वाडटे अपघात, चिंतेचो विशय

भांगरभूंय | प्रतिनिधी

आदीं रस्त्यांचे दुर्दशेक लागून अपघात जातात म्हूण कागाळ आसताली. पूण आतां बऱ्या रस्त्यार लेगीत अपघात जातात. हाचीं कारणां सोदचींच पडटलीं.

थोडो तेंप आदीं वर्तमानपत्रां आवाज उठयतालीं. गोंयचे रस्ते मरणाचे सांपळे जाल्यात म्हूण. हाचें मुखेल कारण आशिल्लें रस्त्यां वेलीं फोंडकुलां. कशीं तरी हीं फोंडकुलां आतां कमी जाल्यांत, रस्ते नितळ जाल्यात, बरेच कडेन ते रुंद लेगीत जाल्यात. गांवांनी पसरिल्लें रस्त्यांचें जाळेंय आतां समाधानकारक आसा. तरी अपघातांचो आंकडो सकयल देंवना. आतां खबरांपत्रां न्हय, तर सामान्य लोक बोवाळ मारूंक लागला रस्ते मरणाचे सांपळे जाल्यात म्हूण. अशें कित्या खातीर? कोणाचें चुकता म्हूण हें घडटा? दर दिसा रस्तो-अपघात घडटात आनी कोण तरी मरून वता. साद्या स्कुटर-मोटरसायकल अपघातांत पसून मनीस मरता ही गंभीर आनी चिंताजनक गजाल आसा. अपघातां विशीं इतली जागृताय करुनूय मनीस मरपाचो आंकडो देंवचे बदला वाडतूच आसा हाचेर सरकारानूय लक्ष घालूंक जाय.
कांय दीस आदीं फोंडेंच्या बेतोड्यां जाल्ल्या अपघातांत हेंच परतून दिश्टी पडलें. विद्यार्थिनी इशा गांवस आनी आदित्य देसाय हांच्यो स्कुटरी एकामेकाक आपटल्यो आनी दोगांकूय जाग्यारूच मरण आयलें. कितली सुमार आशिल्ली आसुये तांची स्पीड म्हूण दोगांय मरपा इतलो आकांताचो अपघात घडलो? रस्तो कांय आडखळींचो नाशिल्लो, फोंडकुलांचो नाशिल्लो, तर कशें तांकां मरण आयलें? ह्या गजालींचेर चर्चा करचे परस आमचें खंय चुकता हाचेर मनन करुया. वाहन चलोवपी, रस्तो, रस्त्याचें प्रशासन आनी येरादारी खातें हांगा जबाबदारेच्या जाळांत येतात.
वाहन चलोवपी वाहन चलोवपाचें प्रशिक्षण घेवनूच रस्त्यार देंवता. ताका फावो तशें प्रशिक्षण आसा हें तपासून वाहन चलवपाचो परवानो मेळटा. ह्या प्रशिक्षणा भितर रस्तो-येरादारिचे नेम-कायदे ताका शिकयतात. आपली तशी दुसऱ्याची काळजी घेवंक रस्त्यार उब्यो केल्ल्या खुणा विशीं तांकां म्हायती दितात. शिवाय वाहन चलयतना कसली-कसली काळजी घेवंक जाय हे विशींय जागृताय करतात. जाल्यार वाहन चलोवपी आपली जबाबदारी वळखना काय? खंयच्या रस्त्याचेर कितले स्पिडीन वचूंक जाय हें सांगपी रस्त्या कुशीक तकटे आसतातूच, तरी सामान्य अक्कल वाहनाची स्पीड सांबाळूंक सांगता. ह्या कित्याचेर भर दिनासतना आमी वाहन चलयतात जाल्यार अपघाताक पयलीं आमीच जबाबदार थारतात.
हाचे मुखार कोणाची जबाबदारी येता तें पळेवया. आतां तरी वाडट्या रस्तो-अपघातांक सरकाराक जबाबदार धरूंक मेळचें ना. सरकार म्हळ्यार प्रशासन, रस्तो खातें, येरादारी खातें, आदीं. रस्त्यांची बांदावळ सारकी नासल्यार अपघात जावं येता. पूण फाटल्या आयतारा पोरण्या मांडवी पुलाचेर एका वाहनाचो आनी मोटरसायकलीचो अपघात घडलो आनी मोटरसायकलकार न्हंयंत पडलो. अशें कशें घडलें? मदीं मदीं कितलेशेच अपघात ह्या पुलार घडटात. वाहनां एकामेकाक फाटल्यान मोखतना पळेवंक मेळटात जाल्यार ओव्हरटेक करतना अपघात जाल्ले दिसतात. त्या पुलार खरें म्हणल्यार ओव्हरटेक करूंक काळजी घेवची पडटा, तरी…
