वाट पत्रकारितेची, सर्जनशिलतेची

भांगरभूंय | प्रतिनिधी

लोकमान्य बाळ गंगाधर टिळक हांची पत्रकारिता आनी ताकतिकेन बदलपी तंत्रगिन्याना प्रमाण बदलपी आतांचे पत्रकारितेची तुळा जावंक शकना. तेंप बददला, गंगा, यमुना, कृश्णा, शरयु, मुळा मुठा आनी मांडवींतल्यान उदक व्हांवन गेलां. म्हादयचें उदक कर्नाटक आडावंक शकूंक ना, गोंयांक अंदूं पावस कित्याक चड पडला? गोंयकारच न्ही गोंयांत राबितो करपी गोंयां भायल्या गोंयकारांनी चिंतपाक जाय. पावसाचें उदक आडावन तानेल्ल्या लोकांक तें दिवचें.
लोकमान्यांची 1 ऑगस्टाक पुण्यतीथ. जयंती, पुण्यतीथीक आर्गां ओंपतना लोकमान्य कित्याक अजरंवर आसात? भारत स्वातंत्र्यां खातीर झुजिल्ल्यान? तशेंच झुज हाचे फुडें जातलें? अण्वस्त्रां, मिसायल्स, ड्रोनाची निर्मणी आमच्या देशांत जाता ती नवे पद्दतीच्या झुजापासत, राखणे दळा खातीर.
देशाक स्वातंत्र्य मेळूंक नाशिल्लें जाल्यार मेकळेपणान आमी उलोवंक, बरोवंक शकतले आशिल्ले? लोकमान्य आज आशिल्ले जाल्यार कालच्या परस फुडाराचेर बरोवन येवपी संकश्टां, अरिश्टांची शिटकावणी दिवपाचे. तो वावर विज्ञान, तंत्रज्ञान करपाक लागलां. आजच्या पत्रकारांनी ते दिकेन वचपाची, पळोवपाची, सर्जनशील जावपाची गरज आसा. 65 वें विखुरील्लें पान लॅपटाॅपार उतरांनी बांदतना सर्जनशीलतेची याद करुन दिवपी, वाट दाखोवपी संपादप्यांक सलाम. 65 पानां नव्या रुपांत बांदपाचो हावेस बाळगितना दिसपट्टे घडणुकांचेर विचार उक्तावपाक तुमी आमी फाटीं कित्याक रावया?
लोकमान्यांचे ‘लोकमान्य’ पत्रकारितेन लोकांचे यादींत ते आजय आसात. गरजो बदलिल्ल्यान ते वाटेवेल्यान आतांचे पत्रकार वचूंक शकचे ना. फाटल्या सप्तकांत एके कंपनीच्या तंत्रगिन्यानांत जाल्ली गडबड खंयच्या देशाक कितली म्हारग पडली ताची पुराय म्हायती मेळूंक ना. कांय गुपितां उरतात, तीं सोदून काडपी तंत्रज्ञ, विज्ञानिक भारतांतय आसात. पुराय म्हायती ते दिवचे नात, पूण मूनलायटिंगाचो बाण सुटला. पत्रकारांक म्हायती न्यायालयांतल्यान मेळूंक येता. सर्वोच्च न्यायालय कायदो बदलप, प्रशासनांत नितळसाण हाडपाच्या वावरांत वांटो घेता. लोकमान्यांचे पत्रकारितेचें मूळ, तत्व उरचें, कायद्यांत बदल जावचे हेखातीर वावुरपी कितले? लोकसभेचे हंगामी सभापती ते खातीर मार्गदर्शक जायत? दोन वर्सां भितर जापो मेळटल्यो.
आरंभ प्रशासनांतल्यान जाता, भुरग्याच्या आंगातली कुशळटाय वळखूंक आवय- बापायकय शिकोवचें पडटलें.
