भांगरभूंय | प्रतिनिधी
हिंसाचार, कायदे माड्डुपी, अश्लील, दोन अर्थांच्या सिनेमांक सेन्साॅर बोर्ड परवानगी दिना. दिल्यार भितरले कांय प्रसंग, वाक्यां बदलपाक सांगता. मात, समाजांत तणाव निर्माण करपी विशयां वयल्या सिनेमांक मात परवानगी मेळ्ळ्या. विवेक अग्नीहोत्री हांचे कांय सिनेमा हेच तरेचे. तातूंत दिशाभूल करपी म्हायती आसा, अशें कांय जाणांचें मत. तर थोड्यांक हो काळो इतिहास सातत्यान सगल्यांक कळपाक जाय अशें दिसता. अग्नीहोत्री सुरवातेक थ्रीलर, अॅक्शन सिनेमा तयार करताले, मात 2016 सावन तांणी इतिहासीक, राजकी सिनेमा केले, जे खूब वादग्रस्त थारले. बुद्धा इन अ ट्रॅफिक जॅम हो शारी नक्षलवादाचेर सिनेमा काडलो. मागीर ‘फायल्स’ माळ सुरू जाली. तातूंत द ताश्कंद फायल्स, काश्मीर फायल्स, दिल्ली फायल्स (हो अजून येवंक ना) आनी आतां बंगाल फायल्स हो सिनेमा. मदीं विपूल शाह हांणी ‘द केरल स्टोरीज’ काडलो. घडये फुडाराक तामिळनाडू, आंध्र, पंजाब फायल्स सिनेमाय येवपाक शकतात. सिनेमा हें भारतीयांक जोडपी एक माध्यम. मात समाजांत तणाव वाडूं येता, असले सिनेमा कांय जाण मुद्दाम काडपाक लागल्यात, अशें दिसता. काळो, हिंसक इतिहास खरें म्हणल्यार विसरपाक जाय. पूण तो सातत्यान यादींत उरतलो, हे खातीर बरेच भारतीय यत्न करतना स्पश्ट दिसता. ताचो समाजाचेर दूरगामी परिणाम जावं येता, हाचे भान तांकां ना. ह्यो वायट गजाली दोळ्यां मुखार येत रावल्यो जाल्यार समाजां मदीं दुस्वास पातळटा. मागीर क्रिया, प्रतिक्रिया जावन निश्पाप लोकांचो बळी वता. ते वटेन सेन्साॅर बोर्डूय गळगळो घेत ओगी बशिल्ल्याचें जाणवता.
सप्टेंबरांत प्रदर्शीत जावपी ‘द बंगाल फायल्स’ ह्या सिनेमा वयल्यान आतां वादाची कीट पडल्या. ताचो प्रिमियर शो पसून कांय लोकांच्या चेपणाक लागून रद्द करचो पडलो. खुद्द जाचेर सिनेमा काडला, ताच्या घरच्यांनी निर्मातो, दिग्दर्शकाचेर केश घाल्या.
हो सिनेमा 1946 चे ग्रेट कोलकाता किलिंग्ज (डायरेक्ट अॅक्शन डे) आनी नौखाली दंगलीचेर आदारीत आसा. 16 ते 20 आॅगस्ट मेरेन जाल्ल्या ह्या दंगलींनी पांच हजार ते 20 हजार लोकांक मरण आयिल्लें खंय. गोपालचंद्र मुखर्जी हे दंगली वेळार हिंदूंची राखण करपी एक फुडारी आशिल्ले. तांणी अनाथ, विधवांक आश्रय दिलो. विशेश म्हणल्यार ज्या मुस्लिमांनी हल्लो करूंक ना तांकां हात लावचो न्हय, अशें तांणी वांगड्यांक स्पश्ट सांगिल्लें. ह्या दंगलींनी दोनूय धर्माच्या लोकांक मरण आयलें. पूण कांय इतिहासकारांच्या मतान, फक्त हिंदुंकूच मरण आयलें! मुखर्जी हांकां पथा (बोकडो) ह्या नांवान वळखताले. कारण तांचें मूळ घराणें मटण विक्रे कडेन संबंदीत आशिल्लें. मुस्लीम लीगाच्या समर्थकांनी दंगलीं उपरांत तांकां ‘कसाई गोपाल’ म्हणपाक सुरवात केली. तांच्या घरच्यांच्या मतान, मुस्लिमांक तांणी वाटायिल्ल्याचे पुरावे आसात. खुद्द गांधीजीन नौखालींत उपासाक बशिल्ले कडेन गोपाल हांकां आपोवन दंगल थांबोवपाची विनवणी केली. उपरांत दंगल सोंपली. अशा मनशाक सिनेमांत ‘कसाई गोपाल’ म्हणप चुकीचें अशें तांच्या घरच्यांचें मत. गोपाल हांणी संरक्षणा खातीर शस्त्र हातांत घेतलें, मुस्लिमांकूच वाटायले. हाचे फाटल्यान तांचो कसलोच गुपीत हेतू नाशिल्लो. ते सुभाषचंद्र बोस हांकां मानताले, गांधीजीकूय खूब मान दिताले. दिग्दर्शकान संशोधन करिनासतना, आमच्या आज्याचें विकृत चित्रण केलां. आमी मानहानी आनी पुलीस केश केल्या, अशें तांचो नातू शांतनू म्हणटा.
इतिहासीक सिनेमा काडटना तो ज्युस्त घडणुके प्रमाण आसतलो, हाची जतनाय घेवची पडटा. तातूंत समाजमन दुखावचें ना, हाचेंय भान राखचें पडटा. असल्या सिनेमा वांगडा देशांतली गरिबी, भूक, अन्याय, एकचार हांचेरूय नवे सिनेमा येवंक जाय. तातूंत समाजाक प्रबोधन करी सारकें मात कितें तरी बरें आसचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