हालींच गोंयांत जाल्ल्या अपघातां विशीं येरादारी पुलीस विभागान वर्सुकी विश्लेशण अहवाल उजवाडा हाडला. तांतूंत आशिल्ली भोव मोलादीक म्हायती भौसान गंभीरतायेन वाचूंक जाय. त्या अहवाला प्रमाणे 1 जानेवारी 2024 ते 31 डिसेंबर 2024 ह्या एका वर्साच्या काळांत 2682 रस्तो अपघातांत 286 जणांक मरण आयलें, 148 गंभीर जखमी आनी 370 जण किरकोळ जखमी जाले. ह्या आंकड्यांत 241 दादले आनी 45 बायलांचो आस्पाव आसा. हुस्को करपाची गजाल म्हणल्यार 35 वर्सां परस उण्या पिरायेच्या 130 जणांक मरण आयलें. ही सामकी चिंता करपाची गजाल आसा. जायते कडेन होर्डिंग्स घाल्लीं आसात, ‘कोण तरी घरा कडेन वाट पळेता’ वाहन चलोवप्याक घाल्ल्या ह्या संदेशाचेर कोणाचें लक्ष आसना. एके वटेन प्रशासन जाग्यार येवंक लागलां जाल्यार दुसरे वटेन वाहन चलोवपी आपणालें कर्तव्य विसरूंक लागल्यात.
ह्याच अहवालांत अशेंय म्हणलां, गांवगिऱ्या वाठारांत चड रस्तो-अपघात आनी मरणां जाल्यांत. फाटल्या वर्सा गोंयांत घडिल्ल्या अपघातां मदीं 72.18 टक्के गांवगिऱ्या वाठारांत आसात, ते चडशे सांजेच्या 6 ते 9 वरां मदीं घडल्यात. आतां गांवांनी लेगीत येरादारी वाडल्या, म्हणून अपघाताचें प्रमाण वाडलां म्हणूंक मेळचें ना. बेशिस्त आनी सुरक्षेचीं उपकरणां वापरिनाशिल्ल्यान हें घडटा. हॅल्मॅट घालप ना, वाहन चलयतना मोबायलाचेर उलोवप, सीटबेल्ट बांदप ना, गरजे भायर गजाली मारीत वाहन चलोवप, ओव्हरस्पीड, हेवूय अप्रत्यक्ष गुन्यांव वाहन चालोवप्या कडच्यान घडटात.
रस्ते कित्याक बांदतात? ह्या प्रस्नांची एक जाप आमी जाणून घेवया. मुखेलणान मनीस आनी म्हालाची येरादारी सुरळीत करचे खातीर, वेगळ्या वेगळ्या सुवातींक जोडचे खातीर आनी येरादारी, वेपार, गरजेच्यो सेवा मेळोवन घेवचे खातीर रस्ते बांदतात. ह्याच रस्त्यांक लागून उदरगत आनी समाजीक प्रगती घडटा. ह्या रस्त्यांकूच लागून कार्यक्षम हालचाली जातात आनी नोकऱ्यो, शिक्षण, भलायकी आनी हेर संदी मेळोवंक आधार जाता. हे खातीर सरकार आनी सरकाराचीं खातीं कार्यक्षम आसात. नदर दवरपा खातीर येरादारी खातें आसा. हांचो कसलोच गुन्यांव नासतना जे अपघात घडटात, थंय सरकाराक आमी कशें आस्पावन घेवंक शकतात काय? मनीस करतल्या गुन्यांवांक सरकाराक धारेर धरतले काय?
आदीं रस्त्यांचे दुर्दशेक लागून अपघात जातात म्हूण कागाळ आसताली. पूण आतां बऱ्या रस्त्यार लेगीत अपघात जातात. हाचीं कारणां सोदचींच पडटलीं. पयलें म्हणल्यार वाहन चलयतल्यांनी शाबुद्धीर आसूंक जाय. हांव सारको चलयतां, म्हजें वाहन दुसऱ्याक आपटचें ना हाची हांव काळजी घेतां ही बरी गजाल. तेच बराबर दुसरो सारको चलयना, तो आपणाचेर कित्याक हाडून मारचो ना, हाचे विशींय आमी हुस्को धरची गरज आसा. वाहन चलयतल्यांक एकामेकाचो हुस्को आसल्यार अपघात टाळूं येतात अशें आमकां दिसता. हे विशीं आमचें लक्ष केंद्रीत करुया आनी वाडट्या अपघातांचेर आळाबंद हाडुया.

विन्सी क्वाद्रूस
9822587498