वाट चुकिल्ल्यांक भरवंसो दिता : भरवंशाचीं पावलां

भांगरभूंय | प्रतिनिधी

हें पुस्तक काळखांत आनी जिवितांत शेणलेल्या आनी वाट चुकिल्ल्या मनशांक भरवंसो दिता. तांकां जिणेक फुडो करून पावलां मारपाचो उलो दिता.

सेमिनारी निवास प्रकाशनान ‘भरवंशाचीं पावलां’ (खुर्साची वाट) हें पुस्तक हालींच उजवाडायलें. ह्या पुस्तकांत सगळ्यो मेळून 7 कोंकणी जाल्यार 3 इंग्लीश भाशेंत खुरसाच्यो वाटो आसात. भावार्थ, भरवंसो आनी मोग, हे तीन देव शेगूण. भावार्थ आपणावन, मोगान भरून हीं भरवंशाचीं पावलां मारचीं असो संदेश पाद्री मारियानो त्रावासो हांणी आपली उपकाराचीं उतरां बरयतना दिला.
ह्या पुस्तकांत सगळ्यां सिमिनारिस्तांनी आपल्या जिविताचेर खोलायेन नियाळ करून, रेतिरांनी आयकल्लें मनांत दवरून आनी आपल्या दिसपट्या जिवितांत तें कितें घडटा, ताचो अणभव घेवन आपलें मन ह्या पुस्तकाच्या रुपांतल्यान गुंथून हाडलां. ह्या पुस्तकांत पवित्र बिरेस्तारा दिसा करपाचें पवित्र वर आनी पवित्र शेनवारा दिसा करच्यो सात दुख्खींचो तेर्स आस्पावला. पाद्री डॉ. लुर्इस गोमीश आनी पाद्री मारियानो त्रावासो हांच्या मार्गदर्शना खाला धुळेर, म्हापशेंच्या सिमिनारिस्त भावांनी ह्या पुस्तकाचें बरोवप केलां. देखून खात्रेन हें पुस्तक धर्मीक शिकवणेन भरवंशाचीं पावलां मारतना खोस भोगता.
हें पुस्तक काळखांत आनी जिवितांत शेणलेल्या आनी वाट चुकिल्ल्या मनशांक भरवंसो दिता. तांकां जिणेक फुडो करून पावलां मारपाचो उलो दिता. जिवितांत निराशी जाल्ल्यांक नवीन उमेद दिता. आपली जीण जेजुच्या भरवंशाचेर चलूंक आदार दिता. तशेंच कोरेझमाच्या निमतान हें पुस्तक दरेकाक आदार दितलें म्हणपाची खोशी आसा. शिक्षिका मेलिसा सिमॉयस आनी मायरा व्हियेरा हांणी संपादकाचो कश्टी वावर केला. जाल्यार सिमिनारिस्त देरियस फेर्नांडीस हांणी पुस्तकाचें मुखचित्र रंगयलां. हें पुस्तक 134 पानांनी विणलां आनी पुस्तकांचें मोल शंबर रुपया जावन आसा. तशेंच नीव एज प्रिन्टर्सान पुस्तक छापलां.
ह्या पुस्तकांत बरोवपी सिमिनारीस्त नायजेल परेरा, देरियस फेर्नांडीस, रेनफार्ड डी कॉस्ता, ब्रायन परेरा, जेसली आब्रान्चीस, जोर्डन लोबा, मॅंकेन्झी मास्कोरेन्स, रॉलन्ड फेर्नांडीस, आल्ड्रीच डायस, केलब फेर्नांडीस, डेनियल डी कॉस्ता, फ्रँक फेर्नांडीस, नील वाझ, रेनन फेर्नांडीस, शॉन फार्नांडीस, स्टीव रोड्रीगीज, आनी स्लिफॉन सिमॉयस हांणी धर्मीक लेखन केलां.
हें पुस्तक आमकां आदाराचें जावचे खातीर दोनूच वस्तू आमी करूंक वावुरुंया. ह्या पुस्तकाचेर आशिल्ल्या खुर्साचे वाटेंत आमी भक्तीपणांत वांटो घेवन बरो नियाळ करुंया आनी दुसरे सुवातेर तोच नियाळ आनी खुर्साची वाट आमी आमच्या जिवितांत जियेवंक गंभीरपणी निर्णय घेवुंया अशे विचार पुस्तकाचें संपादक मेलिसा सिमॉयसान व्यक्त केल्यात.
ह्या पुस्तकांत चड करून दयाळ कर्ण्यांचेर आदारिल्ली, गवळीक विशयाचेर आदारिल्ली, जेजुच्या कश्टां मरणाचेर आदारिल्ली, संवसाराचेर आदारिल्ली, तरणाट्यांच्या जिविताचेर आदारिल्ली, शिक्षणीक घडण्यांचेर आदारिल्ली, सांतां-भक्तांचेर आदारिल्ली खुर्साची वाट अशे पुस्तकाचे विशय जावन आसात.
‘म्हाका बलिदान न्हय पूण दया जाय.’ अश्या दयाळाचेर आमचें लक्ष घालून, दयाळ करण्यो आमच्या दोळ्यां समाकार दवरून, ह्या कृपेभरीत प्रातीच काळांत वाट मेळूं. तशेंच एक दयाळ्याचो हुस्क्यान भरिल्लो आमी मोगाचो समुदाय बांदून हाडूंक हे खुर्साचे वाटेंत जण एकल्याक कृपा मागपाचें मागणें वाचपाक मेळटा.
कोरेझमाच्या काळांत स्वामीच्या पावलांनी चलतना ख्रिस्ती भाव- भयणांचे जिणेक नवो भरवंसो उदेवं आनी तुमचीं पावलां भरवंशाचीं पावलां जावंक हें पुस्तक समेस्तांक आदार दितलें म्हणपाचें खात्रेन जाणवता. सगळ्यां बरोवप्यांक शाबासकी दिवन, हें पुस्तक सगळ्यां क्रिस्तांव भावांच्या घरांत आसूंक फावो.

विशाल सिनाय खांडेपारकार
8080622370