भांगरभूंय | प्रतिनिधी
भारतांतलेंच न्हय तर संवसारांतलें सगल्यांत गिरेस्त देवूळ म्हूण तिरुपतीची वळख आसा. जमीन, इमारती, भांगर, दीसपट्टें उत्पन्न, बँक खात्यांतलें पयशे मेळून देवस्थाना कडेन अडेज लाख कोटी रुपयांची मालमत्ता आसा. व्यंकटेश्वराच्या (विष्णू) ह्या देवळांत सगल्यांत चड भावीक येतात. दिसाक सादारण 50 हजार. सुटी आनी सणांच्या दिसांनी हो आंकडो लाखा वयर पावता. देवळा वतीन साबार धर्मादाय कामां, गरिबांक मजत करतात. तर अश्या ह्या देवळांत प्रसाद म्हूण भक्तांक वांट्टात, तो लाडू वादग्रस्त थारला. ह्या लाडवांत वापरतात त्या तुपांत बैल आनी दुकराची चरबी आनी नुस्त्याच्या तेलाचे अंश सांपडल्यात. गुजरातांतले राष्ट्रीय डेरी उदरगत मंडळाचे प्रयोगशाळेन ते विशींचो अहवाल दिला. हो प्रकार आदल्या सरकाराच्या काळांत जाल्लो, आपूण सत्तेर येतकच हें सगलें बंद केलां, अशें आंध्र प्रदेशाचे मुख्यमंत्री चंद्राबाबू नायडू हांचें म्हणणें. तर विरोधी व्हायएसआर काँग्रेसीचे मुखेली, आदले मुख्यमंत्री जगन मोहन रेड्डी हांकां हातूंत राजकारण दिसता. दुसरे वटेन सगल्यो हिंदू संघटणा फुर्योज जाल्यात, तर केंद्र सरकारान आतां राज्या कडेन पुराय अहवाल मागला.
तिरुपती देवस्थानांत प्रसाद करपाक सामान लागता तातूंतलें कांय गुप्तपणान मागयतात खंय. तें खंयच्यान येता तें ट्रस्टाच्या थारावीक मनशांकूच खबर आसा. सुरक्षे खातीर हें पावल उखल्लां. तूप, तेलाची पुरवण दर स म्हयन्यांनी निविदे वरवीं जाता. राज्य पांवड्या वयल्या आघाडेच्या कंपनी कडल्यान सामान घेतात. हांगा लाडू हो मुखेल प्रसाद. दिसाक साडेतीन लाख लाडू खपता. फक्त प्रसादाचेर देवस्थानाक वर्साक 500 कोटीं वयर उत्पन्न जाता. म्हणटकच उच्च दर्जाचे लाडू दिवप तशें कठीण न्हय. देवस्थान ट्रस्टान लाडवांनी भेसळ जाल्ल्याचें काल शुक्रारा सांजवेळा मान्य केलें. कांय लाडवांनी वनस्पती चरबी तर कांय लाडवांनी जनावरांची चरबी सांपडल्या. दोशी व्यक्तींच्या आड न्यायालयांत वतले. मुख्यमंत्री नायडू हांचे सुचोवणे वयल्यान आमी तपासणी केली तेन्ना आमकां लाडवांत भेसळ मेळ्ळी, अशेंय तांणी म्हणलां. जांच्या सरकाराच्या काळांत हें जालें, असो आरोप जाता, ते व्हायएसआर काँग्रेसीचे मुखेली जगन मोहन रेड्डीन धर्मीक गजालींनी राजकारण घुसोवपाचो हो यत्न असो आरोप टीडीपीचेर केला. ‘दर स म्हयन्यांनी निविदे वरवीं म्हाल विकत घेतात. वितरकाक म्हालाचो दर्जो सिद्ध करपी प्रमाणपत्र दिवचें पडटा. देवस्थानाचो ट्रस्ट तुपाचें सँपल घेतना तें तपासून पळयता. मागीरूच ताची निवड जाता. आमच्या काळांत आमी 18 फावटी म्हाल न्हयकारला.’ अशेंय रेड्डी म्हणटात.
ह्या वादान सोशल मिडियाचेर धुमशेणां घालीं नात तरुच अजाप. थंय दरेका ‘विचारवंतां’न तकलेंत येतात ते विचार मांडल्यात. आपापले विचारसरणेक धरून सगले व्यक्त जाल्यात. कांय जाणांच्या मतान हाचे फाटल्यान विरोधकांक सोंपोवपाची चाल आसा. व्हायएसआर काँग्रेस पक्ष आनी तांच्या फुडाऱ्यांची प्रतिमा इबाडपाचो हो शिस्तबद्ध यत्न. तातूंत लाडू तपासपी प्रयोगशाळा ही नेमकी गुजरातांतली. म्हणटकच विचारवंतांक आनीक नेट येतलो, हें वेगळें सांगपाक नाका. थोड्यांक हो हिंदू धर्म दुबळो करपाचो यत्न दिसता. आदल्या सरकारांनी देवस्थान समित्यांचेर हेर धर्माचे लोक नेमल्यात, तांचें हें कारस्थान, अशेंय ते म्हणटात. कांय लोक हें शक्यूच ना, हें हड्ड्यार हात दवरून सांगतात. तर दूरदिश्टीच्या सोशल मिडिया विचारवंतांक तिरुमला देवस्थानांत येवपी भावीक उत्तरे कडल्या देवळांनी व्हरपा खातीरची ही मांडणी अशें दिसता. हें देवूळ राज्याचे तिजोरेक व्हडलें योगदान दिता, हें विसरूंक फावना. तिरुपती बालाजीच्या देवळांत हें अशें जावप हाचेर भक्तांचो अजून विस्वास बसूंक ना. नाजाल्यार आतां मेरेन आंदोलनां सुरू जावपाचीं. तश्यो टीडीपी समर्थक पक्षांनी धर्माचे वटेन, विरोधकांच्या आड प्रतिक्रिया उक्तायल्यात. तर विरोधकांनी सरळ हात वयर केल्यात. व्हायएसआरान उच्च न्यायालयांत याचिका घाल्या. तिचेर 25 सप्टेंबराक सुनावणी जातली. देवस्थानाचे आदले अध्यक्ष, व्हायएसआर काँग्रेसीचे खासदार सुब्बा रेड्डी हांणी हे आरोप फटीचे असो दावो केला. 2019 ते 2024 मेरेन उच्च दर्ज्याचें सामान वापरून लाडू केल्यात, अशेंय तांणी सांगलें.
सोशल मिडिया वयल्या चिखलकाल्यांत मेळत तो एकमेकांचेर आरोप करीत सुटला. ताका लागून अमूलाकूय, ‘आमी तिरुपतीक तुपाची पुरवण करिनात आनी आमच्या तुपांत मात पसून भेसळ आसना’, अशें स्पश्टीकरण दिवचें पडलां. प्रयोगशाळा म्हणटा ते प्रमाण, लाडू करपाक वापरिल्ल्या तुपांत जनावरांची चरबी आसत, तर ही म्हाभिरांकूळ गजाल. देवस्थाना सारक्या पवित्र जाग्यांचेर व्हड श्रद्धेन येवपी भाविकांचो हो अपमान. भाविकांची हातूंत कांय चूक ना. नकळटा, कांयच खबर नासतना तांचे बाबतींत हें घडलां. तांकां दोश दिवन चलचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