पत्रकार हो सदांचो पत्रकार, शिक्षक सदाचों शिक्षक, समाजाक उजवाडाचो दिवो दाखोवप तांची लागणूक. पत्रकार लेखकय जावंक शकता, खबराकारांची सर्जनशिलता ताच्या दिसपट्ट्या वावरांत घुस्पता. ते सर्जनशिलतेक दिसाळ्यांतलें स्तंभलेखन मार्ग दाखोवंक शकता. स्तंभलेखनाचो वावरय संशोधनाक, फुडार थारावपाक सरकाराक उपेगी पडटा. थेट वाचपी, अर्थाचो अनर्थ करपी आपूण कोण तें विसरतात तेन्ना फाटल्यान रावन, मुखार बसून आयकून घेवपी कळ्ळें ना समजून घेतात. वांगडचे चुको दाखोवपाची संद घेतले, आसूं तें सोडून दी म्हणपीय आसतले.
कालच्या पत्रकारांची तत्वां, लागणूक आयज पाळपाकच जाय अशें नासलें तरी नवनिर्मणेची आस, तांक तांका आसपाक जाय. शास्त्रोक्त अभ्यासांतल्यान तें करुंक येता, इतिहास सांगतना नवे विचार मांडप ही पत्रकारितेची फुडाराची दिका. त्या मार्गान वतना व्यक्तीं परस विचारांक, माह्यतीक म्हत्व दिवचें. लोकमान्यांक तीच सलामी आसतली.
म्हायतीचें व्हड ताट वाचप्यां मुखार दवरप्याचें खरें नांव, गांव, वेवसाय कळ्ळ्यार दुबाव पयस जाता. मोख दवरून साबार कार्यावळी जाल्यार कार्यावळींर खर्च केल्ल्या पयशाचें मोल वाडटा, पयसो दुपेटीन मेळटा.
सर्जनशिलतेक वेगळे वाटेन व्हरपाचो होच वगत. नियोजन आनी फुडारांतल्या वेवस्थापनाचे दिकेचें म्हत्व समजतलो तो जैताचे वाटेन वतलो.
म्हादय आडावन दवरतना चारय दिकांनी हुंवार आयल्यार ? कलेंतय कुशळटाय आसता, पत्रकारीताय एक कला, पुराय वेळ समाजाच्या साबार आंगांक पळेल्यार ती फकत पत्रकारिता. ते कुशळतायेक, कलेक अक्षरांतल्यान वळखुपी संपादप्यांची चार उतरां मोलादीक. शांतीकायेन थापटां मारपी, विचारवंतांच्यो देखी दिवपी.
विखुरील्ल्या पानांतल्यान पावस, वेंचणुकेच्यो गजाली सांगतना, वाचन करतना, चिंतनांनी व्हड जातना फुडाराचो दिश्टावो जाता. तो दिश्टावोय सदां खातीर दवरुन हुंवारा वेळार, भलायकी इबाडिल्ल्यांक, इबाडल्यार घरांनी कित्याक पावचो न्ही? पिरायेन ज्येश्ठ, कर्तृत्वान वरिश्ठां मुखार बागोवपाक अनमनूंक जायना. विखुरील्लीं पानां बदलांतल्यान फुडें गेलीं, थिराय आयली, नवें कितें तरी वाचप्यांक दिवपाक जाय. उत्पादक जायनासतना सर्जनशिलतेक रचनात्मक रुपांतल्यान, उतरांय जोखून, मेजून.
घाटावयल्यान गोंयांत कोण येतात? फटींगपणां करून करोडपती जावचेपरस हातांच्या वावराचें व्हडपण सांगपाक? पडिल्ल्या वडार उदक शिंपडपाक ? कित्याक भायल्यांक भावता गोंय ? गोंयची माती? आत्म्याचें संगीत? म्हेळ्यो, ल्हान जावपी दर्यादेगो? ताचे परस व्हड दर्याचो गाज, झाडां माडांची सांवळी.

सुहासिनी प्रभुगांवकार

9881099260