक व्यक्तींक जापसालदार धरचे न्हय वा दोश दिवचो न्हय’, अशें एनसीईआरटीचे वतीन विद्यार्थ्यांक आवाहन केलां.
आतां, भुरग्यांक ऑपरेशन सिंदूर विशीं शिकपाक मेळटलें ! नव्या मॉड्युला प्रमाण, तातूंत फकत हल्लो आनी प्रतिकार करपाचो उल्लेख केल्लो आसा. पूण ही कारवाय भारता खातीर मान आनी संकल्पाचें प्रतीक कित्याक आशिल्ली, हें स्पश्ट केलां. पहलगाम आतंकवादी हल्ल्यांत पाकिस्तानान आपली भुमिका न्हयकारल्या आसली तरीय पूण, ती थेट लश्करी आनी राजकी फुडारपणाच्या आदेशा प्रमाण केल्ली आसा. अशें मॉड्युलांत स्पश्टपणान सांगलां.
यत्ता सातवेच्या वर्गाच्या एनसीईआरटीच्या पाठ्य पुस्तकांतल्यान मोगल आनी दिल्ली सुल्तानत्वाचे धडे काडून उडल्यात. आनी सासणाचो, “ मोगलांचो इतिहास, इतिहासांत जमा केला. ह्या बदलांत भारतीय राजवंश, पवित्र भुगोल, महाकुंभ आनी सरकारी येवजण्यांचेर नव्या अध्याय शिकपांचेर भर दिला. “एक्सफ्लॉरिंग सोसायटी: इंडिया अँड बियॉन्ड.” नव्या समाजशास्त्राच्या पाठ्यपुस्तकांत राजवंशांचेर नवे अध्याय आस्पावतात. जे पुर्विल्ल्या भारतीय मगध, मौर्य, शुंग आनी सात वाहनाचेर केंद्रीत आसात. ‘टिपू सुल्ताना’ क सासणाची तिळांजली !… दिल्या. 12 वेच्या पाठ्य पुस्तकांतल्यान ‘किंग्स एंड क्रॉनिकल्स द मुगल कोर्टस’, हो अध्याय काडून उडयला. तो मुळांत मोगल सत्ता आनी तांची संस्कृताय स्पश्ट करतालो. जाल्यार एनसीईआरटीच्या नव्या वर्ग 8 च्या समाजीक विज्ञान पाठ्य पुस्तकांत टिपू सुलतान, हैदर अली, 18 व्या शेंकड्यांतली अँग्लो – म्हैसूर झुंजां अशे विशय काडल्यात. फुडारांत भुरग्यांक टिपू सुल्तान हो फकत चित्रांनी पळोवंक मेळटलो, टिपू सुल्ताना’ विशीं शिकपाक मेळचें ना !
अंदूं पाठ्य पुस्तकांत ‘मेक इन इंडिया, बेटी बचाओ, बेटी पढाओ. अटल-टनल, अश्यो सरकारी येवजण्यो आस्पावल्यात. संविधानाचेर एक प्रकरणांत सर्वोच्च न्यायालयान, 2004 ह्या वर्सा, नागरिकांचो मुळावो हक्क म्हूण राश्ट्र ध्वज हुबोवपाचो अधिकार दिला. अशें तातूंत स्पश्ट केलां.
अंदूं प्रयागराजांत जाल्ल्या, महाकुंभ मेलांचोय पाठ्य पुस्तकांत केला. ह्या महाकुंभांत 66 कोटी लोकांनी वांटो घेतलो, अशें सांगलां. नव्या पुस्तकांत ‘पवित्र भुगोल’ नांवाचें प्रकरणूय आस्पावीत केल्यात. तातूंत भारताचीं पवित्र थळां आनी तीर्थ यात्रांचो तपशील दिला. तेच भशेन 12 ज्योतिलिंगां, चार धाम यात्रा, शक्तिपिठां हांचे वर्णन आसा.
एनसीईआरटीचें स्पश्टीकरण
मजगतीं, हालींच उजवाडाक आयिल्ल्या 8 वे इतिहासीक पाठ्य पुस्तकांत भोंवतणी चालू आशिल्ल्या वादांत एनसीईआरटीचे वतीन आपलें स्पश्टीकरण जारी केलां. “एक्सफ्लॉरिंग सोसायटी: इंडिया अँड बियॉन्ड.” मोगल काळांतल्या प्रकरणांतल्या टिकाकारांक जाप दितना एनसीईआरटीन सांगलां, ‘ नवे पाठ्य पुस्तक राष्ट्रीय शिक्षण धोरण 2020 आनी शाळेच्या शिक्षणाची राष्ट्रीय अभ्यासक्रम चौकटी ( एनसीएफ – एसर्इ ) 2023 च्या चौकटींतल्यार तयार केलां. हो मजकूर नामनेच्या स्रोताचेर आदारीत आसा. विद्यार्थ्यांक एक समग्र शिक्षण दिवप, हो ताचो हेतू आसा. एनसीईआरटीच्या अधिकृत निवेदना प्रमाण इतिहास, भुगोल, अर्थीक जिवीत आनी शासन हांचो मेळ घडोवन, तांकां एकठांय हाडून भारत कितलो व्यापक आसा, हें समजून घेवपा खातीर हें पाठ्य पुस्तक तयार केलां. एनसीईआरटीच्या पुस्तकांतल्यान 2025 ह्या वर्सा, जायतीं प्रकरणां काडून उडयल्यांत खरी तरीय, आमी इतिहास विभक्त करूंक ना अशें स्पश्ट केलां. एनसीईआरटीच्या म्हणण्या प्रमाण, हें पाठ्य पुस्तक शाळेच्या शिक्षणाच्या मदल्या पावंड्याच्या निमण्या वर्सा खातीर तयार केलां. विद्यार्थ्यांक बहुविधा सज्ज करपाचो हेतू आसा. तातूंत 13 व्या शेंकड्या सावन 19 व्या शेंकड्याच्या मध्याक भारताच्या इतिहासाचो आस्पाव करून. ह्या काळांतल्यो इतिहासीक घडणुको आशिल्ल्या भारताक कसो आकार दिलो, तें स्पश्ट करपाचो यत्न केला अशें मिलन शर्मा हिणें म्हणलां.
