भांगरभूंय | प्रतिनिधी
गोंय खूब ल्हान आसा. पूण हांगां येरादारी इतली जाल्या की अपघातांचो आंकडो वाडतच आसा. मनशां कमी आनी वाहनां चड, अशी परिस्थिती जाल्या. 1 जानेवारी ते आयज मेरेन ल्हान, व्हड अशे कितलेशेंच अपघात जाल्यात. फाटल्या 52 दिसांत 51 जाणांक अपघातांत मरण आयलां. तर कांय जाण जखमी जाल्यात. खरेंच हे वाडटे अपघात आनी मरणां हो हुस्क्याचो विशय जावन आसा. फाटल्या सप्तकांत हरवळ्यां जाल्ल्या अपघातांत एका जोडप्यांक जाग्यारुच मरण आयलें. तर कांय दिसा पयलीं दिवचल- नानोड्यां कार आनी कदंबाच्या अपघातांत तिगांक मरण आयले. नवीन जुवारी पुलाचेर एकल्यांक मरण आयलें. अशे एका फाटल्यान एक अपघांत जायतूच आसात. आतां प्रस्न आसा ह्या अपघातांक जापसालदार कोण आनी ते घडटात तरी कशें?
सकाळीं मनीस घरांतल्यान ‘येता हां’ अशें सांगून कामाक वता, पूण ताच्या घरा फोन येता की अपघात जाला. हें आयकना फुडें घरच्यांचो जीव कासावीस जाता. मागीर त्या मनशाक वचूंन पळयसर जिवाक थार लागना. अपघातांक लागून भायर सरिल्लो मनीस परत धडधाकट घरां पावतलो कांय ना हो हुस्को दर खिणांक घरच्यांक आसता.
अपघात सांगून जायनात, पूण शक्यतो उणें जातलें हे खातीर दरेकलो यत्न करुं शकता. वाडट्या अपघातांक कितलींशींच कारणां आसात. सोरो पियोवन गाडी चलोवप, खूब गतीन गाडी चलोवप, चलयतना न्हिद येवप, हॅल्मेट घालप ना, येरादारी नेम पाळप ना, परवाने नासतना ल्हान पिरायेचेर गाडी चलोवप अशीं जायती… येरादारी पुलिसांनी सगळ्यांच्या बाबतीत कडक रावप गरजेचें. कोणे हॅल्मेट घालूंकना वा परवानो ना आनी ताची वयर मेरेन वळख आसल्यार एका फोनाचेर तांकां सोडटात. कोण येरादारी नेम पाळीनात तांचेर पुलिसांनी खर कारवाय करपाक जाय. फुडें वचून तांचे खातीर दुसऱ्यांक लुकसाण जावं शकता. कितलेंशेच फावटी गाडी चलोवप्याची कसलीच चूक नासतना दुसरो येवन तांचेर गाडी मारता. मागीर तांतूत कोणाक मरण येता तर कोण जखमी जाता. लुकसाण हे दोगांकुय.
बसींची तांचे मदींच सर्त लागिल्ली आसता. हांव फुडे कांय तुं फुडे आनी ओव्हरटेक करतना ते मागीर स्वता तरी फोंडांन पडटात नातर दुसऱ्यांचे तरी लुकसाण करतात. आतांच्या भुरग्यांक गाडी चलयतना गितां आयकूपाक जाय मागीर चारचाकी गाडयेन व्हडल्यान गीतां लायतात. दोनचाकी वाले कानात इयरफोन घालून गाडी चलयतात वा गाडी चलयतना फोनार उलयतात हाका लागून मागीर तांकां दुसरे गाडयेचे हॉर्न आयकूपाक येनात आनी अपघात जातात.
हालींसराक रस्त्यांचेर खणून दवरलां, फोंडकुला पडल्यांत. तीं चुकोवपाक लोक कुशीकसुन गाडी काडपाक सोदतात आनी मागीर अपघात. रस्त्यांची कामां जाता तितले बेगीन सोंपोवची गरज आसा. घातक ओल्तां आसात थंय सूचना फलक लावचे, गाडी चलोवपाक शिकले उपरांत वळखीन वा पयशे दिवन परवाने दिवच्या बदलाक योग्य प्रक्रिया पुराय करुन परवाने दिवचे. ते दितना तांकां येरादारीचे नेम आनी कायदे हांचे विशीं पुराय म्हयती दिवची. अशीं अजून जायतीं कारणा आसात, जाका लागून अपघात घडतच आसात. आमकां सगळ्यांक ती खबर आसा, फकत तांचेर कोण बारीकसाणेन विचार करीनात आनी जाय तशें वाहनां चलयतात.
अपघातांचेर नियंत्रण दवरपाक सरकारान येवजण्यो सुरु केल्यात. वयर उल्लेख केल्या कारणांचो जर आमी विचार केलो तर अपघांत उणें जावपाक शकतात. दरेक नागरिकांन मतींत दवरचें, आपले जिवीत वाचवप आनी दुसऱ्यांचे जिवीत वाचवप हें आपल्या हातांत आसा.
प्राची गांवकार
सुर्ला-सत्तरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