नव्या पुस्तकांत सादर केल्लीं तथ्यां, बऱ्या प्रमाणांत स्थापन जाल्ल्या मुळाव्या आनी माध्यमीक शिक्षणीक स्त्रोतांचेर आसात. विद्यार्थ्यांचेर चड म्हायतीचो ओव्हरलोड जावचो न्हय. विमर्शीक समजुतीचो प्रसार जावचो न्हय म्हणून आशय समजून घेवप गरजेचो. ह्या निवेदनांत, खास करून इतिहासीक आशया विशीं एनसीईआरटीन म्हणलां,- ‘इतिहासाच्या काळा विशीं एक टीप’ नांवाचो विभाग पान 20 चेर जोडला. एनसीईआरटीन वाचप्यांक आनी शिक्षकांनी पुस्तक समजून घेवपाक आनी तांचें मुल्यांकन करपाक आव्हान केलां. ‘फाटल्या काळांतल्या घडणुकांक आयज कोणाकच जापसालदार धरूंक फावना.’ अशें सांगून वादाचेर सासणाचो पड्डो उडयला.
अभ्यासक्रमांत कितें उरलां?…
एनसीईआरटी अभ्यासक्रमांतल्यान काडिल्ले दिल्ली सुलतान आनी मोगल हे म्हत्वाचे केले तरीय, अभ्यासक्रमांत अजुनय गरजेचे इतिहासीक आंग तिगून उरल्यात. जशें भक्ती आनी सुफी चळवळ तेच परीन प्रादेशीक राज्यां आनी सुरवेचीं आर्विल्लीं भारतीय उदरगत आदी.
एनसीईआरटीच्या नव्यान उजवाडाक आयिल्ल्या पाठ्य पुस्तकांत इतिहासीक चुकीचेर गंभीर आरोप करून, हुस्को उक्तायला. जैसलमेराच्या आदल्या राजघराण्याचो मुखेली चैतन्य सिंगान हो आरोप केला. हालींच वर्तमान एक्साचेर केल्ल्या पोस्टांत, सिंगान म्हणलां, ‘ 8 वे वर्गाच्या ‘समाजीक विज्ञाना’- च्या पुस्तकांतल्या नकाशांत जैसलमेर हें मराठा साम्राजाचो एक भाग म्हूण चित्रित केल्ल्यान हरकत घेतली. जैसलमेराचेर, -“ खंयच्याय मराठा वर्चस्व, आक्रमण, कर वा अधिकार, “ चो उल्लेख करपी “असली इतिहासीक स्रोत” नाशिल्ल्यान राजपूत आनी मराठा राज्य कर्त्यांची भुमिका आनी प्रदेश चुकीचें वर्णन करता असो दावो करून ह्या चित्रणाचें वर्णन केलां. ह्या संबंदीत एनसीईआरटीक सिंगान एक निवेदन भेटोवन खंत उक्तायल्या.
आमी इतिहास बदल्ला, विकृत करूंक ना. : एनसीईआरटी
पाठ्य पुस्तकांतल्या केल्ल्या बदलां संबंदी पूर्वग्रह आनी अजेंडा पाळपाचो आरोप एनसीर्इआरचेर केला. एनसीईआरटीन पाठ्य पुस्तकांच्या पुनर्विलोकनाचेर आमी इतिहास विकृत करूंक ना. खंयच्याय दबावा खाला कसलोच बदल करूंक ना. ह्या पुस्तकांत इतिहास जसो आसा. तसोच सादर करपाचो यत्न केला.आमी इतिहास शक्य तितलो प्रामाणीकपणान सादर करपाचो यत्न केला. इतिहास सदांच नवोताल्ल आसा तसोच दवरला. इतिहास बदलूंक मेळना. आमी इतिहास घडलो, तसोच सादर करतात. हातूंत कसलोच महिमा मंडनाची गजाल ना. अशें एनसीईआरटीच्या पाठ्य पुस्तक सिमीतचे मुखेली प्रा. मिशेल दानीन हांणी स्पश्ट केलां. कांय अभ्यासकांनी एनसीईआरटीच्या ह्या कृतीक ‘अस्वस्थ सत्यांचो प्रणाणीक हिशोब’, म्हणून तोंड भरून तोखणाय केल्या जाल्यार कांय जाणांनी, ‘वेंचीक स्वर आनी सामुदायीक चुकीचो अर्थ लावपाची शक्यताय हाचेर हुस्को उक्तायला. आमचे गोंय सोडलें जाल्यार आयज लेगीत देशांतल्या कांय व्हड राज्यांतल्या वर्तमान पत्रांतल्यान ‘ शिक्षणांत हिंदुत्वाचो उदय’ सारके आरोप एनसीईआरटी समितीचेर जांवक लागल्यात. पूण एक मात खरें,
अजून लेगीत देशांत, वादाच्या उज्यांत धुंवरेंतात एनसीईआरटी इतिहासांचीं पाठ्य पुस्तकां?…

विशाल सिनाय खांडेपारकार